কৰ্ণি সেনাৰ বৃহৎ ৰাজনৈতিক ঘোষণাই উত্তৰ প্ৰদেশৰ ৰাজনীতিত নতুন আলোড়নৰ সৃষ্টি কৰিছে। দীৰ্ঘদিন ধৰি বিজেপিৰ সমৰ্থক হিচাপে পৰিচিত এই সংগঠনটোৱে এতিয়া পোনপটীয়াকৈ নিৰ্বাচনী যুঁজত প্ৰৱেশ কৰাৰ ইংগিত দিছে।
কৰ্ণি সেনাৰ মুৰব্বী সুৰজপাল সিং ‘আম্মু’ই ঘোষণা কৰিছে যে তেওঁলোকৰ সংগঠনে আগন্তুক উত্তৰ প্ৰদেশ বিধানসভা নিৰ্বাচনত ৫০খন আসনত প্ৰাৰ্থী প্ৰক্ষেপ কৰিব। সোমবাৰে শ্বাহজাহানপুৰত অনুষ্ঠিত এখন সন্মিলনত এই ঘোষণা কৰাৰ পিছৰে পৰা ৰাজনৈতিক মহলত তুমুল চৰ্চা আৰম্ভ হৈছে।
সন্মিলনত ভাষণ দি সুৰজপাল সিং আম্মুৱে স্পষ্টভাৱে কয় যে, “আমি মুখ্যমন্ত্ৰী যোগী আদিত্যনাথক সন্মান কৰো, কিন্তু আমি বিজেপিৰ গোলাম নহয়। উত্তৰ প্ৰদেশৰ ৫০খন আসনত আমি নিৰ্বাচনত অৱতীৰ্ণ হ’ম।” তেওঁৰ এই মন্তব্য কেৱল ৰাজনৈতিক বাৰ্তা নহয়, দীৰ্ঘদিন ধৰি বিজেপিক সমৰ্থন কৰা এটা প্ৰভাৱশালী সংগঠনৰ অসন্তুষ্টিকো উদঙাই দিছে।
ৰাজনৈতিক সূত্ৰ অনুসৰি এই সিদ্ধান্তৰ আঁৰত আছে আসন বিতৰণ আৰু ৰাজনৈতিক প্ৰতিনিধিত্বক লৈ দীৰ্ঘদিনীয়া ক্ষোভ। উত্তৰ প্ৰদেশৰ ৰাজনীতিত ৰাজপুত বা ক্ষত্ৰীয় সম্প্ৰদায়ক তেওঁলোকৰ অৱদান আৰু প্ৰভাৱৰ তুলনাত উপযুক্ত ৰাজনৈতিক গুৰুত্ব দিয়া হোৱা নাই বুলি দাবী কৰি আহিছে কৰ্ণি সেনাই। যোৱা দেওবাৰেও সুৰজপাল সিঙে বিজেপিক ২৫খন বিধানসভা আসনত প্ৰাৰ্থী প্ৰক্ষেপ কৰাৰ সুযোগ বিচাৰিছিল বুলি জনা যায়। কিন্তু সেই দাবীৰ প্ৰতি ইতিবাচক সঁহাৰি নোপোৱাৰ পিছত মাত্ৰ এদিনৰ ভিতৰতে তেওঁ এই ডাঙৰ ঘোষণা কৰিলে।
শ্বাহজাহানপুৰ সন্মিলনত তেওঁ আঞ্চলিক নেতা-মন্ত্ৰীৰ বিষয়টোও পোনপটীয়াকৈ উত্থাপন কৰে। বিশেষকৈ ওম প্ৰকাশ ৰাজভৰৰ নাম উল্লেখ কৰি তেওঁ প্ৰশ্ন কৰে যে, “ৰাজভৰৰ দৰে অযোগ্য ব্যক্তি এজনক যেতিয়া আপোনালোকে মন্ত্ৰী কৰিব পাৰি, তেন্তে আমি কিয় নিৰ্বাচনত অৱতীৰ্ণ হ’ব নোৱাৰো?” পৰ্যবেক্ষকসকলৰ মতে এই মন্তব্য ৰাজনৈতিকভাৱে তাৎপৰ্যপূৰ্ণ। কাৰণ ইয়াৰ জৰিয়তে কেৱল বিজেপিৰ সিদ্ধান্তক প্ৰত্যাহ্বান জনোৱাই নহয়, মিত্ৰজোঁটৰ ৰাজনীতিৰ বৰ্তমানৰ গাঁথনিলৈও প্ৰশ্ন উত্থাপন হৈছে।
উত্তৰ প্ৰদেশত কৰ্ণি সেনাৰ প্ৰভাৱ প্ৰধানকৈ ৰাজপুত বা ক্ষত্ৰিয় সম্প্ৰদায়ৰ মাজত। এই সম্প্ৰদায়টো দীৰ্ঘদিন ধৰি বিজেপিৰ বাবে অন্যতম গুৰুত্বপূৰ্ণ ভোট বেংক হিচাপে বিবেচিত হৈ আহিছে। ফলত যদি সঁচাকৈয়ে কৰ্ণি সেনাই অকলে নিৰ্বাচনত অংশগ্ৰহণ কৰে, তেন্তে ইয়াৰ প্ৰভাৱ বিজেপিৰ ভোটৰ অংকত পৰিব পাৰে বুলি ৰাজনৈতিক বিশ্লেষকসকলে ধাৰণা কৰে।
কিন্তু ৰাজনৈতিক মহলৰ একাংশই ধাৰণা কৰে যে এই ঘোষণা আপাততঃ বিজেপিৰ ওপৰত চাপ প্ৰয়োগৰ কৌশলও হ’ব পাৰে। বিগত সময়ত বিভিন্ন সামাজিক আৰু জাতিভিত্তিক সংগঠনে নিৰ্বাচনৰ পূৰ্বে ৰাজনৈতিক গুৰুত্ব বৃদ্ধিৰ বাবে এনে স্থিতি গ্ৰহণ কৰি আহিছে। শেষত নিৰ্বাচনত পোনপটীয়াকৈ যুঁজিব নে নাই সেইটোৱেই আছিল ডাঙৰ প্ৰশ্ন। ফলত বৰ্তমান কৰ্ণি সেনাৰ বিষয়ে নিশ্চিতভাৱে একো ক’ব পৰা নাযায়।
আনহাতে, এই ঘোষণাৰ সন্দৰ্ভত বিজেপিয়ে এতিয়াও আনুষ্ঠানিক প্ৰতিক্ৰিয়া দিয়া নাই। কিন্তু ৰাজনৈতিক পৰ্যবেক্ষকৰ মতে যদি কৰ্ণি সেনাই নিজৰ স্থিতিত দৃঢ় হৈ থাকে আৰু ৫০খন আসনত প্ৰাৰ্থী প্ৰক্ষেপ কৰে তেন্তে উত্তৰ প্ৰদেশৰ নিৰ্বাচনী সমীকৰণত এক নতুন মাত্ৰা সংযোজন হ’ব। বিশেষকৈ ৰাজপুতৰ ভোটৰ এটা অংশ বিজেপিৰ পৰা আঁতৰি গ’লে একাধিক আসনত ইয়াৰ প্ৰভাৱ দেখা যাব।
