অসম জাতীয় পৰিষদৰ পৰা প্ৰাৰ্থিত্ব লাভ কৰাৰ পাছত বুধবাৰে প্ৰথমবাৰৰ বাবে খোৱাং সমষ্টিত উপস্থিত হয় দলটোৰ সভাপতি তথা বিৰোধী ঐক্যমঞ্চৰ প্ৰাৰ্থী লুৰীণজ্যোতি গগৈ। খোৱাঙত ভৰি থৈয়ে তেওঁ সমষ্টিটোৰ বৰ্তমানৰ বিধায়ক চক্ৰধৰ গগৈৰ বিৰুদ্ধে অতি সৰৱ হৈ পৰে। বিধায়কগৰাকীক নিমাতী কইনা আখ্যা দি লুৰীণজ্যোতি গগৈয়ে কয় যে বিধানসভাত ৰাইজৰ সমস্যাৰ কথা ক’বলৈ বিধায়কজনৰ কোনো শক্তি বা সাহস নাই। তেওঁ মুখ্যমন্ত্ৰীক আহ্বান জনাই কয় যে বিধায়কগৰাকীলৈ চৰকাৰে এখন নেমপ্লেট পঠিয়াই দিব লাগে য’ত লিখা থাকিব যে তেওঁ এজন নিমাতী কইনা আৰু বিধানসভাত কথা কোৱাৰ তেওঁৰ কোনো শক্তি নাই। কেৱল নিজৰ ভাতৃ আৰু ভনী জোঁৱাইৰ ঠিকা তথা কমিচনৰ কথা আহিলেহে বিধায়কজনৰ মুখৰ পৰা মাত ওলায় বুলি লুৰীণজ্যোতি গগৈয়ে গুৰুতৰ অভিযোগ উত্থাপন কৰে।
চক্ৰধৰ গগৈয়ে লুৰীণজ্যোতি গগৈক চালানী বুলি কৰা মন্তব্যৰো কঠোৰ প্ৰত্যুত্তৰ দিয়ে নেতাগৰাকীয়ে। তেওঁ কয় যে যাৰ ক’বলৈ কোনো উন্নয়নমূলক এজেণ্ডা নাই, তেওঁহে এনে নিম্ন মানদণ্ডৰ কথা কয়। অসমৰ প্ৰতিটো প্ৰান্তৰ প্ৰতিজন খিলঞ্জীয়া আৰু ভূমিপুত্ৰ মানুহ নিজৰ বুলি উল্লেখ কৰি তেওঁ কয় যে তেওঁৰ নিজৰ ঘৰ খনিকৰত হোৱাৰ পাছতো বিধায়কজনে যি অপপ্ৰচাৰ চলাইছে সেয়া অতি লাজলগা বিষয়। বিজেপি দলে হিন্দু-মুছলমানৰ মাজত বিভাজন অনাৰ দৰে বিধায়কজনেও এতিয়া স্থানীয় আৰু অস্থানীয়ৰ নামত বিভাজন আনিব বিচাৰিছে বুলি তেওঁ মন্তব্য কৰে। তেওঁৰ মতে খোৱাং সমষ্টিৰ মানুহে যিবোৰ পুখুৰীত মৎস্য পালন কৰি স্বাৱলম্বী হৈ আছিল, সেইবোৰৰ ওপৰতো বিধায়কগৰাকীৰ চকু পৰিছে।
লুৰীণজ্যোতি গগৈয়ে লগতে কয় যে বিধায়ক চক্ৰধৰ গগৈয়ে ৰাইজৰ ওচৰলৈ নিজৰ ৰিপ’ৰ্ট কাৰ্ড লৈ যাব নোৱাৰে। সমষ্টিটোৰ বাট-পথ, চেচুঘাট দলং, স্বাস্থ্য সেৱা, বিজ্ঞান মহাবিদ্যালয় আৰু বানপানী-খহনীয়াৰ দৰে মৌলিক সমস্যাসমূহ সমাধানৰ ক্ষেত্ৰত বিধায়কজন সম্পূৰ্ণ ব্যৰ্থ হৈছে। ৰাইজৰ আগত ক’বলৈ তেওঁৰ হাতত একো উত্তৰ নাই বাবেই তেওঁ এতিয়া ব্যক্তিগত আক্ৰমণত নামি পৰিছে। খোৱাং সমষ্টিৰ উন্নয়ন মানে কেৱল বিধায়কৰ পৰিয়াল আৰু ঘনিষ্ঠ লোকৰ উন্নয়ন বুলি অভিহিত কৰি লুৰীণজ্যোতি গগৈয়ে কয় যে এইবাৰ ৰাইজে বিজেপিৰ এই অপশাসন আৰু দুৰ্নীতিৰ বিৰুদ্ধে একত্ৰিত হৈ যুঁজ দিব লাগিব।
বিমানবন্দৰৰ পৰা খোৱাং সমষ্টিত উপস্থিত হোৱাৰ লগে লগে হাজাৰ হাজাৰ দলীয় কৰ্মী আৰু শুভাকাংক্ষীয়ে লুৰীণজ্যোতি গগৈক গায়ন-বায়ন আৰু ঢোলে-ডগৰে উষ্ম আদৰণি জনায়। খোৱাং চাৰিআলিৰ পৰা সমদল কৰি জয়মতী প্ৰেক্ষাগৃহলৈ যোৱাৰ সময়ত ৰাইজৰ উছাহ আছিল দেখিবলগীয়া। এই অনুষ্ঠানতে বিজেপিৰ কেইবাজনো কৰ্মীয়ে আনুষ্ঠানিকভাৱে অসম জাতীয় পৰিষদত যোগদান কৰে। খোৱাং সমষ্টিৰ ৰাইজৰ ৰাজনৈতিক পৰিপক্কতাৰ শলাগ লৈ গগৈয়ে কয় যে এই সমষ্টিটোৱে সদায় ঐতিহাসিক সিদ্ধান্ত দি আহিছে। তেওঁ নিজকে এজন সেৱক হিচাপে আগবঢ়াই দি ৰাইজৰ আশীৰ্বাদ আৰু অভিভাৱকত্ব বিচাৰে। আগন্তুক নিৰ্বাচনত তেওঁৰ যুঁজখন কোনো ব্যক্তিৰ লগত নহয়, বৰঞ্চ বিজেপিৰ দুৰ্নীতি আৰু চিণ্ডিকেটৰ বিৰুদ্ধেহে হ’ব বুলি তেওঁ দৃঢ়তাৰে প্ৰকাশ কৰে।
