অভিযোগনামা দাখিলৰ পিছত আজি, মঙলবাৰ ১৬ ডিচেম্বৰত কামৰূপ (মেট্ৰ’)ৰ মুখ্য ন্যায়িক দণ্ডাধীশৰ আদালতত জুবিন গাৰ্গৰ হত্যা গোচৰৰ প্ৰথমটো শুনানি অনুষ্ঠিত হৈছে। তথ্য-প্ৰমাণসহ ১২ হাজাৰ পৃষ্ঠাৰ বিশাল চাৰ্জশ্বীট দাখিল কৰাৰ পিছত আজিৰ এই শুনানিৰ ওপৰত ৰাজ্যবাসীৰ দৃষ্টি নিৱদ্ধ হৈ আছে।
গোচৰটোৰ সাতজন অভিযুক্তক নিৰাপত্তাজনিত কাৰণত সোঁশৰীৰে গুৱাহাটীৰ আদালতলৈ অনা হোৱা নাই। চৰকাৰী পক্ষৰ অধিবক্তা প্ৰদীপ কোঁৱৰৰ আৱেদন গ্ৰহণ কৰি আদালতে তেওঁলোকক ভাৰ্চুৱেলী (ভিডিঅ’ কনফাৰেন্সিঙৰ জৰিয়তে) হাজিৰ কৰোৱাৰ নিৰ্দেশ দিছে।
এই গোচৰৰ মূল অভিযুক্তসকল হৈছে ক্ৰমে উৎসৱৰ আয়োজক শ্যামকানু মহন্ত, মেনেজাৰ সিদ্ধাৰ্থ শৰ্মা, ভাতৃ সন্দিপন গাৰ্গ, ঢোলবাদক শেখৰজ্যোতি গোস্বামী, সহ-গায়ক অমৃতপ্ৰভা মহন্ত, আৰু জুবিন গাৰ্গৰ দুই পিএছঅ’ নন্দেশ্বৰ বৰা আৰু পৰেশ বৈশ্য।
আজিৰ শুনানিত অভিযুক্তসকলৰ কোনো বিশেষ মতামত গ্ৰহণ কৰা নহ‘ব। ন্যায়াধীশে কেৱল তেওঁলোকৰ স্বাস্থ্যজনিত দিশবোৰহে নিৰীক্ষণ কৰিব বুলি জানিব পৰা গৈছে।
আদালতে চিআইডিক আৰক্ষীৰ জৰিয়তে অভিযুক্তক চাৰ্জশ্বীটৰ কপি তেওঁলোকৰ নিজ নিজ সংশোধনী গৃহত প্ৰদান কৰিবলৈ নিৰ্দেশ দিছে। সূত্ৰ অনুসৰি আজিয়েই গোচৰৰ পৰৱৰ্তী শুনানিৰ তাৰিখ নিৰ্ধাৰণ কৰা হ‘ব, লগতে অভিযুক্তক সোঁ-শৰীৰে হাজিৰ কৰোৱাৰ সন্দৰ্ভতো সিদ্ধান্ত লোৱা হ’ব।
অভিযোগনামাত উল্লেখ থকা তথ্য অনুসৰি, ধনৰ হিচাপৰ খেলিমেলিৰ বাবেই জুবিন গাৰ্গক হত্যা কৰা হৈছিল বুলি সন্দেহ কৰা হৈছে। কাৰণ বছৰি ৪.৮০ কোটি টকা উপাৰ্জন কৰা জুবিন গাৰ্গৰ একাউণ্টত মাত্ৰ ১০ লাখ টকা জমা আছিল। তেওঁ ১০ অক্টোবৰত মেনেজাৰ সিদ্ধাৰ্থ শৰ্মাৰ পৰা এই ধনৰ হিচাপ ল’বলৈ বহাৰ কথা আছিল। কিন্তু ধনৰ আলোচনাৰ পূৰ্বে ১৯ ছেপ্টেম্বৰত ৰহস্যজনকভাৱে শিল্পীগৰাকীয়ে মৃত্যুক সাৱটি লয়।
গুৱাহাটী উকীল সন্থাই অভিযুক্তৰ হৈ ওকালতি নকৰাৰ সিদ্ধান্তত অটল থকাৰ বাবে, অভিযুক্তৰ হৈ জিলা আইন সেৱা প্ৰাধিকাৰণৰ জৰিয়তে অধিবক্তা নিযুক্তি দিয়া হৈছে। অৱশ্যে, অভিযুক্তৰ পৰিয়ালে নিজাববীয়া অধিবক্তা নিযুক্তিৰ চেষ্টা অব্যাহত ৰাখিছে।
