দ্য কেৰেলা ষ্ট’ৰী ২ মুক্তিক কেন্দ্ৰ কৰি থকা আইনী জটিলতা সদ্যহতে আঁতৰিল। কেৰালা উচ্চ ন্যায়ালয়ে ছবিখনৰ ওপৰত দিয়া স্থগিতাদেশৰ নিৰ্দেশ প্ৰত্যাহাৰ কৰিছে। ছবিখন ২৭ ফেব্ৰুৱাৰী শুকুৰবাৰে মুক্তি পোৱাৰ কথা আছিল যদিও শেষ মুহূৰ্তত আবদ্ধ হৈ পৰে। অৱশ্যে আদালতৰ নতুন আদেশে ছবিখনৰ মুক্তিৰ পথ মুকলি কৰিছে।
বৃহস্পতিবাৰে ন্যায়াধীশ বেচু কুৰিয়ান থমাছে ছবিখন মুক্তিৰ ওপৰত স্থগিতাদেশৰ নিৰ্দেশ প্ৰদান কৰে। লগতে তেওঁ চেন্সৰ ব’ৰ্ডৰ ভূমিকাক লৈ প্ৰশ্ন উত্থাপন কৰি নিয়ম অনুসৰি কাম নকৰাত ক্ষোভ প্ৰকাশ কৰে।
এনে পৰিস্থিতিত প্ৰযোজকসকলে উচ্চ বিচাৰপীঠৰ কাষ চাপিল। পিছত ন্যায়াধীশ এছ এ ধৰ্মাধিকাৰী আৰু পি ভি বালকৃষ্ণনৰ বিভাগীয় বিচাৰপীঠে পূৰ্বৰ নিৰ্দেশ বাতিল কৰে। চেন্সৰৰ অনুমোদন লাভ কৰা ছবিখনৰ মুক্তি পিছুৱাই দিয়াৰ প্ৰয়োজন নাই বুলি আদালতে কয়।
শুকুৰবাৰে সন্ধিয়া ৪ বজাত উঠাই লোৱা হয় স্থগিতাদেশৰ নিৰ্দেশ। যদিও আইনী জটিলতাৰ বাবে ২৭ ফেব্ৰুৱাৰীত ছবিৰ নিৰ্ধাৰিত মুক্তি সম্ভৱ নহ’ল, তথাপিও আলোচনাৰ অন্তত প্ৰযোজকসকলে পৰৱৰ্তী মুক্তিৰ তাৰিখ ঘোষণা কৰিব।
জীৱবিজ্ঞানী শ্ৰীদেৱ নম্বোদ্ৰীয়ে দাখিল কৰা এজাহাৰৰ পৰাই এই গোচৰৰ সূত্ৰপাত। তেওঁ দাবী কৰে যে ছবিখনৰ ট্ৰেইলাৰত কেৰালাক অতি নেতিবাচক ৰূপত চিত্ৰিত কৰা হৈছে, যাৰ ফলত সমাজত সুদূৰপ্ৰসাৰী প্ৰভাৱ পৰিব পাৰে। শুনানিৰ সময়ত আদালতে প্ৰথমে মন্তব্য কৰিছিল যে আবেদনকাৰীৰ দাবী ‘সম্ভৱতঃ’ সত্য। ইয়াৰ পিছত মুক্তিৰ ওপৰত স্থগিতাদেশ জাৰি কৰা হয় আৰু চেঞ্চৰ ব’ৰ্ডকো ভর্ৎসনা কৰা হয়।
ছবিখনৰ টিজাৰ আৰু ট্ৰেইলাৰ মুক্তিৰ পিছৰে পৰা বিতৰ্কৰ সৃষ্টি হৈছে। তাত কেইবাগৰাকীও ভয়ত সন্তস্ত্ৰ মহিলাৰ কাহিনীৰ জৰিয়তে বলপূৰ্বক ধৰ্মান্তৰকৰণৰ অভিযোগ উত্থাপন হৈছে।
চৰিত্ৰসমূহৰ ভিতৰত সুৰেখা নায়াৰ আৰু নেহা সন্ত আদিৰ নামো আছে। পটভূমিৰ কণ্ঠত শুনা যায়, “আমাৰ ছোৱালীবোৰ প্ৰেমত নপৰে, ফান্দত পৰে। এতিয়াৰ পৰা সিহঁতে আৰু সহ্য নকৰে, তেওঁলোকে উভতি ধৰিব।” কোনোবাই আই এ এছ বিষয়া হোৱাৰ সপোন দেখিছিল, কোনোৱে প্ৰতিষ্ঠিত নৃত্যশিল্পী হ’ব বিচাৰিছিল। আনকি কিছুমানে প্ৰেমৰ স্বাৰ্থত হিন্দু ধৰ্মৰ পৰা ইছলাম ধৰ্ম গ্ৰহণ কৰাৰ কথাও কৈছে।
কিন্তু সেই সপোন ছিন্নভিন্ন হৈ পৰে – টিজাৰ-ট্ৰেইলাৰত এইটোৱেই দেখুওৱা হৈছে। লগতে দাবী কৰা হৈছে যে দেশখনক মুছলমান প্ৰধান ৰাজ্যলৈ ৰূপান্তৰিত কৰাৰ পৰিকল্পনাৰ ইংগিত পোৱা গৈছে। এই কাৰণেই ছবিখনে প্ৰথম খণ্ডৰ দৰেই সাম্প্ৰদায়িকতাৰ বীজ সিঁচা বুলি অভিযোগ উত্থাপন হৈছে। মুঠতে বিতৰ্ক, আইনী জটিলতা আৰু আদালতৰ হস্তক্ষেপৰ পিছত অৱশেষত মুক্তিৰ পথত ‘দ্য কেৰেলা ষ্ট’ৰী ২’।
