আছুৱে নোৱাৰিলে! ৰাজনৈতিক বিকল্পৰ বাবে সাজু কলিতা জনগোষ্ঠীয় ছাত্ৰ সন্থা

কিছুদিন আগলৈকে সদৌ অসম ছাত্ৰ সন্থাৰ নেতৃত্বত ৰাজনৈতিক বিকল্প শক্তিৰ চৰ্চা চলি আছিল; কিন্তু এতিয়া সেই চৰ্চা নোহোৱা হ’ল। তাৰ বিপৰীতে এক ৰাজনৈতিক বিকল্পৰ বাবে সাজু হৈ উঠিছে সদৌ অসম কলিতা জনগোষ্ঠীয় ছাত্ৰ সন্থা।

পহিলা ব’হাগৰ দিনটোতে কলিতা জনগোষ্ঠীয় ছাত্ৰ সন্থাৰ নেতৃত্বত আত্মপ্ৰকাশ ঘটিব এটা নতুন ৰাজনৈতিক দলৰ। নৰ্থ ইষ্ট নাওৰ সাংবাদিকক এই কথা জানিবলৈ দিয়ে কলিতা জনগোষ্ঠীয় ছাত্ৰ সন্থাৰ নেতৃত্বই।

‘কলিতা জনগোষ্ঠীয় ৰাইজে ইতিমধ্যে বিকল্প ৰাজনৈতিক চিন্তা চৰ্চা কৰিছে। কলিতা জনগোষ্ঠীয় ছাত্ৰ সন্থাৰ নেতৃত্বত কলিতা সংগ্ৰামী মঞ্চৰ সহযোগত এই বিষয়ত আলাপ আলোচনা কৰিছো। অহা পহিলা ব’হাগৰ দিনটোত নতুন এক ৰাজনৈতিক দল গঠন কৰাৰ সিদ্ধান্ত ইতিমধ্যে লোৱা হৈছে।‘ দিচপুৰ লাষ্টগেটত হোৱা এক প্ৰতিবাদত অংশগ্ৰহণ কৰি এইদৰে কয় ছাত্ৰ সংগঠনটোৰ সাধাৰণ সম্পাদক ভাস্কৰ কলিতাই।

ইতিমধ্যে কলিতা জনগোষ্ঠীয় বহুকেইগৰাকী লোকসভাৰ প্ৰাক্তন সাংসদ, প্ৰাক্তন ৰাজ্যসভাৰ সাংসদে তেওঁলোকৰ সৈতে নতুন ৰাজনৈতিক দল গঠন সন্দৰ্ভত যোগাযোগ অব্যাহত ৰাখিছে বুলি সাধাৰণ সম্পাদকগৰাকীয়ে জানিবলৈ দিয়ে।

‘অতি কম সময়ৰ ভিতৰত কলিতা জনগোষ্ঠীক ৰাজ্য চৰকাৰে কৰি অহা বঞ্চনা, প্ৰতাৰণাৰ বিৰুদ্ধে ৰাজনৈতিক চিন্তা চৰ্চাৰে ৰাইজৰ মাজত আত্মপ্ৰকাশ কৰিম। অসমত বসবাস কৰা বৃহত্তৰ অসমীয়া জাতি-জনগোষ্ঠীৰ লগতে নিজস্ব কলিতা কলিতা জনগোষ্ঠীৰ বাবেও চিন্তা চৰ্চা কৰি জনগোষ্ঠীটোৰ উত্তৰণৰ কাৰণে সংগ্ৰামৰে নহয়, ৰাজনৈতিক প্ৰক্ৰিয়াৰে আগবাঢ়িবলৈ প্ৰস্তুত হৈছো।‘ কলিতাই এইদৰে কয়।

আনহাতে, ২০২১ চনত মুঠ ৩২ টা বিধান সভাত নতুনকৈ গঠন হ’বলগীয়া ৰাজনৈতিক দলটোৱে প্ৰাৰ্থীত্ব আগবঢ়াব বুলি জানিবলৈ দিছে ছাত্ৰ সংগঠনটোৰ সভাপতি অনুপল দত্ত পাঠকে।

পাঠকে লগতে কয়, ‘আমাৰ জনগোষ্ঠীৰ ১৮ জন মন্ত্ৰী বিধায়ক বিধান সভাত আছে যদিও তেওঁলোকৰ শুই থকাৰ বাহিৰে কাম নাই। আমাৰ দুজন মন্ত্ৰী ভবেশ কলিতা, চন্দ্ৰমোহন পাটোৱাৰীয়ে কলিতা জনগোষ্ঠীৰ কোনো দাবীৰ প্ৰতি গুৰুত্ব নিদিয়ে। সেয়েহে আমি তেওঁলোকক প্ৰত্যাহ্বান জনাবলৈ সাজু আৰু তেওঁলোকৰ বিৰুদ্ধে আমি প্ৰাৰ্থী প্ৰক্ষেপ কৰিম।’ ‘

আনহাতে, আজি বিভিন্ন দাবী লৈ দিচপুৰ লাষ্টগেটত প্ৰতিবাদ সাব্যস্ত কৰে সংগঠনটোৱে।

তেওঁলোকৰ কেইটামান দাবী ক্ৰমে কলিতা ছাত্ৰ-ছাত্ৰীসকলৰ পঢ়াৰ ক্ষেত্ৰত ৫০ শতাংশ আসন সংৰক্ষণ, চৰকাৰী চাকৰিত ৫০ শতাংশ পদ সংৰক্ষণৰ ব্যৱস্থা, কলিতা জনগোষ্ঠীক জনজাতিকৰণ, প্ৰাগজ্যোতিষ নামেৰে কলিতা স্বায়ত্তশাসিত পৰিষদ গঠন, সুকীয়া উন্নয়ন পৰিষদ গঠন, অসম আন্দোলনৰ প্ৰথম শ্বহীদ খৰ্গেশ্বৰ তালুকদাৰৰ স্মৃতিত গুৱাহাটী আৰু দিল্লীত স্থায়ী অতিথিশালা নিৰ্মাণ, উন্নয়নৰ বাবে ২০০ কোটি টকাৰ পেকেজ ঘোষণা ইত্যাদি।