মহাকাশৰ ৰহস্যৰ প্ৰতি আকৰ্ষণ থকাসকলৰ বাবে এক সুৱৰ্ণ সুযোগ। কিয়নো ৪০০বছৰ পাছত শনি আৰু বৃহস্পতি গ্ৰহ দুটা আজি আটাইতকৈ ওচৰা-ওচৰি হ’ব।
গ্ৰহ দুটা ইমানেই কাষ চাপি আহিব যে পৃথিৱীৰ পৰা ইয়াক খালী চকুৰে দেখা পোৱা যাব। খ্ৰীষ্টমাছৰ পূৰ্বেই এই দৃশ্য দেখা পোৱা যাব।
বাতৰি অনুসৰি, আজি ২১ ডিচেম্বৰৰ নিশা আকাশত সৌৰজগতৰ এই মহাজাগতিক বিৰল দৃশ্য দেখা পোৱা যাব।
বিজ্ঞানীসকলৰ মতে আজি ভাৰতত সন্ধিয়া ৬-৩০ বজাৰ পৰা ৭-৩০ বজাৰ ভিতৰত দক্ষিণ-পশ্চিম আকাশত এই বিৰল দৃশ্য দেখা যাব।
গ্ৰহ দুটা ইমান কাষলৈ আহি অৱস্থান কৰিব যে পৃথিৱীৰ বিভিন্ন স্থানৰ পৰা ইয়াক এটা যমজ গ্ৰহ যেন দেখা যাব।
ডিচেম্বৰৰ ১৬ৰ পৰা ২৫তাৰিখলৈ গ্ৰহ দুটা ওচৰা ওচৰিকৈ আছে যদিও আজিৰ দিনটোত শনি আৰু বৃহস্পতি একেবাৰে কাষত অৱস্থান কৰিব।
বিজ্ঞানীসকলৰ মতে এই ধৰণৰ ঘটনাক কনজাংকশ্যন বুলি কোৱা হয়। বিশ্বাস অনুসৰি, ২১ ডিচেম্বৰৰ এই ঘটনা ষ্টাৰ অফ বেথেলহাম বা খ্ৰীষ্টমাছ ষ্টাৰ হিচাপে দেখা দিব।
১৬২৩ খ্ৰীষ্টাব্দৰ পাছত এইবাৰ প্ৰথমবাৰৰ বাবে শনি আৰু বৃহস্পতি গ্ৰহক ইমান ওচৰাওচৰিকৈ অৱস্থান কৰা দেখা যাব।
বিজ্ঞানীসকলে জানিবলৈ দিয়া মতে এনেধৰণৰ ঘটনা আৰু পুনৰ ২০৮০চনৰ ১৫ মাৰ্চতহে দেখা পোৱা যাব।
শেহতীয়া এক বাতৰি অনুসৰি, দেওবাৰে হেমিলটনৰ ছেদান পাৰ্কত নিউজিলেণ্ড-পাকিস্তানৰ মাজত চলি থকা টী-২০ মেচৰ সময়ত এগৰাকী কেমেৰামেনে এই গ্ৰহ দুটাক একেটা ফ্ৰেমতে বন্দী কৰিবলৈ সক্ষম হৈছে।
অৱশ্যে, ইয়াত দুয়োটা গ্ৰহই কিছু দূৰত অৱস্থান কৰি থকা দেখা গৈছে।