কামাখ্যাৰ মহা অম্বুবাচী মেলাক লৈ ব্যাপক প্ৰস্তুতিৰে সাজু হৈছে কামৰূপ মহানগৰ জিলা প্ৰশাসন।
বুধবাৰে উপায়ুক্ত কাৰ্য্যালয়ত সংবাদমেলযোগে প্ৰশাসন-আৰক্ষীয়ে প্ৰস্তুতি সম্পৰ্কে অৱগত কৰে। উপায়ুক্ত বিশ্বজিৎ পেগু আৰু যানবাহন শাখাৰ উপ আৰক্ষী আয়ুক্ত প্ৰশান্ত শইকীয়াই সংবাদমেল সম্বোধন কৰে।
- অম্বুবাচী মেলালৈ অহা ভক্তসকলৰ বাবে থাকিব ৬টা শিবিৰ। ৩টা শিবিৰ থাকিব ফাঁচী বজাৰ পুৰণি কাৰাগাৰ চৌহদত। বাকী পাণ্ডুত এটা, বৰিপাৰা তৰুণ সংঘত এটা আৰু কামাখ্যাৰ সমীপৰ নাহৰবাৰীত এটা।
- ৪০ হাজাৰতকৈ অধিক ভক্ত থাকিব পাৰিব উক্ত শিবিৰকেইটাত।
- ২৯টা খাদ্য ভাণ্ডাৰ আৰু ৪০টা পানী ভাণ্ডাৰ থাকিব। ব্যক্তিগত ভাণ্ডাৰৰ অনুমতি দিয়া হোৱা নাই। কাৰোবাৰ যদি খাদ্য বিতৰণ কৰিবলৈ ইচ্ছা থাকে তেনেহ’লে শিবিৰত গৈ খাদ্য বিতৰণ কৰিব পাৰিব।
- কামাখ্যা মন্দিৰৰ ওপৰলৈ যোৱা মূল পথকে ধৰি অন্য তিনিটা পথো ব্যৱহাৰ কৰিবলৈ দৰ্শনাৰ্থীক আহ্বান।
- বিভিন্ন শিবিৰত থকা ভক্তসকলক অনা-নিয়া কৰিবৰ বাবে ৮০খন বাহন পৰিবহণ নিগমৰ পৰা যোগান ধৰা হ’ব।
- মুঠ দুটা তথ্য কেন্দ্ৰ থাকিব। য’ত স্বাস্থ্য সেৱা তথা তথ্যৰ সকলো সুবিধা লাভ কৰিব পাৰিব ভক্তসকলে। তথ্য কেন্দ্ৰ দুটা কামাখ্যা ৰে’ল ষ্টে’চন আৰু কামাখ্যালৈ উঠি যোৱা মূল দুৱাৰৰ কাষত থাকিব।
- যানবাহন শাখাৰ উপ আৰক্ষী আয়ুক্ত প্ৰশান্ত শইকীয়াই কয়: ওপৰলৈ উঠিবৰ বাবে কোনো বাহনকে অনুমতি দিয়া নহয়। বৃদ্ধ-বৃদ্ধা, গৰ্ভৱতী মহিলা, কেঁচুৱা থকা মহিলা আৰু প্ৰতিবন্ধীসকলৰ বাবে ৪০খন ফেৰি কাৰৰ ব্যৱস্থা কৰা হ’ব। ৰাতিপুৱা ৬ বজাৰ পৰা নিশা ১০ বজালৈকে চলিব এই ফেৰি কাৰসমূহ।
- দূৰণিবটীয়া বাহনসমূহ জালুকবাৰীৰ পৰা মহানগৰলৈ প্ৰৱেশ কৰিব নোৱাৰিব। তাৰ বিপৰীতে ISBTত বাহনসমূহ পাৰ্কিং কৰিব পাৰিব।
- দিনেশ গোস্বামী পথত ভৰলুৰ পৰা জালুকবাৰীলৈকে বস্তু কঢ়িওৱা বাহনকে আদি কৰি অন্য কোনো ধৰণৰ বাহন চলাচল কৰিব নোৱাৰিব।বিমানবন্দৰলৈ যোৱা বাহনসমূহকো অন্য পথেৰে যাবৰ বাবে অনুৰোধ যানবাহন শাখাৰ উপ আৰক্ষী আয়ুক্তৰ।
- ভৰলুমুখ থানাৰ কাষত থাকিব পাৰ্কিঙৰ ব্যৱস্থা।
- মুঠ ২৫০জন ট্ৰেফিক পুলিচ নিয়োগ কৰা হৈছে অম্বুবাচী মেলাত।