অসমৰ গ্ৰাম্য অৰ্থনীতি আৰু পৰম্পৰাগত হস্ততাঁত শিল্পক এক নতুন মাত্ৰা প্ৰদান কৰিছে কেইৰ্ণ অইল এণ্ড গেছে। চলিত বৰ্ষৰ আন্তৰ্জাতিক নাৰী দিৱসৰ প্ৰাকক্ষণত গিভ টু গেইন শীৰ্ষক মূল বিষয়বস্তুৰে কেইৰ্ণে অসমৰ মহিলা তাঁত শিল্পীসকলৰ অনুপ্ৰেৰণাদায়ক যাত্ৰাক উদযাপন কৰিছে। কেইৰ্ণৰ বিশেষ সহযোগিতাত এতিয়া ৰাজ্যৰ বহু মহিলাই পুৰণি হস্ততাঁত শিল্পক সাৰথি কৰি নিজক আৰ্থিকভাৱে স্বাৱলম্বী কৰি তুলিবলৈ সক্ষম হৈছে। এই প্ৰচেষ্টাই কেৱল তেওঁলোকৰ জীৱিকাৰ পথেই মুকলি কৰা নাই, বৰঞ্চ সমাজত এক ইতিবাচক পৰিৱৰ্তনৰ সূচনা কৰিছে যিটো বহু লোকৰ বাবে এক ডাঙৰ আদৰ্শ হৈ পৰিছে।
সমগ্ৰ দেশৰ লগতে অসমতো কেইৰ্ণে মহিলা সৱলীকৰণৰ বাবে বিভিন্ন উন্নয়নমূলক কাম কৰি আহিছে। শিক্ষা, স্বাস্থ্য আৰু পুষ্টিৰ দৰে গুৰুত্বপূৰ্ণ দিশত কাম কৰি কোম্পানীটোৱে ইতিমধ্যে ২০ নিযুততকৈও অধিক মহিলা আৰু শিশুৰ জীৱনলৈ পৰিৱৰ্তন আনিছে। অসমৰ প্ৰেক্ষাপটত কেইৰ্ণে মহিলাসকলৰ দক্ষতা বিকাশত গুৰুত্ব দি কেইবাটাও গুৰুত্বপূৰ্ণ পদক্ষেপ গ্ৰহণ কৰিছে। ইয়াৰ ভিতৰত গোলাঘাট জিলাৰ বৰচাপৰি আৰু যোৰহাট জিলাৰ আগচামুৱা গাঁৱৰ মহিলাসকলৰ পুৰণি তাঁত শিল্পক আধুনিক ৰূপ দিয়াৰ কামটো অন্যতম। অসম ৰাজ্যিক গ্ৰামীণ জীৱিকা অভিযানৰ সৈতে মিলি কেইৰ্ণে এই মহিলাসকলক তেওঁলোকৰ পৰম্পৰাগত দক্ষতাক এক লাভজনক ব্যৱসায়লৈ সলনি কৰাত সহায় কৰিছে।
গোলাঘাটত স্থাপন কৰা জেকাৰ্ড হেণ্ডলুম চেণ্টাৰটো এতিয়া গ্ৰাম্য মহিলাৰ বাবে আশাৰ কেন্দ্ৰ হৈ পৰিছে। মাত্ৰ কেইগৰাকীমান মহিলাই আৰম্ভ কৰা এই যাত্ৰাত এতিয়া ৩,০০০ তকৈও অধিক মহিলাই আত্মসহায়ক গোটৰ জৰিয়তে জড়িত হৈ পৰিছে। এই কেন্দ্ৰটোৰ পৰা উৎপাদিত গামোচা আৰু অন্যান্য কাপোৰসমূহ অসম চৰকাৰৰ স্বনিৰ্ভৰ নাৰী আঁচনিৰ অধীনত যোগান ধৰা হৈছে। ইয়াৰ উপৰি যোৰহাটৰ আগচামুৱাত থকা সম্প্ৰীতি মাকু হস্ততাঁত কেন্দ্ৰৰ জৰিয়তেও কেইৰ্ণে প্ৰয়োজনীয় সা-সুবিধা আৰু প্ৰশিক্ষণ প্ৰদান কৰি মহিলাসকলৰ উৎপাদন ক্ষমতা বৃদ্ধি কৰিছে। ইয়াৰ ফলত স্থানীয় মহিলাসকলে ঘৰৰ কাম-কাজ চম্ভালিও এক সন্মানীয় উপাৰ্জনৰ পথ বিচাৰি পাইছে।
মহিলাসকলক অধিক নিপুণ কৰি তুলিবলৈ ভাৰত চৰকাৰৰ সমৰ্থ আঁচনিৰ অধীনত বিশেষ দক্ষতা বিকাশ প্ৰশিক্ষণৰো ব্যৱস্থা কৰা হৈছে। এই প্ৰশিক্ষণে মহিলাসকলক বৰ্তমানৰ বজাৰৰ চাহিদা অনুযায়ী আধুনিক সাজ-পোছাক তৈয়াৰ কৰাত সহায় কৰিছে। এই সফলতাৰ বাবেই চলিত বৰ্ষত গোৱাত অনুষ্ঠিত হোৱা ইণ্ডিয়া এনাৰ্জী উইক ২০২৬ লৈ এই মহিলা শিল্পীসকলক আমন্ত্ৰণ জনোৱা হৈছিল। বিশ্ব পৰ্যায়ৰ এই অনুষ্ঠানত তেওঁলোকে নিজৰ হাতে বোৱা মুগা আৰু এৰি ৰেচমৰ মেখেলা চাদৰ, স্কাৰ্ফ, শাৰী আৰু অন্যান্য সামগ্ৰী প্ৰদৰ্শন কৰি দেশ-বিদেশৰ অতিথিৰ দৃষ্টি আকৰ্ষণ কৰিবলৈ সক্ষম হয়।
গাঁৱৰ এটা সৰু কোঠাৰ পৰা আৰম্ভ হোৱা এই যাত্ৰাই আজি বিশ্বৰ মঞ্চত অসমৰ বস্ত্ৰ শিল্পক চিনাকি কৰি দিছে। কেইৰ্ণৰ পেভিলিয়নলৈ অহা বিশিষ্ট অতিথিসকলক অসমীয়াৰ গৌৰৱ গামোচাৰে আদৰণি জনাই এই মহিলাসকলে অসমৰ সংস্কৃতিৰ এক সুন্দৰ ছবি দাঙি ধৰে। কেইৰ্ণৰ এই পদক্ষেপে স্পষ্ট কৰি দিছে যে যদি মহিলাসকলক উপযুক্ত সুযোগ দিয়া হয়, তেন্তে তেওঁলোকে নিজৰ লগতে সমগ্ৰ সমাজখনৰ উন্নয়নত গুৰুত্বপূৰ্ণ ভূমিকা পালন কৰিব পাৰে। নাৰী শক্তিৰ এই উন্নয়নমূলক যাত্ৰাই অসমৰ গ্ৰাম্য অৰ্থনীতিক এক নতুন দিশ দেখুৱাবলৈ সক্ষম হৈছে।
