ৰাজ্যিক স্বাস্থ্য মন্ত্ৰী পিযুষ হাজৰিকাই আজি এদিনিয়া ভ্ৰমণসূচীৰে গোৱালপাৰা জিলাৰ ৰংজুলিত উপস্থিত হয়। মন্ত্ৰী গৰাকীয়ে অঞ্চলটোত জাপানীজ এনকেফেলাইটিছ ৰোগৰ প্ৰাদুৰ্ভাৱ সম্পৰ্কে বুজ লোৱাৰ উদ্দেশ্যে আজি দুপৰীয়া ৰংজুলি স্বাস্থ্য কেন্দ্ৰ পৰিদৰ্শণ কৰে।
‘জাপানীজ এনকেফেলাইটিছ ৰোগ ৰোধ কৰিবলৈ অসমৰ স্বাস্থ্য বিভাগে সৰ্বশক্তি প্ৰয়োগ কৰিব’ বুলি উল্লেখ কৰি তেওঁ কয় যে স্বাস্থ্যকৰ্মী সকলে গাঁৱে গাঁৱে, ঘৰে ঘৰে গৈ তেজৰ নমুনা সংগ্ৰহ কৰিব লাগিব। এইক্ষেত্ৰত তেওঁ সমগ্ৰ অসমত সকলো ৰোগীৰ তেজ পৰীক্ষা ক্ষীপ্ৰ কৰাত গুৰুত্ব আৰোপ কৰে।
আনহাতে চিকিসৎকসকলে ৰোগীক প্ৰেচক্ৰিপচনত ঔষধৰ ব্ৰেণ্ড লিখি দিয়াৰ বিৰুদ্ধে মন্ত্ৰী পিযুষ হাজৰিকা সৰৱ হৈ উঠে। এতিয়াৰ পৰা কোনো ডাক্তৰে ঔষধৰ ব্ৰেণ্ড লিখি দিলে সেই প্ৰেচক্ৰিপচন চৰকাৰী ফাৰ্মাচিষ্টে গ্ৰহণ কৰিব নোৱাৰিব বুলি তেওঁ কয়। তেনে প্ৰেচক্ৰিপচন গ্ৰহণ কৰিলে ফাৰ্মাচিষ্টসকল জগৰীয়া হ’ব বুলিও তেওঁ সকীয়াই দিয়ে।
ইফালে আজি চিকিৎসালয়খনৰ একাংশ ৰোগীয়ে হস্পিতাল কৰ্তৃপক্ষই মন্ত্ৰী অহা বাবেহে ৰোগীৰ বিচনাত বিচনা চাদৰ আদি পাৰি দিয়া বুলি কৈ অন্য দিনা খুজিলেও ৰোগীক কাপোৰ নিদিয়ে বুলি অভিযোগ কৰে।
