অৱশেষত আশানুৰূপভাৱেই ২০২১-২২ চিজনত বিশ্ব ফুটবলৰ শ্ৰেষ্ঠ খেলুৱৈৰ সন্মান বেলন ডি’অৰ লাভ কৰিছে ফৰাচী তাৰকা তথা স্পেনিছ ক্লাৱ ৰিয়েল মাদ্ৰিদৰ অধিনায়ক কৰিম বেঞ্জেমাই। চিজনত দাঙি ধৰা চমকপ্ৰদ প্ৰদৰ্শনৰ সুবাদত কেৰিয়াৰত প্ৰথমবাৰৰ বাবে এই সন্মান লাভ কৰে বেঞ্জেমাই।
বেঞ্জেমাই যোৱা চিজনত ৰিয়েল মাদ্ৰিদৰ হৈ ৪৬ খন খেলত ৪৪ টা গল স্ক’ৰ কৰাৰ লগতে চেম্পিয়নছ লীগ আৰু লা লিগাৰ খিতাপ অৰ্জন কৰিছিল। তদুপৰি ফ্ৰান্সৰ হৈ উৱেফা নেশ্যনছ লীগ জয় কৰিছিল তাৰকাগৰাকীয়ে।
এই সন্মান লাভৰ পিছতে বেঞ্জেমাই কয়, “বেলন ডি’অৰ ব্যক্তিগত সন্মান হ’ব পাৰে, কিন্তু ই এতিয়াও এক সামূহিক পুৰস্কাৰ। এয়া হৈছে দলীয় বেলন ডি’অৰ।”
বেঞ্জেমাৰ সৈতে বেলন ডি’অৰৰ দৌৰত দ্বিতীয় স্থানত থাকে লিভাৰপুলৰ প্ৰাক্তন খেলুৱৈ তথা বৰ্তমান বেয়াৰ্ন মিউনিখৰ সদস্য চেনেগালৰ তাৰকা ছাদিঅ’ মানে। ম্যানচেষ্টাৰ চিটিৰ কেভিন ডি ব্ৰুইন তৃতীয় স্থানত আৰু বাৰ্চিলোনাৰ ষ্ট্ৰাইকাৰ ৰবাৰ্ট লেৱানডস্কি চতুৰ্থ স্থানত থাকে।
আনহাতে মহিলাৰ শাখাত শ্ৰেষ্ঠ খেলুৱৈ হিচাপে বিবেচিত হয় স্পেইনৰ এলেক্সিয়া পুটেলাছে। বাৰ্চিলোনাৰ হৈ উজ্জীৱিত প্ৰদৰ্শন আগবঢ়াই মহিলা চেম্পিয়নছ লীগত সৰ্বাধিক গল স্ক’ৰাৰ হিচাপে পৰিগণিত হোৱা পুটেলাছ স্পেনিছ ক্লাৱটোক ফাইনেলত উপনীত কৰাত মুখ্য ভূমিকা লৈছিল।
কালি পেৰিছত অনুষ্ঠিত হোৱা এই বঁটা প্ৰদান অনুষ্ঠানত স্পেনিছ মিডফিল্ডাৰ তথা বাৰ্চিলোনাৰ নৱ চাঞ্চল্য গাভিয়ে শ্ৰেষ্ঠ যুৱ খেলুৱৈ হিচাপে কোপা ট্ৰফী, লেৱানডস্কিয়ে যোৱা ছিজনৰ শীৰ্ষ গলদাতাৰ বাবে গাৰ্ড মুলাৰ ট্ৰফী লাভ কৰে।
আনহাতে ৰিয়েল মাদ্ৰিদৰ থিবাউট কৰ্টৱাই বছৰটোৰ শ্ৰেষ্ঠ গ’লৰক্ষকৰ পুৰস্কাৰ লাভ কৰাৰ বিপৰীতে মানচেষ্টাৰ চিটিক বৰ্ষশ্ৰেষ্ঠ ক্লাৱৰ সন্মান দিয়া হয়।