নিজৰ ধাৰাবাহিক প্ৰদৰ্শন অব্যাহত ৰাখি ইংলেণ্ডৰ অধিনায়ক জো ৰুটে আইচিচিৰ টেষ্ট ৰেংকিঙত শীৰ্ষস্থান দখল কৰিবলৈ সক্ষম হৈছে। ছয় বছৰ পাছত পুনৰ টেষ্ট বেটছমেনৰ তালিকাৰ শীৰ্ষত আৰোহন কৰিলে ৰুটে।
ভাৰত আৰু ইংলেণ্ডৰ টেষ্ট ছিৰিজ আৰম্ভ হোৱাৰ পূৰ্বে ৫নম্বৰ স্থানত আছিল ৰুট। তেওঁৰ আগত আছিল বিৰাট কোহলি, মাৰ্নাছ লেবুছেন, ষ্টিভ স্মিথ আৰু কেন উইলিয়ামছন। কিন্তু তিনিখন টেষ্টৰ পাছতে একখোপে এক নম্বৰলৈ উঠিল ৰুট। চলিত ছিৰিজত এতিয়ালৈকে ৫০৭ৰাণ কৰিছে জো ৰুটে।
বৃহস্পতিবাৰৰ পৰা ওভেল টেষ্ট আৰম্ভ হ’ব। ছিৰিজৰ আৰু এখন টেষ্ট বাকী আছে। লীডছ টেষ্ট আৰম্ভ হোৱাৰ পূৰ্বে ২ নম্বৰ স্থানত আছিল ৰুট। তৃতীয় টেষ্টৰ দুৰ্দান্ত ইনিংছৰ পাছতে উইলিয়ামছনক অতিক্ৰমি ১নম্বৰ স্থানলৈ উঠে ইংলেণ্ডৰ অধিনায়কগৰাকী।
জো ৰুটে টেষ্ট তালিকাৰ শীৰ্ষ স্থান দখল কৰাৰ বিপৰীতে ভাৰতৰ অধিনায়ক বিৰাট কোহলিয়ে এটা স্থান হেৰুৱাই তালিকাৰ ৬নম্বৰ স্থানত আছে।
আনহাতে, কোহলিক অতিক্ৰমি ৫নম্বৰ স্থানলৈ উঠিছে ৰোহিত শৰ্মা। হিটমেন ৰোহিত দুবছৰ পূৰ্বে টেষ্ট তালিকাত ৫৪নম্বৰ স্থানত আছিল। তাৰ পাছতে শীৰ্ষ দহত স্থানলৈ আহে। লীডছ টেষ্টৰ পাছতে কোহলিক অতিক্ৰমি পাঁচ নম্বৰ স্থান লাভ কৰে ৰোহিতে।
উল্লেখ্য যে ২০১৭চনৰ পাছত কোনো ভাৰতীয় বেটছমেন কোহলিক অতিক্ৰমি ওপৰলৈ উঠিছে। ২০১৭ত চেতেশ্বৰ পূজাৰা ২ নম্বৰ স্থানত থকাৰ বিপুৰীতে কোহলি আছিল ৫নম্বৰ স্থানত।
চলিত টেষ্ট ছিৰিজত ইংলেণ্ডৰ বিৰুদ্ধে ৰাণৰ মুখ দেখা নাই কোহলিয়ে। যোৱা দুবছৰ ধৰি শতক কৰিব পৰা নাই ভাৰতীয় অধিনায়কগৰাকীয়ে। এতিয়া ওভেল টেষ্টত ৰাণৰ মাজলৈ উভতি অহাৰ বাবে কোহলিৰ সন্মুখত দেখা দিছে এক বিৰাট প্ৰত্যাহ্বান।
