“ভিৰৰ মাজত থাকিলেও নিজক জিলিকাই তুলিব লাগিব। ইয়াৰ কাৰণে নিজৰ প্ৰতিভাক চিনাক্ত কৰি উপযুক্তভাৱে কঠোৰ সাধনা কৰিব লাগিব।”টীয়কৰ বুৰঞ্জী প্ৰসিদ্ধ অঞ্চল পীড়াকটাৰ মহেশ্বৰ বৰকটকী উচ্চতৰ মাধ্যমিক বিদ্যালয়ত ন্যাস বঁটা আৰু বাৰ্ষিক বঁটা বিতৰণৰ অনুষ্ঠানত নিৰ্দিষ্ট বক্তা হিচাপে উপস্থিত থাকি ডিফু ডনবক্স’ ডিগ্ৰী কলেজৰ সহযোগী অধ্যাপক তথা লেখক অসীম কুমাৰ হাজৰিকাই এইদৰে কয় ।
বিদ্যালয় সংগীতেৰে আৰম্ভণি কৰা সভাখনত সভাপতিত্ব কৰে আমগুৰি আউনীআটীয় হেমচন্দ্ৰ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত উপাধ্যক্ষ প্ৰদীপ বৰঠাকুৰে।
বহু কেইজন বিশিষ্ট অতিথি উপস্থিত থকা সভাত ২০২১ বৰ্ষৰ উচ্চ মাধ্যমিক পৰীক্ষাত সৰ্বোচ্চ নম্বৰ লাভ কৰা ছাত্ৰ পাৰ্থপ্ৰতিম শৰ্মা আৰু ছাত্ৰী সংগীতা শইকীয়াক কেতেকী বুঢ়াগোহাঁই ন্যাস বঁটা প্ৰদান কৰে।
অসমীয়া বিষয়ত সৰ্বোচ্চ নম্বৰ লাভ কৰা উচ্চ শাখাৰ ছাত্ৰী ৰুচীস্মিতা বৰাক আৰু নিম্ন শাখাৰ ছাত্ৰ প্ৰাচুৰ্য প্ৰিয়ম ফুকনক মুক্তিযোদ্ধা মিনাৰাম বৰা সোঁৱৰণী বঁটা প্ৰদান কৰে।
বাৰ্ষিক পৰীক্ষাত সৰ্বোচ্চ নম্বৰ লাভ কৰা উচ্চ শাখাৰ ছাত্ৰী ৰুচীস্মিতা বৰাক আৰু নিম্ন শাখাৰ ছাত্ৰ প্ৰাচুৰ্য প্ৰিয়ম ফুকনক নকুল চন্দ্ৰ বৰকটকী স্মৃতি বঁটা প্ৰদান কৰে। উচ্চতৰ মাধ্যমিক পৰীক্ষাত ছাত্ৰীৰ ভিতৰত সৰ্বোচ্চ নম্বৰ লাভ কৰা সংগীতা শইকীয়াক অমিয়া হাজৰিকা স্মৃতি বঁটা প্ৰদান কৰে।
উচ্চতৰ মাধ্যমিক পৰীক্ষাত গণিত বিষয়ত সৰ্বোচ্চ নম্বৰ লাভ কৰা পাৰ্থপ্ৰতিম শৰ্মাক মুক্তিযোদ্ধা শনিৰাম দোলাকাষৰীয়া স্মৃতি বঁটা প্ৰদান কৰে। অধ্যক্ষা মেৰিনা বেগমে আদৰণী ভাষণ প্ৰদান কৰা অনুষ্ঠানৰ আঁত ধৰে ছাত্ৰ একতা সভাৰ সভাপতি যোগেশ বৰাই।সভাত অৱসৰপ্ৰাপ্ত শিক্ষক সমাজকৰ্মী গোপী শইকীয়া, বিদ্যালয় পৰিচালনা সভাৰ উপ সভাপতি শ্যাম বৰা প্ৰমুখ্যে বিভিন্নজন উপস্থিত থাকে।
উচ্চ আৰু উচ্চতৰ মাধ্যমিক পৰীক্ষাত কৃতিত্ব সহকাৰে উত্তীৰ্ণসকলক জনোৱা অভিনন্দন অনুষ্ঠান পৰিচালনা কৰে শিক্ষয়িত্ৰী বন্তিশিখা বৰাই আৰু ন্যাস বঁটা প্ৰদান অনুষ্ঠান পৰিচালনা কৰে শিক্ষক হেমেন কুমাৰ শইকীয়াই।
আনহাতে,বাৰ্ষিক বঁটা প্ৰদান অনুষ্ঠান পৰিচালনা কৰে শিক্ষয়িত্ৰী বিভা দেৱী,জ্যোতিমণি দাস,অসীমা বৰা,নয়নমণি বৰাই।ইয়াৰ আগতে পুৱা পতাকা উত্তোলন কৰে যোগেশ বৰাই আৰু গণিত-বিজ্ঞানৰ প্ৰাচীৰ পত্ৰিকা ইউৰেকা উন্মোচন কৰে হেমেন কুমাৰ শইকীয়াই।
