নতুন মন্ত্ৰীসভা গঠন কৰাৰ পাছতো কৰ্ণাটক কংগ্ৰেছত শান্তি ঘূৰি অহা নাই। ৰাজ্যখনৰ নতুন মুখ্যমন্ত্ৰী ডি কে শিৱকুমাৰেও এই বিদ্ৰোহ চম্ভালিবলৈ গৈ যথেষ্ট সমস্যাৰ সন্মুখীন হৈছে। এইবাৰ মন্ত্ৰীত্ব নাপাই কৰ্ণাটকৰ এজন কংগ্ৰেছ বিধায়ক দিল্লীলৈ গৈছে। আনহাতে, মন্ত্ৰী হৈও সন্তুষ্ট নহয় শিৱকুমাৰৰ মন্ত্ৰীসভাৰ আন এজন সদস্য। তেৱোঁ কংগ্ৰেছৰ শীৰ্ষ নেতৃত্বৰ লগত আলোচনা কৰিবলৈ দিল্লীত উপস্থিত হৈছেগৈ।
নিজৰ অসন্তুষ্টি প্ৰকাশ কৰিবলৈ দিল্লীলৈ যোৱা মন্ত্ৰীজন হৈছে কৃষ্ণ বাইৰে গৌড়া। তেওঁক বেংগালুৰু উন্নয়ন বিভাগৰ দায়িত্ব দিয়া হৈছে। কিন্তু কৃষ্ণৰ দাবী যে বেংগালুৰু উন্নয়ন কৰ্তৃপক্ষ (বি ডি এ) আৰু বেংগালুৰু মহানগৰ উন্নয়ন কৰ্তৃপক্ষ (বি এম আৰ ডি এ) তেওঁৰ বিভাগৰ অধীনলৈ আনিব লাগে। তেওঁৰ মতে, এই দুটা চৰকাৰী সংস্থা তেওঁৰ অধীনত নাথাকিলে বেংগালুৰু আৰু ইয়াৰ দাঁতিকাষৰীয়া অঞ্চলৰ উন্নয়নত তেওঁৰ কোনো বিশেষ ভূমিকা নাথাকিব।
আনহাতে, মন্ত্ৰী পদৰ দাবী লৈ দিল্লীলৈ যোৱা কংগ্ৰেছ বিধায়কজন হৈছে ৰিজোৱান আৰছাদ। এটা সূত্ৰৰ মতে, তেওঁক মন্ত্ৰী কৰাৰ বিষয়ে কংগ্ৰেছৰ শীৰ্ষ নেতৃত্বৰ সৈতে আলোচনা চলি আছে। সেইবাবেই তেওঁ দিল্লীলৈ যোৱা বুলি জানিব পৰা গৈছে। এনে পৰিস্থিতিত কৰ্ণাটকৰ মন্ত্ৰীসভাত পুনৰ ৰদবদল হ’ব নেকি, তাক লৈ চৰ্চা আৰম্ভ হৈছে।
কেইদিনমান আগতে বিভাগ বিতৰণক লৈ অসন্তুষ্টি প্ৰকাশ কৰিছিল কৰ্ণাটকৰ আন এজন মন্ত্ৰী ৰামলিংগ ৰেড্ডীয়ে। মুখ্যমন্ত্ৰী শিৱকুমাৰে তেওঁক বৃহৎ আৰু মজলীয়া জলসিঞ্চন বিভাগৰ দায়িত্ব দিছিল। কিন্তু ৰেড্ডীৰ দাবী আছিল যে তেওঁক বেংগালুৰু উন্নয়ন বিভাগৰ মন্ত্ৰী কৰাৰ প্ৰতিশ্ৰুতি দিয়া হৈছিল। নিজৰ পছন্দৰ বিভাগ নাপায় তেওঁ মন্ত্ৰীসভাৰ পৰা পদত্যাগ কৰিছিল। অৱশ্যে পিছত শিৱকুমাৰে ৰেড্ডীৰ লগত আলোচনাত বহি এই সমস্যাৰ সমাধান কৰে। মুখ্যমন্ত্ৰীগৰাকীয়ে কৈছিল যে ৰামলিংগ ৰেড্ডী তেওঁৰ বন্ধু আৰু পদত্যাগৰ বিষয়টো এতিয়া মিমাংসা হৈছে। মন্ত্ৰীসভাত থকা আন দুজন সদস্য কে এইচ মুনিয়াপ্পা আৰু কে জে জৰ্জেও বিভাগ বিতৰণক লৈ অসন্তুষ্টি প্ৰকাশ কৰিছিল যদিও পিছত শান্ত হৈছিল। কিন্তু সেই সমস্যা সমাধান হোৱাৰ পাছতেই এতিয়া নতুনকৈ এই বিদ্ৰোহ আৰম্ভ হৈছে।
উল্লেখ্য যে, সিদ্ধাৰামাইয়াই পদত্যাগ কৰাৰ পিছত বুধবাৰে বিয়লি বেংগালুৰুৰ গ্লাছ হাউচত মুখ্যমন্ত্ৰী হিচাপে শপত গ্ৰহণ কৰে ডি কে শিৱকুমাৰে। ৰাজ্যপাল থাৱৰচান্দ গেহলটে তেওঁক শপত বাক্য পাঠ কৰোৱায়। শিৱকুমাৰৰ লগত উপ-মুখ্যমন্ত্ৰী হিচাপে শপত লয় দলিত নেতা জি পৰমেশ্বৰে। লগতে আন ১২ জন মন্ত্ৰীয়েও শপত গ্ৰহণ কৰে।
প্ৰাক্তন মুখ্যমন্ত্ৰী সিদ্ধাৰামাইয়াই ইতিমধ্যে স্পষ্ট কৰি দিছে যে ২০২৩ চনৰ চুক্তি অনুসৰি তেওঁ শিৱকুমাৰক মুখ্যমন্ত্ৰীৰ আসনখন এৰি দিলেও তেওঁ সক্ৰিয় ৰাজনীতিত থাকিব। তেওঁ লগতে কয় যে তেওঁৰ মূল গুৰুত্ব ৰাজ্যিক ৰাজনীতিতহে থাকিব, ৰাষ্ট্ৰীয় ৰাজনীতিত নহয়। কংগ্ৰেছ সূত্ৰৰ মতে, মুখ্যমন্ত্ৰীৰ পদ এৰি দিয়াৰ বিনিময়ত হাইকমাণ্ডে সিদ্ধাৰামাইয়াক কৰ্ণাটক প্ৰদেশ কংগ্ৰেছৰ সভাপতি (যিটো পদত আগতে শিৱকুমাৰ আছিল) বা ৰাজ্যসভাৰ সাংসদ পদ বাছি ল’বলৈ কৈছিল। কিন্তু সিদ্ধাৰামাইয়াই স্পষ্ট কৰি দিয়ে যে তেওঁ সংসদৰ উচ্চ সদনলৈ নাযায়।
