“মই ভূপেন হাজৰিকাৰ সৃষ্টিকৰ্মবোৰ অধ্যয়ন কৰা নাই, গতিকে তেনে মন্তব্য কৰা উচিত নাছিল”

মৰণোত্তৰভাৱে ভাৰত ৰত্নৰ বাবে নিৰ্বাচিত হোৱাৰ পিছতে অসম সন্তান তথা বিশ্বশিল্পী ড০ ভূপেন হাজৰিকাক লৈ কৰা মন্তব্যৰ বাবে আজি ক্ষমা খুজিছে প্ৰাক্তন ন্যায়াধীশ তথা প্ৰেছ কাউন্সিল অব ইণ্ডিয়াৰ ভূতপূৰ্ব সভাপতি মাৰ্কণ্ডেয় কাটজুৱে।

“মই মোৰ এটা ফেচবুক পোষ্টত ভূপেন হাজৰিকাই ভাৰত ৰত্ন পোৱাৰ যোগ্য নহয় বুলি লিখিছিলো, যাৰ বাবে উত্তৰ-পূবৰ লোকসকলে মোক সমালোচনা কৰিছিল।” নিজৰ ফেইচবুক পেইজত দিয়া পোষ্ট আৰু অলপ পিছতে দিয়া এটা টুইটত এইদৰে কয় ছ’চিয়েল মিডিয়াত খুবেই সক্ৰিয় আৰু লাখ লাখ ফ’ল’ৱাৰ থকা ‘পাব্লিক ফিগাৰ’জনে।

এই সন্দৰ্ভত তেওঁ আচলতে কি কৈছিল এতিয়া পাহৰি গৈছে বুলি কয় আৰু এইটোক নিজৰ এটা বদ অভ্যাস বুলি স্বীকাৰ কৰে। “মই আচলতে ভূপেন হাজৰিকাৰ সৃষ্টিকৰ্মবোৰ অধ্যয়ন কৰা নাই। গতিকে মই তেনে মন্তব্য কৰা উচিত নাছিল।” ২৭ জানুৱাৰিৰ আবেলিৰ সময়ত নিজৰ ফেচবুক পোষ্টত কাটজুৰ এই মন্তব্য।

Bhupen Hazarika pic.twitter.com/PAkQl5ZirC
— Markandey Katju (@mkatju) January 27, 2019

“মই উত্তৰ-পূবৰ মানুহৰ ওচৰত ক্ষমা খুজিছো”, ভুল স্বীকাৰ কৰি এইদৰে ক্ষমা বিচাৰে তেওঁ।

উল্লেখযোগ্য যে প্ৰাক্তন ন্যায়াধীশজনে ২০১৯ চনত ভাৰত ৰত্ন পোৱা আটাইকেইজনকে ‘অযোগ্য’ বুলি একেদিনাৰে পুৱা ৯ বজাত দিয়া এটা ফেইচবুক পোষ্টটোত উল্লেখ কৰিছিল।

“মোৰ দৃষ্টিত এইবাৰ ভাৰত ৰত্ন পোৱা গোটেই তিনিজনেই পোৱাৰ যোগ্য নহয় (undeserving)”, এয়ে আছিল তেওঁৰ আগৰ পোষ্টটোৰ প্ৰথমটো বাক্য। কেৱল এয়ে নহয়, তেওঁ উক্ত পোষ্টটোত ভূতপূৰ্ব ৰাষ্ট্ৰপ্ৰতি প্ৰণৱ মুখাৰ্জীক (যিজনেও এইবাৰ ভাৰত ৰত্ন পাইছে) নেহৰু-গান্ধীৰ চামচা বুলি কয়।

কিন্তু আনজন প্ৰাপক তথা সংঘ পৰিবাৰৰ নেতা নানাজী দেশমুখক অধিক কঠোৰভাৱে সমালোচনা কৰিছিল। “নানাজী দেশমুখ সংঘ পৰিবাৰৰ মানুহ, যিটো সাম্প্ৰদায়িক সংগঠন আৰু গতিকে ভাৰতীয় মানুহৰ মাজত বিভাজন সিঁচিছে। যি মানুহৰ মাজত বিভাজন আনে তেওঁ মানুহৰ শত্ৰু, ভীষ্ম পিতামহেই এইটো কৈ গৈছে।”, পোষ্টটোত নানাজী দেশমুখৰ বিষয়ে কাটজুৰ মত।

অৱশ্যে প্ৰণৱ মুখাৰ্জী আৰু নানাজী দেশমুখৰ দৰে অসমৰ মহান শিল্পীজনক সমালোচনা কৰা নাছিল বা কোনো অশোভনীয় মন্তব্য দিয়া নাছিল। হাজৰিকাৰ বিষয়ে তেওঁ কৈছিল, “ভূপেন হাজৰিকাই শান্তি আৰু ভাতৃত্ববোধৰ বাবে কাম কৰিব পাৰে, কিন্তু তেওঁ ‘পদ্ম বিভূষণ’ৰ বাবেই আটাইতকৈ উপযুক্ত”।

মন কৰিব লগীয়া যে গোটেই দেশজুৰি লাখ লাখ ফ’ল’ৱাৰ থকা প্ৰাক্তন ন্যায়াধীশজনক ভূপেন হাজৰিকাক হেয় কৰা মন্তব্যৰ বাবে সমালোচনা কৰে উত্তৰ-পূবৰ বহুতো য়ুজাৰে। এজন য়ুজাৰে কয়, I think you don’t know who is Bhupen Hazarika! It’s not unusual for rest of India who know little about Assam or North – East., এনেকুৱা প্ৰতিক্ৰিয়াৰ পিছতে তেওঁ ক্ষমা খুজিবলৈ বাধ্য হয়। কিন্তু ক্ষমা নুখুজিলে প্ৰণৱ মুখাৰ্জী আৰু নানাজী দেশমুখক লৈ কৰা মন্তব্যৰ বাবে।

আনহাতে পূৰ্বৰ পোষ্টটোত কাটজুৱে ভগৱত সিঙকে ধৰি ১৪জন লোকৰ ভাৰতীয়ৰ নাম সাঙুৰি দিছিল, যিকেইজন তেওঁৰ বিবেচনা মতে ভাৰত ৰত্ন পোৱাৰ যোগ্য।