কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্পৰ পাৰিপাৰ্শ্বিক স্পৰ্শকাতৰ অঞ্চল ১০ কিলোমিটাৰৰ পৰা ১ কিলোমিটাৰলৈ হ্ৰাস কৰাৰ চৰকাৰী প্ৰস্তাৱক পূৰ্ণ সমৰ্থন জনাইছে মুখ্যমন্ত্ৰী ড° হিমন্ত বিশ্ব শৰ্মাই। সোমবাৰে গুৱাহাটীৰ লোকসেৱা ভৱনত অনুষ্ঠিত এখন সংবাদমেলত এই সন্দৰ্ভত প্ৰতিক্ৰিয়া প্ৰকাশ কৰি মুখ্যমন্ত্ৰীগৰাকীয়ে স্পষ্ট কৰি দিয়ে যে কাজিৰঙাৰ দাঁতিকাষৰীয়া অঞ্চলৰ ৰাইজে দীৰ্ঘদিন ধৰি সন্মুখীন হৈ অহা বিভিন্ন সমস্যা আৰু উদ্বেগৰ প্ৰতি লক্ষ্য ৰাখিয়েই এই সিদ্ধান্ত গ্ৰহণ কৰা হৈছে।
সংবাদমেলত মুখ্যমন্ত্ৰীয়ে জানিবলৈ দিয়ে যে বোকাখাত আৰু কলিয়াবৰ আদি অঞ্চলৰ ৰাইজে যোৱা প্ৰায় এক দশক ধৰি এই বিশাল ইক’-ছেনচিটিভ জ’নৰ পৰিসৰৰ তীব্ৰ বিৰোধিতা কৰি আহিছে। ব্যৱসায়-বাণিজ্য আৰু দৈনন্দিন জীৱন-জীৱিকাৰ ওপৰত পৰা বিৰূপ প্ৰভাৱৰ বাবে স্থানীয় ৰাইজে আনকি উচ্চতম ন্যায়ালয়ৰো কাষ চাপিছিল। মুখ্যমন্ত্ৰীয়ে কয় যে কাজিৰঙাৰ ৰাইজেই প্ৰকৃততে কাজিৰঙাক সুৰক্ষা প্ৰদান কৰে। যদি মানুহক কাজিৰঙাৰ পৰা আঁতৰাই পঠিওৱা হয়, তেন্তে কাজিৰঙাৰ অস্তিত্বই বিপন্ন হ’ব বুলিও তেওঁ মন্তব্য কৰে। ইক’-ছেনচিটিভ জ’নৰ পৰিসৰ ১০ কিলোমিটাৰলৈ সম্প্ৰসাৰণ কৰিলে নুমলীগড় শোধনাগাৰো বন্ধ কৰিবলগীয়া পৰিস্থিতিৰ সৃষ্টি হ’ব বুলি মুখ্যমন্ত্ৰীয়ে সতৰ্ক কৰি দিয়ে। উচ্চতম ন্যায়ালয়ৰ ৰায় অনুসৰি এই জ’ন ১ৰ পৰা ৩ কিলোমিটাৰ হোৱাটোৱেই যথেষ্ট বুলি তেওঁ উল্লেখ কৰে।
কাজিৰঙাৰ বিশাল ভৌগোলিক বিস্তৃতিৰ কথা সোঁৱৰাই দি মুখ্যমন্ত্ৰীয়ে কয় যে উদ্যানখন উত্তৰে বিশ্বনাথ ঘাটলৈকে বিস্তৃত হৈ আছে। যদি সেই সীমাৰ পৰা ১০ কিলোমিটাৰ ধৰা হয়, তেন্তে গহপুৰ আৰু বিশ্বনাথ চাৰিআলিৰ দৰে ঘন জনবসতিপূৰ্ণ অঞ্চলসমূহো ইয়াৰ অন্তৰ্ভুক্ত হৈ পৰিব। কেৱল কোঁহৰাই কাজিৰঙা নহয় বুলি উল্লেখ কৰি তেওঁ কয় যে কাজিৰঙাৰ মূল সীমাৰ পৰা ১০ কিলোমিটাৰ ব্যাসাৰ্ধৰ কথা বিবেচনা কৰিবলগীয়া হ’লে এক বৃহৎ সমস্যাৰ সৃষ্টি হ’ব।
অৱশ্যে মুখ্যমন্ত্ৰীৰ এই স্থিতিক লৈ প্ৰকৃতিপ্ৰেমী আৰু বন্যপ্ৰাণী বিশেষজ্ঞসকলে গভীৰ উদ্বেগ প্ৰকাশ কৰিছে। তেওঁলোকৰ মতে, এই সুৰক্ষা বলয় সংকুচিত কৰিলে কাজিৰঙাৰ জৈৱ বৈচিত্ৰ্য আৰু দীৰ্ঘম্যাদী সংৰক্ষণ প্ৰক্ৰিয়াত বিৰূপ প্ৰভাৱ পৰিব। ৰাষ্ট্ৰীয় ব্যাঘ্ৰ সংৰক্ষণ কৰ্তৃপক্ষই ইতিমধ্যে সমগ্ৰ কাজিৰঙা-কাৰ্বি আংলং এলেকাত সকলো ধৰণৰ খনন, শিল ভঙা আৰু ক্ৰেচাৰ মেচিনৰ ব্যৱহাৰ তাৎক্ষণিকভাৱে বন্ধ কৰিবলৈ পৰামৰ্শ দিছিল। হাতী আৰু বাঘৰ দৰে বন্যপ্ৰাণীৰ বিচৰণ ভূমি সুৰক্ষিত কৰাৰ স্বাৰ্থত এই পৰামৰ্শ দিয়া হৈছিল যদিও সুৰক্ষা বলয় হ্ৰাস পালে এনে পৰিৱেশ বিনষ্টকাৰী কাৰ্যকলাপ পুনৰ বৃদ্ধি পোৱাৰ আশংকা কৰা হৈছে।
সংবাদমেলত মুখ্যমন্ত্ৰীয়ে বন্তৰা নামৰ সংস্থাটোৰ জৰিয়তে অসমত হাতীৰ চিকিৎসালয় নিৰ্মাণৰ প্ৰস্তাৱ সন্দৰ্ভতো স্পষ্টীকৰণ দিয়ে। তেওঁ জনায় যে সংস্থাটোৱে নিজে চিকিৎসালয় নিৰ্মাণ কৰাৰ সলনি ৰাজ্য চৰকাৰক এনে তিনিখন চিকিৎসালয় স্থাপনৰ বাবে প্ৰয়োজনীয় কাৰিকৰী জ্ঞান আৰু সাহায্য প্ৰদান কৰাৰহে প্ৰস্তাৱ দিছে। চৰকাৰে এই প্ৰস্তাৱ পৰীক্ষা কৰি চোৱাৰ পাছতহে চূড়ান্ত সিদ্ধান্ত ল’ব বুলি তেওঁ জানিবলৈ দিয়ে।
