ব্ৰিটিছ সংসদত ভাৰতৰ কৃষক বিদ্ৰোহক লৈ বিতৰ্ক অনুষ্ঠান হোৱাৰ বিষয়টো চৰ্চিত হৈ পৰিছে।
সোমবাৰে সংসদত ব্ৰিটেইনৰ লেবাৰ পাৰ্টি, কনজাৰ্ভেটিভ পাৰ্টি, লিবাৰেল ডেম’ক্ৰেটিক পাৰ্টি আৰু স্কটিছ নেচলনেল পাৰ্টিয়ে ভাৰতৰ কৃষক বিদ্ৰোহৰ বিষয়ে দেশখনৰ প্ৰধানমন্ত্ৰী বৰিছ জনচনৰ দৃষ্টি গোচৰ কৰে।
ইয়াৰ পাছতে ভাৰত চৰকাৰে প্ৰতিক্ৰিয়াস্বৰূপে তীব্ৰ অসন্তুষ্টি প্ৰকাশ কৰিছে।
ভাৰতৰ বৈদেশিক সচিব হর্ষ শৃংলাই কয় যে ব্ৰিটিছ সংসদে ভাৰতৰ আভ্যন্তৰীণ বিষয়ত হস্তক্ষেপ কৰিছে।
লণ্ডনৰ ‘দ্যা ইণ্ডিয়ান মিছনে’ ব্ৰিটিছ সংসদৰ এই বিতৰ্ক অনুষ্ঠানটোক একপক্ষীয় বুলি কৈছে।
কিন্তু কংগ্ৰেছ নেতা শশী থাৰুৰে বুধবাৰে কয় যে এখন গণতান্ত্ৰিক দেশৰ সংসদত আন এখন দেশৰ আভ্যন্তৰীণ বিষয়ক লৈ আলোচনা- বিতৰ্ক কৰাটো গতানুগতিক কথা।
নেতাজনে কয় যে আমি ভাৰতত যিদৰে পেলেষ্টাইনৰ বিষয় লৈ আলোচনা-বিতৰ্ক কৰো, ঠিক সেইদৰে ব্ৰিটিছ সংসদেও ভাৰতৰ বিষয় লৈ অনুষ্ঠান কৰিছে।
নেতাজনে কয় যে গণতান্ত্ৰিক ব্যৱস্থা এটাত বিষয়টো কোনো আশ্বৰ্যজনক নহয় আৰু ইয়াক সহজভাৱে ল’ব লাগে।
