শ্ৰীমন্ত শংকৰদেৱ সংঘ বোকাখাত জিলা শাখাৰ ২০১৯-২০ কাৰ্যকালৰ সভাপতি পদৰ বাবে সংঘৰ প্ৰচাৰ শাখাৰ প্ৰাক্তন সম্পাদক যোগেশ লইং বিনা প্ৰতিদ্বন্দ্বিতাৰে নিৰ্বাচিত হৈছে ৷
আজি বোকাখাত জিলা শাখাৰ সদৰ আঞ্চলিক শাখাৰ অন্তৰ্গত বোকাখাত বিষ্ণুপুৰ প্ৰাথমিক শাখাৰ নামঘৰত অনুষ্ঠিত জিলা শাখাৰ পূৰ্ণাংগ কাৰ্যনিৰ্বাহক সভাত তেওঁ বিনা প্ৰতিদ্বন্দ্বিতাৰে সভাপতি হিচাপে নিৰ্বাচিত হয়।
আনহাতে ১৩ অক্টোবৰৰ কাৰ্যনিৰ্বাহক সভাত ২০২০ চনত বোকাখাত জিলা শাখাৰ আতিথ্যত অনুষ্ঠিত হ’ব লগা শ্ৰীমন্ত শংকৰদেৱ সংঘৰ ৮৯ সংখ্যক কেন্দ্ৰীয় বাৰ্ষিক অধিৱেশনৰ ওপৰত বিতং আলোচনা কৰা হয় ৷
কেন্দ্ৰীয় বাৰ্ষিক অধিৱেশনখন সুচাৰুপে অনুষ্ঠিত কৰিবৰ বাবে স্থানীয় বিধায়ক তথা কেবিনেট মন্ত্ৰী অতুল বৰাই গোলাঘাট জিলা প্ৰশাসন আৰু বোকাখাত মহকুমা প্ৰশাসনৰ সকলো চৰকাৰী বিভাগৰ মূৰব্বীৰ লগত আলোচনাত মিলিত হয়।
আৰু এই আলোচনাতে অধিৱেশনৰ বাবে এখন প্ৰাক্ কলন বাজেট প্ৰস্তুত কৰি অধিৱেশন অনুষ্ঠিত হ’ব লগা অঞ্চলটো উন্নয়ণৰ বাবে মুখ্য মন্ত্ৰী সৰ্বানন্দ সোণোৱাল আৰু বিত্ত মন্ত্ৰী ড০ হিমন্ত বিশ্ব শৰ্মাৰ লগত আলোচনাত মিলিত হ’বৰ বাবে সিদ্ধান্ত গ্ৰহণ কৰা হয় ৷
সকলোৰে সহায় সহযোগিতাৰে অধিবেশনখন যাতে সৰ্বাংগগ সুন্দৰ হয়, তাৰ বাবে বোকাখাত মহকুমাৰ সকলো জাতীয় সংগঠন, অনুষ্ঠান-প্ৰতিষ্ঠান, চৰকাৰী কৰ্মচাৰী সংগঠন সমূহৰ লগত পৰ্যায় ক্ৰমে আলোচনাত মিলিত হোৱাৰ বাবেও সভাই সিদ্ধান্ত কৰে ৷
জিলা শাখাৰ সভাপতি ধনেশ্বৰ লইঙৰ সভাপতিত্বত অনুষ্ঠিত সভাখনৰ আঁত ধৰে জিলা শাখাৰ সম্পাদক চন্দ্ৰ কান্ত ভূঞাই ৷ ৮৯ সংখ্যক বাৰ্ষিক অধিবেশনৰ জিলা প্ৰস্তুতি সমিতিৰ সম্পাদক কুশল গগৈয়ে পুঁজি সংগ্ৰহকে ধৰি অধিৱেশনৰ অগ্ৰগতিৰ বিভিন্ন দিশ সমূহ সভাত দাঙি ধৰে।
