কাজিৰঙা ৰাষ্ট্ৰীয় উদ্যান তথা ব্যাঘ্ৰ সংৰক্ষিত বনাঞ্চলত ‘কাতি বিহু চৰাই গণনা ২০২৫’ সফলতাৰে সম্পন্ন হৈছে। এই জৰীপত মুঠ ১৪৬টা চৰাইৰ প্ৰজাতি আৰু ১৯১৯টা অন্যান্য চৰাইৰ তথ্য নথিভুক্ত কৰা হৈছে। কাজিৰঙা ৰাষ্ট্ৰীয় উদ্যানৰ ক্ষেত্ৰ সঞ্চালক ড° সোণালী ঘোষে এক বিবৃতিৰ জৰিয়তে এই কথা সদৰী কৰিছে।
এই গণনা কাজিৰঙাৰ অভয়াৰণ্যৰ অন্তৰ্ভুক্ত অগৰাতলি, গমিৰি, পানবাৰী, পানপুৰ আৰু লাওখোৱা বন্যপ্ৰাণীকে ধৰি পাঁচখন ঠাইত এই জৰীপ চলোৱা হৈছিল। জৰীপৰ তথ্য অনুসৰি, অগৰাতলিত সৰ্বাধিক ৮৯টা প্ৰজাতিৰ চৰাই পোৱা গৈছে। ইয়াৰ পিছত গমিৰি আৰু পানবাৰীত ৫৯টা প্ৰজাতি, পানপুৰত ৫৫টা আৰু লাওখোৱাত ৩৭টা প্ৰজাতিৰ চৰাই নথিভুক্ত হৈছে।
ড° ঘোষে সদৰী কৰা অনুসৰি, এই গণনাত চৰাই অনুৰাগী, ছাত্ৰ-ছাত্ৰী, গৱেষক আৰু বন বিষয়াসহ মুঠ ৬৩ গৰাকীয়ে অংশ লৈছিল। জৰীপৰ তত্বাৱধানত আছিল ৰফিকুল ইছলাম (পানবাৰী), সমৰজিৎ ওজা আৰু নীৰজ বৰা (লাওখোৱা), ড° ৰঞ্জিত কাকতি (পানপুৰ), ৰাহুল শৰ্মা (গমিৰি) আৰু দাদুল গগৈ (অগৰাতলি)।
এইবাৰৰ গণনাৰ এক উল্লেখযোগ্য দিশ হৈছে লাওখোৱা আৰু পানবাৰীৰ মহিলা বনকৰ্মীসকলৰ সক্ৰিয় অংশগ্ৰহণ। কাজিৰঙা ৰাষ্ট্ৰীয় উদ্যান কৰ্তৃপক্ষ আৰু অসম চৰাই নিৰীক্ষণ নেটৱৰ্ক (এ বি এম এন)-ৰ যৌথ উদ্যোগত এই পদক্ষেপক বন্যপ্ৰাণী সংৰক্ষণৰ ক্ষেত্ৰত মহিলাসকলৰ সম্পৃক্ততা বৃদ্ধিৰ প্ৰথম পদক্ষেপ হিচাপে পৰিগণিত হৈছে।
উল্লেখ্য যে নথিভুক্ত প্ৰজাতিসমূহৰ ভিতৰত দুটা বিপন্ন প্ৰজাতি শ্বোৱাম্প গ্ৰাছ বেবলাৰ আৰু পেলাছ’ৰ মাছ ঈগল আৰু ছটা অসুৰক্ষিত প্ৰজাতি ৰিভাৰ টাৰ্ণ, গ্ৰেটাৰ স্পটেড ঈগল, স্লেণ্ডাৰ-বিল্ড বেবলাৰ, লেছাৰ এডজুটেণ্ট, গ্ৰেট হৰ্ণবিল আৰু শ্বোৱাম্প ফ্ৰাংকলিন আদি অন্তৰ্ভুক্ত। ইয়াৰ উপৰিও ছটা প্ৰজাতি ক্ৰমে উলি-নেকড ষ্টৰ্ক, নৰ্দাৰ্ণ লেপউইং, ব্ল’ছম-হেডেড পেৰাকিট, গ্ৰে-হেডেড ফিচ ঈগল, স্পট-বিল্ড পেলিকান আৰু ৰিভাৰ লেপউইং—বিপন্ন হোৱাৰ দিশে অগ্ৰসৰ হৈছে। বাকী ১৩২টা প্ৰজাতি বৰ্তমান বিপদৰ বাহিৰত আছে বুলি উদ্যান কৰ্তৃপক্ষই জানিবলৈ দিছে।
মুখ্যত চৰাই নিৰীক্ষণৰ প্ৰসাৰ, সংৰক্ষণৰ সজাগতা বৃদ্ধি, স্থানীয় জনগোষ্ঠীৰ অংশগ্ৰহণক উৎসাহিত কৰা আৰু মহিলা বনকৰ্মী তথা নৱ প্ৰজন্মক এই কামত জড়িত কৰাৰ উদ্দেশ্যৰে কাজিৰঙাৰ এই চৰাই গণনা কাৰ্যসূচী গ্ৰহণ কৰা বুলি সদৰী কৰিছে উদ্যোগতাই। এই উদ্যোগে কাজিৰঙাৰ জৈৱ-বৈচিত্ৰ্য সংৰক্ষণৰ ক্ষেত্ৰত এক গুৰুত্বপূৰ্ণ ভূমিকা পালন কৰিছে।
