যোৰহাটৰ এজন যুৱকৰ নিৰুদ্দেশক লৈ সৃষ্টি হৈছে তীব্ৰ চাঞ্চল্য। ৰাজদীপ দাস নামৰ যুৱকজনৰ আলফা (স্বাধীন)ত যোগদান কৰাৰ সন্দেহ প্ৰকাশ কৰিছে আৰক্ষীয়ে। যোৰহাটৰ পানীচকুৱাৰ অষ্টম মাইলৰ বাসিন্দা ভাগ্য দাস আৰু বীণা দাসৰ কনিষ্ঠ পুত্ৰ ৰাজদীপ। পুত্ৰৰ সন্ধান নোপোৱাত এতিয়া দিশহাৰা হৈ পৰিছে পৰিয়ালটো। আনহাতে, আলফা (স্বাধীন)ৰ মুৰব্বী পৰেশ বৰুৱাক পুত্ৰৰ নিৰাপদ উভতি অহাৰ ব্যৱস্থা কৰিবলৈ কাতৰ আহ্বান জনাইছে মাতৃ বীণা দাসে।
পৰিয়ালৰ লোকৰ ভাষ্য অনুসৰি, যোৱা ৭ ছেপ্টেম্বৰত ঘৰৰ পৰা ওলাই গৈছিল ৰাজদীপ। তিনিচুকীয়াৰ এখন ৰেষ্টুৰেণ্টত চাকৰি লাভ কৰা বুলি পিতৃ-মাতৃক জনাইছিল তেওঁ। ইয়াৰ পূৰ্বে যোৰহাটৰ কেইবাখনো ৰেষ্টুৰেণ্টত কাম কৰিছিল ৰাজদীপে। নতুন চাকৰিত যোগদান কৰাৰ উদ্দেশ্যে চুবুৰীয়া জিলাখনলৈ যোৱাৰ কথা পৰিয়ালক জনাই ঘৰৰ পৰা ওলাইছিল যুৱকজন। যাত্ৰাৰ খৰচৰ বাবে মাতৃৰ পৰা ৭০০ টকাও লৈছিল তেওঁ। তাৰ পিছত তিনিচুকীয়াগামী এখন বাছেৰে যাত্ৰা আৰম্ভ কৰিছিল ৰাজদীপে।
মাতৃ বীণা দাসে জানিবলৈ দিয়া মতে, সেইদিনা সন্ধিয়া ৰাজদীপ তিনিচুকীয়া পোৱাৰ পিছত তেওঁৰ সৈতে ফোনযোগে কথা পাতিছিল। কিন্তু পিছদিনা পুৱা হঠাৎ সলনি হয় পৰিস্থিতি। ৰাজদীপে ককায়েকলৈ ফোন কৰি বহু দূৰলৈ যোৱাৰ কথা জনায়। লগতে নিজৰ ম’বাইল ফোনটো বন্ধ কৰি ৰখাৰ কথাও অৱগত কৰে। সেই ফোনকলৰ পিছৰে পৰা ৰাজদীপৰ সৈতে পৰিয়ালৰ কোনো যোগাযোগ স্থাপন হোৱা নাই। আজিও সন্ধানহীন হৈ আছে যুৱকজন।
পুত্ৰৰ কোনো সন্ধান নোপোৱাত অৱশেষত পৰিয়ালটোৱে পুলিবৰ আৰক্ষী থানাত নিৰুদ্দেশ সম্পৰ্কীয় অভিযোগ দাখিল কৰে। আৰক্ষীয়ে গোচৰ ৰুজু কৰি যুৱকজনৰ সন্ধানত তদন্ত আৰম্ভ কৰে। আৰক্ষীৰ সূত্ৰৰ তথ্য অনুসৰি, তদন্তৰ সময়ত নাগালেণ্ডৰ মন জিলাৰ সৈতে ৰাজদীপৰ সম্ভাৱ্য যাতায়াতৰ সম্পৰ্ক লাভ কৰিছে তদন্তকাৰী দলে। ৰাজদীপৰ ম’বাইল ফোনত কেইবাটাও সন্দেহজনক ফোন নম্বৰৰ তথ্য লাভ কৰাৰ কথাও প্ৰকাশ পাইছে।
আৰক্ষীৰ তদন্তত ৰাজদীপে নিষিদ্ধ উগ্ৰপন্থী সংগঠন আলফা (স্বাধীন)ত যোগদানৰ উদ্দেশ্যে যাত্ৰা কৰা হ’ব পাৰে বুলি সন্দেহ প্ৰকাশ কৰা হৈছে। অৱশ্যে সংগঠনটোৰ সৈতে তেওঁৰ সম্পৰ্কৰ কোনো আনুষ্ঠানিক নিশ্চয়তা এতিয়ালৈকে পোৱা হোৱা নাই। যুৱকজনৰ বৰ্তমানৰ অৱস্থান সম্পৰ্কেও স্পষ্ট তথ্য লাভ কৰা হোৱা নাই।
এফালে পুত্ৰৰ কোনো খবৰ নাপাই উদ্বিগ্ন হৈ পৰিছে পৰিয়াল, আনফালে এগৰাকী মাতৃয়ে এতিয়া কেৱল পুত্ৰৰ নিৰাপদ উভতি অহাৰ বাট চাইছে। পৰেশ বৰুৱাৰ প্ৰতি মাতৃ বীণা দাসৰ কাতৰ আহ্বান—তেওঁৰ পুত্ৰক যাতে সুকলমে ঘৰলৈ উভতি অহাৰ সুযোগ দিয়া হয়। ৰাজদীপ ক’ত আছে, কিয় ঘৰ এৰি গ’ল আৰু প্ৰকৃততে তেওঁৰ সৈতে কি ঘটিছে, সেই সকলো প্ৰশ্নৰ উত্তৰ এতিয়া আৰক্ষীৰ তদন্তৰ ওপৰত নিৰ্ভৰ কৰিছে।
