কাৰ্বি আংলঙ জিলাৰ এক দুৰ্গম বনাঞ্চলত নিৰ্বাচনী দায়িত্বত থকা অৱস্থাত দহ দিন পূৰ্বে নিৰুদ্দেশ হোৱা এগৰাকী পলিং বিষয়াৰ পচি যোৱা মৃতদেহ দেওবাৰে উদ্ধাৰ কৰা হৈছে। মৃত শিক্ষকগৰাকীক ৪৯ বৰ্ষীয় কৰ্নেলিয়াছ কিন্ডো বুলি চিনাক্ত কৰা হৈছে। নিহত শিক্ষকগৰাকীয়ে ৯ এপ্ৰিলত নিৰ্বাচনৰ দিনা সংবেদনশীল নিৰ্বাচনী দায়িত্বত নিয়োজিত হৈ থকাৰ সময়তে হঠাতে অসুস্থ হৈ পৰাৰ পাছত নিৰুদ্দেশ হৈছিল।
ঘটনাক্ৰম অনুসৰি, কিন্ডোৱে হাউৰাঘাট বিধানসভা সমষ্টিৰ অন্তৰ্গত চাৰপ’ কাথাৰ প্ৰাথমিক বিদ্যালয়ৰ ভোটকেন্দ্ৰত তৃতীয় পলিং বিষয়া হিচাপে দায়িত্ব পালন কৰি আছিল। কৰ্তব্যৰত অৱস্থাত তেওঁ নিজৰ শাৰীৰিক অসুস্থতাৰ কথা সহকৰ্মীসকলক অৱগত কৰিছিল আৰু তাৰ পিছৰ পৰাই তেওঁ নিৰুদ্দেশ হৈ পৰে। এই সন্দৰ্ভত ৰংৱং আৰক্ষী থানাত এক নিৰুদ্দেশৰ গোচৰো পঞ্জীয়ন কৰা হৈছিল। আৰক্ষীয়ে ড্ৰোণৰ সহায়ত চলোৱা দীঘলীয়া অভিযানৰ পিছতো তেওঁক বিচাৰি উলিয়াবলৈ সক্ষম হোৱা নাছিল।
দেওবাৰে ৰংৱঙৰ সমীপৱৰ্তী এক গভীৰ বনাঞ্চলত কাঠ সংগ্ৰহ কৰিবলৈ যোৱা স্থানীয় লোকৰ এটা দলে মৃতদেহটো প্ৰত্যক্ষ কৰি আৰক্ষীক খবৰ দিয়ে। আৰক্ষীৰ দল ঘটনাস্থলীত উপস্থিত হৈ মৃতদেহটো উদ্ধাৰ কৰাৰ লগতে শিক্ষা বিভাগৰ বিষয়াসকলৰ জৰিয়তে মৃতদেহটো চিনাক্ত কৰে। কাৰ্বি আংলঙৰ জ্যেষ্ঠ আৰক্ষী অধীক্ষক পুষ্পৰাজ সিঙে জনোৱা মতে, প্ৰাথমিক তদন্তৰ ভিত্তিত কিন্ডো কোনো স্নায়ুজনিত সমস্যাত ভুগি আছিল বুলি ধাৰণা কৰা হৈছে। সম্ভৱতঃ অসুস্থতাৰ বাবেই তেওঁ হাবিৰ ফালে গৈ জ্ঞান হেৰুৱাই পেলাইছিল। আৰক্ষীৰ মতে, বৰ্তমানলৈকে এই ঘটনাত কোনো অপৰাধমূলক কাৰ্যকলাপৰ ইংগিত পোৱা হোৱা নাই।
মৃতদেহটো পচি যোৱাৰ বাবে মৰণোত্তৰ পৰীক্ষাৰ প্ৰতিবেদন অহাৰ পাছতহে মৃত্যুৰ প্ৰকৃত কাৰণ স্পষ্ট হ’ব বুলি আৰক্ষীয়ে প্ৰকাশ কৰিছে। পৰিয়ালৰ লোকক অৱগত কৰাৰ লগতে ঘটনাৰ সম্পূৰ্ণ তদন্ত প্ৰক্ৰিয়া অব্যাহত ৰখা হৈছে বুলিও আৰক্ষীয়ে জানিবলৈ দিয়ে। আনহাতে, নিৰ্বাচনী ডিউটিত নিয়োজিত এজন কৰ্মচাৰী এনেদৰে নিৰুদ্দেশ হৈ অৰণ্যৰ মাজত মৃত অৱস্থাত উদ্ধাৰ হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।
