প্ৰধান মন্ত্ৰী নৰেন্দ্ৰ মোদীক ক্ষুৰধাৰ সমালোচনা কৰি বিজেপি চৰকাৰৰ নীতিৰ বিৰুদ্ধে পুনৰ সৰৱ হ’ল বহুচৰ্চিত বাওঁপন্থী যুৱনেতা কানহায়া কুমাৰ।
শনিবাৰে গুৱাহাটীৰ পাণবাজাৰ ডনবস্ক’ স্কুলত ইনছাইড এন ই নিউজ প’ৰ্টেলৰ উদ্যোগত অনুষ্ঠিত ‘ইনছাইড এন ই য়ুথ কনক্লে’ভ’ অনুষ্ঠানত ভাগ লৈ যুৱনেতাজনে ‘Campus politics effecting national politics’ শীৰ্ষক বক্তৃতা আগ বঢ়ায়।
ৰাফেল বিমান ক্ৰয়ৰ কেলেংকাৰি সন্দৰ্ভেৰে ভাষণ আৰম্ভ কৰা কানহায়া কুমাৰে প্ৰধান মন্ত্ৰী নৰেন্দ্ৰ মোদীক কটাক্ষ কৰি কয়, “ৰাফেল ডীলৰ প্ৰসংগটো চৰকাৰে যিমানেই লুকুৱাই ৰাখিবলৈ চেষ্টা কৰিলে, সিমানেই ৰাইজৰ মনত বিভিন্ন প্ৰশ্নৰ অৱতাৰণা হ’ল। যাৰ বাবে চৰকাৰে বাৰে বাৰে মন্তব্য সলাব লগীয়া হ’ল। ৰাফেলৰ দাম চৰকাৰক সোধাত সেয়া প্ৰকাশ নকৰিলে। প্ৰধান মন্ত্ৰীয়ে এল ই ডি বাল্বৰ দাম ৰাইজক কৈ থাকে, কিন্তু ৰাফেল বিমানৰ দাম ক’ব নোৱাৰে।”
তেওঁ কয়, “ৰাফেল বিমান সন্দৰ্ভত এটা কথা লুকুৱাবলৈ চেষ্টা কৰোতে আনটো প্ৰশ্ন আহি গ’ল।”
“ৰাফেল বিমান নিৰ্মাণৰ কাম ৰিলায়েন্সকহে কিয় দিয়া হ’ল?” কানহায়া কুমাৰে কয়।
কুমাৰে হিন্দুস্তান এৰ’নটিকেল লিমিটেডৰ বিষয়া আৰু ফ্ৰান্সৰ প্ৰাক্তন ৰাষ্ট্ৰপতি ফ্ৰান্সোৱা অলেণ্ডো (François Hollande)ৰ ৰাফেল ডীল সন্দৰ্ভত কৰা মন্তব্যৰ উদ্ধৃতিৰে বিজেপি চৰকাৰে লুকুৱাই ৰখা সকলো কথা প্ৰকাশ পোৱা বুলি মন্তব্য কৰে।
ভাষণত কানহায়া কুমাৰে বিজেপি চৰকাৰে পুঁজিপতিৰ স্বাৰ্থত কাম কৰি থকা বুলি মন্তব্য কৰি ব্যক্তিগতকৰণৰ নামত এটা এটা চৰকাৰী সম্পত্তি ধ্বংসৰ মুখলৈ ঠেলি দিয়া বুলি মন্তব্য কৰে।
তেওঁ কয়, “প্ৰধান মন্ত্ৰীৰ হাঁহি থকা চেহেৰাটো ৰিলায়েন্সৰ পে’ট্ৰল পাম্পত দেখা যায়, জিঅ’ৰ প্ৰচাৰত দেখা যায়, কিন্তু বি এছ এন এলৰ প্ৰচাৰত দেখা নাযায়। মই শুধিব বিচাৰো আপুনি কাৰ প্ৰধান মন্ত্ৰী? আপুনি চৰকাৰী প্ৰধান মন্ত্ৰী নে আপোনাৰো ব্যক্তিগতকৰণ হৈ গ’ল?”
দেশৰ জনসাধাৰণক শোষণ কৰি চৰকাৰে পুঁজিপতিৰ মুনাফা আদায়ত সহায় কৰি থকা বুলিও কুমাৰে মন্তব্য কৰে।
ভাষণৰ আৰম্ভণিতেই প্ৰধান মন্ত্ৰী মোদী নেতৃত্বাধীন বিজেপি চৰকাৰৰ দিনত সাধাৰণ ৰাইজৰ চৰকাৰৰ বিৰুদ্ধে কথা কোৱাৰ অধিকাৰেই নোহোৱা কৰি পেলাইছে বুলি কানহায়া কুমাৰে মন্তব্য কৰে।
“মই কিবা ক’লে কিছুমান মানুহৰ কি হয় মই ক’ব নোৱাৰো। যিয়ে না মোৰ কথা শুনিব খোজে, না মোক কিবা ক’ব দিয়ে? কিন্তু তেওঁলোকে মোৰ কথা শুনিব নালাগে, অন্ততঃ প্ৰধান মন্ত্ৰীৰ কথাতো শুনক। প্ৰধান মন্ত্ৰীয়ে কৈছে ‘ডিজিটেল ইণ্ডিয়া’। এতিয়া কওক ‘ডিজিটেল ইণ্ডিয়া’ৰ দিনত কাৰোবাক কথা কোৱাৰ পৰা বন্ধ কৰি ৰাখিব পাৰি নেকি? মোৰ মুখ যিমানেই বন্ধ কৰি ৰাখিবলৈ চেষ্টা নকৰক কিয় মই সিমানেই কৈ থাকিম।”
ভাষণত বিজেপিৰ ৰাষ্ট্ৰীয় সভাপতি অমিত শ্বাহৰ বিৰুদ্ধেও সৰৱ হয় কানহায়া কুমাৰ।
“অমিত শ্বাহ কোন? তেওঁ কেনেকৈ ক’ব পাৰে ‘আমি ৫০ বছৰ ভাৰতত ৰাজ কৰিম?’ এতিয়া আকবৰৰ শাসন চলি আছে নেকি? ৰাজতন্ত্ৰতহে ৰজাই ৰাজত্ব কৰি থাকিব পাৰে”, কানহায়া কুমাৰে কয়।
তেওঁ লগতে অমিত শ্বাহৰ এই কথাৰ দ্বাৰা বিজেপিৰ গণতন্ত্ৰত ভৰসা নোহাৱা কথাটো প্ৰতিফলিত কৰিছে বুলি কয়। বৰ্তমান ভাৰতত গণতান্ত্ৰিক ব্যৱস্থাটোৱেই বিপদাপন্ন হোৱা বুলিও তেওঁ কয়।
ইয়াৰ উপৰি কানহায়া কুমাৰে প্ৰধান মন্ত্ৰী নৰেন্দ্ৰ মোদীয়ে লালকিল্লাত থিয় হৈও মিছা কথা কয় বুলি মন্তব্য কৰে। তেওঁ কয় যে বিমুদ্ৰাকৰণ বিফল হ’ল, জি এছ টিৰ কথা কৈ লাভেই নাই। জি এছ টিয়ে সৰুসুৰা ব্যৱসায়ীৰ মূৰত মাধমাৰ শোধালে বুলিও তেওঁ মন্তব্য কৰে।
“মোদীয়ে কোৱা ২ কোটি ৰোজগাৰ ক’লৈ গ’ল? ক’লাধন ক’লৈ গ’ল?” বুলিও কানহায়া কুমাৰে প্ৰশ্ন উত্থাপন কৰে।
ইপিনে, বিজেপি চৰকাৰে এতিয়া কৃষকৰ বাবে বিভিন্ন আঁচনি লৈছে কিন্তু কিমান কৃষকে আত্মহত্যা কৰিব লগীয়া হৈছে তাৰহে কোনো হিচাপ তেওঁলোকৰ ওচৰত নাই বুলিও কুমাৰে চৰকাৰৰ কটাক্ষ কৰে।
ভাষণ প্ৰসংগত একাংশ বিজেপি নেতাই হিন্দু ধৰ্মৰ নামত অন্ধবিশ্বাসৰ প্ৰশ্ৰয় দিয়া বুলিও তেওঁ মন্তব্য কৰে। ধৰ্মৰ নামত কিছুমান অন্ধবিশ্বাসেৰে তেওঁলোকে প্ৰকৃততে হিন্দু ধৰ্মক অপমান কৰি আছে বুলিও তেওঁ ভাষণ প্ৰসংগত উল্লেখ কৰে।
তেওঁ কয়, “হিন্দু ধৰ্ম বিপদাপন্ন হোৱা নাই, এই দেশত বৰ্তমান প্ৰকৃততে গণতন্ত্ৰ, বিজ্ঞান, গণিত, তৰ্ক, মানৱতা, সমতা, ইতিহাস, ভূগোল, সংস্কৃতি আদিহে বিপদাপন্ন হৈ আছে। কোনো বিষয় লৈ আলোচনা, সমালোচনা, তৰ্ক ইত্যাদিৰ বিৰোধিতা কৰাটো আমাৰ দেশৰ সংস্কৃতি নাছিল। ইতিহাসেই এই কথাৰ প্ৰমাণ দিয়ে।”
কানহায়া কুমাৰৰ ভাষণৰ পাছতেই তেওঁ ছাত্ৰ-ছাত্ৰী আৰু উপস্থিত ৰাইজৰ লগতো মত বিনিময় কৰে।
আনহাতে, কেইজনমান লোকে কানহায়া কুমাৰৰ মত বিনিময় অনুষ্ঠানৰ মাজতেই বিভিন্ন প্ৰশ্নৰে তেওঁক ব্যতিব্যস্ত কৰিবলৈ চেষ্টা কৰে। ইয়াক কেন্দ্ৰ কৰি অনুষ্ঠানৰ মাজতেই কিছু উত্তপ্ত পৰিস্থিতিৰো সৃষ্টি হয়। অৱশ্যে উদ্যোক্তা আৰু আৰক্ষীৰ তৎপৰতাত পৰিস্থিতি নিয়ন্ত্ৰণত থাকে।
