যোৰহাটত অসমীয়া যুৱকৰ উলংগ প্ৰতিবাদ : শেষ হৈ গ’ল নেকি প্ৰতিবাদৰ আন ভাষা?

কেন্দ্ৰীয় চৰকাৰে নাগৰিকত্ব সংশোধনী বিধেয়ক ২০১৬’ গৃহীত কৰাৰ প্ৰতিবাদত নতুন দিল্লীত অসমীয়া যুৱকৰ উলংগ প্ৰতিবাদে দেশজুৰি সৃষ্টি কৰা চাঞ্চল্য মাৰ নৌযাওঁতেই এইবাৰ যোৰহাটতো ঘটিল একেই ঘটনাৰ পুনৰাবৃত্তি।

অসমীয়াৰ আৱেগ-অনুভূতিৰ প্ৰতি উদাসীন কেন্দ্ৰীয় চৰকাৰে অসমীয়াৰ প্ৰতিবাদক গুৰুত্ব নিদি জোৰকৈ জাপি দিব বিচৰা বিধেয়কখনৰ বিৰুদ্ধাচৰণ কৰি ৰাজ্যখনত উলংগ হ’ল এগৰাকী অসমীয়া যুৱক।

শুকুৰবাৰে দিনৰ প্ৰায় ১২ বজাত জিলাৰ উপায়ুক্তৰ কাৰ্যালয়ৰ সন্মুখত যুৱকজনৰ এই উলংগ প্ৰতিবাদে প্ৰশাসনক অস্থিৰ কৰি তোলা দেখা যায়।

বিধেয়কখনৰ বিৰুদ্ধে চলি থকা ধাৰাবাহিক প্ৰতিবাদী আন্দোলনৰ বাবে যোৰহাট প্ৰশাসন সতৰ্ক হৈ আছিল যদিও এনেধৰণৰ প্ৰতিবাদ  সন্দৰ্ভত কোনো ধাৰমা নাছিল। যুৱকজনৰ এনে প্ৰতিবাদে স্বাভাৱিকতে প্ৰশাসনত অথন্তৰ সৃষ্টি কৰে। প্ৰশাসনৰ অৱস্থাৰ সুযোগ লৈ যুৱকজনে তেওঁৰ প্ৰতিবাদ সম্পূৰ্ণ কৰি তোলে।

আনহাতে, প্ৰতিবাদ সাব্যস্ত কৰা মণ্টু দত্ত নামৰ যুৱকজনে চৰকাৰখনেই জাতিধ্বংসী কাৰ্যকলাপত জড়িত হোৱাটো জাতিটোৰ বাবে চৰম দুৰ্ভাগ্যজনক বুলি অভিহিত কৰে। গণতান্ত্ৰিক প্ৰতিবাদক মষিমূৰ কৰি জনসাধাৰণে নিবিচৰা সিদ্ধান্ত  জাপি দিয়াৰ প্ৰৱণতাৰ বাবেই একাংশ যুৱক আলফালৈ আকৰ্ষিত হৈছে বুলিও যুৱকজনে মন্তব্য কৰে।

দেখা গৈছে যে গণতান্ত্ৰিক আন্দোলনৰ প্ৰতি চৰকাৰে গুৰুত্ব নিদিয়াৰ বাবে অসমৰ যুৱ সমাজে চৰম প্ৰতিবাদৰ ভাষা হিচাপে উলংগ হৈ প্ৰতিবাদ কৰাৰ দৰে জংগী সিদ্ধান্ত গ্ৰহণ কৰিবলগীয়া হৈছে। কিন্তু প্ৰশ্ন হৈছে, সঁচাকৈয়ে গণতান্ত্ৰিক আন্দোলনৰ সকলো বিকল্প শেষ হৈ গৈছে নে? চৰকাৰে এনে প্ৰতিবাদ সৃষ্টিৰ আঁৰৰ কাৰণবোৰ গমি চোৱা দৰকাৰ বুলিও সচেতন মহলে মত প্ৰকাশ কৰিছে।