ৰাজস্থানৰ ভিলৱাৰা জিলাত বলপূৰ্বকভাৱে অনুষ্ঠিত হোৱা কুমাৰীত্ব পৰীক্ষাত উত্তীৰ্ণ হোৱাত ব্যৰ্থ হোৱাৰ পিছত এগৰাকী ২৪ বছৰীয়া বিবাহিতা মহিলাক খাপ পঞ্চায়তে ১০ লাখ টকাৰ জৰিমনা বিহে। খাপ পঞ্চায়তৰ সভাতে মহিলাগৰাকীক তেওঁৰ শহুৰেকে প্ৰহাৰ কৰা বুলিও জানিব পৰা গৈছে।খাপ পঞ্চায়তে মহিলাগৰাকীৰ পৰিয়ালক এইদৰে ১০ লাখ টকাৰ জৰিমনা বিহা কাৰ্যত তীব্ৰ প্ৰতিক্ৰিয়াৰ সৃষ্টি হৈছে।
উল্লেখ্য ১১ মে, ২০২২ত বাগোৰত বিবাহপাশত আৱদ্ধ হোৱা ২৪ বছৰীয়া ছোৱালী গৰাকীয়ে পূৰ্বে সহবাস কৰিছে নে নাই সেয়া নিৰ্ধাৰণ কৰিবলৈ “কুমাৰীত্বৰ পৰীক্ষা” কৰা হৈছিল। বিবাহৰ পিছত সংসী জনজাতিৰ মহিলাগৰাকীক ১১ মে’ত ভিলৱাৰাত সমাজত “শুদ্ধিকৰণ ” কৰোৱা হৈছিল। ইয়াৰ পিছতে তেওঁৰ কুমাৰীত্বৰ পৰীক্ষা লোৱা হয়।
লগতে পঢ়ক: দিল্লীত পুনৰ অপাৰেছন লোটাছৰ কুচকাৱাজ বিজেপিৰ! আজি সাক্ষাৎ কৰিব ৰাষ্ট্ৰপতি মুৰ্মুক
আৰক্ষী বিষয়া সুৰেন্দ্ৰ কুমাৰে কয় যে ছোৱালীজনীক তেওঁৰ বিয়াৰ আগতে চুবুৰীয়াই ধৰ্ষণ কৰিছিল আৰু তেওঁ সুভাষ নগৰ আৰক্ষী থানাত এটা গোচৰ ৰুজু কৰিছিল। ধৰ্ষণৰ ঘটনাৰ বিষয়ে জানিবলৈ পোৱাৰ পিছত আৰু পৰীক্ষাত বিফল হোৱাৰ পিছত, মহিলাগৰাকীৰ স্বামী আৰু তেওঁৰ শাহুৱেকে তেওঁক হাৰাশাস্তি, অত্যাচাৰ আৰু প্ৰহাৰ কৰিবলৈ ধৰে। খাপ পঞ্চায়তে ৩১ মে’ত স্থানীয় মন্দিৰত এখন সভা আহ্বান কৰি ৰাজহুৱাভাৱে মহিলাগৰাকীৰ পৰিয়ালক ১০ লাখ টকাৰ জৰিমনা বিহে।
কুমাৰে লগতে কয় যে মহিলাগৰাকীৰ শহুৰেক এগৰাকী হেড কনিষ্টবল আৰু ছোৱালীজনীৰ সৈতে সংঘটিত ঘটনাটোৰ বিষয়ে তেওঁ আগতে অৱগত আছিল।
ইতিমধ্যে আৰক্ষীয়ে ঘটনা সন্দৰ্ভত ভাৰতীয় দণ্ডবিধিৰ ধাৰা ৪৯৮ ক (এগৰাকী মহিলাক বেআইনীভাবে দাবী পূৰণ কৰিবলৈ বাধ্য কৰা), ৩৮৪(ধন দাবী), ৫০৯ (মহিলাৰ শালীনতাক অপমান কৰা), আৰু ১২০ খ (অপৰাধমূলক ষড়যন্ত্ৰ)ৰ অধীনত শহুৰেকৰ বিৰুদ্ধে বাগোৰ আৰক্ষী থানাত এটা গোচৰ ৰুজু কৰিছে।
লগতে পঢ়ক: First inhaling Covid-19 vaccine: প্ৰথমখন দেশ হিচাপে কৰোনাভাইৰাছৰ ‘ইনহেলড’ ভেকচিনত অনুমোদন দিলে চীনে
ৰাষ্ট্ৰীয় মহিলা আয়োগে মহিলাগৰাকীৰ কুমাৰীত্ব পৰীক্ষাক প্ৰতিক্ৰিয়াশীল, বিদ্বেষমূলক আৰু মানৱ অধিকাৰৰ উলংঘন বুলি অভিহিত কৰিছে।