গোৱালপাৰা আৰক্ষীৰ বৃহৎ সফলতা ৷ মাত্ৰ এদিনৰ ভিতৰতে উদ্ধাৰ কৰিলে জিলাখনৰ কৃষ্ণাইৰ পৰা অপহৃত ব্যৱসায়ী ৰবিউল ইছলামক ৷ ইয়াৰ বিপৰীতে অপহৰণকাণ্ডৰ সৈতে জড়িত থকা ৬ অপহৰণকাৰীকো অতি তৎপৰতাৰে আটক কৰিলে গোৱালপাৰা জিলা আৰক্ষীয়ে ৷
অৱশ্যে ইয়াৰ মাজতে আৰক্ষীৰ গুলীত আঘাতপ্ৰাপ্ত হয় ছাদ্দাম হুছেইন নামৰ অপৰাধীজন ৷
এই ঘটনা সন্দৰ্ভত আজি দুপৰীয়া গোৱালপাৰা জিলা আৰক্ষী অধীক্ষক ভি ভি ৰাকেশ ৰেড্ডীয়ে কৃষ্ণাই আৰক্ষী থানাত এক সংবাদ মেলৰ আয়োজন কৰি সমগ্ৰ অভিযানৰ বৰ্ণনা দাঙি ধৰে ৷
আৰক্ষী অধীক্ষক ৰেড্ডীয়ে জনোৱা অনুসৰি যোৱা ৯ নৱেম্বৰত মেঘালয়ৰ পৰা কৃষ্ণাইলৈ আহি থকাৰ পথত অপহৃত হৈছিল জিলাখনৰে কাৰাইখোৱা দেউধুতুৰী গাঁৱৰ ৰবিউল ইছলাম নামৰ লোকজন ৷
অৱশ্যে অপহৰণৰ তিনিদিন পিছত ১২ নৱেম্বৰতহে ৰবিউলৰ পৰিয়ালে ঘটনা সংক্ৰান্তত আৰক্ষীৰ ওচৰত এজাহাৰ দাখিল কৰে ৷ ইয়াৰ পিছতে জিলা আৰক্ষীয়ে ঘটনাটোক গুৰুত্ব সহকাৰে গ্ৰহণ কৰি অপহৃতক উদ্ধাৰ অভিযানত নামি পৰে আৰু সিদিনাই নিশা মৰনৈ আৰক্ষী থানাৰ অন্তৰ্গত পেটকাটাৰ পৰা ঘটনাৰ সৈতে জড়িত চাৰি অপৰাধীক আটক কৰে ৷ আৰক্ষী অধীক্ষক গৰাকীয়ে জনোৱা মতে সংবাদ মাধ্যমত প্ৰকাশ পোৱাৰ দৰে সিদিনা নিশা পেটকাটাত কোনো গুলীয়াগুলীৰ ঘটনা সংঘটিত হোৱা নাছিল ৷
মাত্ৰ এজন অপৰাধী পলাবলৈ চেষ্টা কৰোতে আৰক্ষীয়ে শূণ্যলৈ গুলীচালনা কৰি অপৰাধী জনক ধৰিছিল ৷ ইয়াৰ পিছতে কালি গোটেই দিন কৌশলপূৰ্ণ ভাৱে অভিযান চলাই আৰক্ষীয়ে মেঘালয়ৰ অৱাকাচিৰ কাষৰ গাপিলবিচাৰ পৰা অপহৃত ৰবিউল ইছলামক উদ্ধাৰ কৰিবলৈ সক্ষম হয় ৷
আৰক্ষী অধীক্ষক গৰাকীয়ে জনোৱা অনুসৰি , এই অভিযান কালতে ইতিমধ্যে পেটকাটাত গ্ৰেপ্তাৰ কৰা অপহৰণকাৰী এজন আৰক্ষীৰ হাতৰ পৰা পলায়ন কৰাৰ চেষ্টা কৰাৰ সময়তে অপহৰণকাৰী জনৰ ভৰিত গুলিয়ায় আৰক্ষীয়ে । গোৱালপাৰাৰ দামৰাত যোৱা নিশা সংঘটিত হয় এই ঘটনা ।
গুলিত আহত অপহৰণকাৰীজনৰ নাম ছাবদাম মাৰাক ওৰফে ছাদ্দাম হুছেইন । ছাদ্দাম হুছেইনৰ ঘৰ মানকাচৰৰ সুখচৰত । ছাদ্দাম হুছেইনৰ নেতৃত্বতে যোৱা ৯ নৱেম্বৰত অপহৰণ কৰা হৈছিল ৰবিউল ইছলামক । অপহৃত লোকজনক সোশৰীৰে মেঘালয়ৰ পৰা উদ্ধাৰ কৰাৰ পিছত আৰক্ষীয়ে ছাদ্দাম হুছেইনক লগত লৈ আন এটা অপহৰণকাৰীক কৰায়ত্ব কৰিবলৈ যাওঁতেই আৰক্ষীৰ হাতৰ পৰা পিষ্টল কাঢ়ি লৈ পলাবলৈ চেষ্টা কৰিছিল ছাদ্দাম হুছেইনে ।
আহত ছাদ্দাম হুছেইনক নিশাই গোৱালপাৰা অসামৰিক চিকিৎসালয়ত ভৰ্তি কৰোৱা হৈছে । অপহৰণৰ মূল মাষ্টাৰ মাইণ্ড ছাদ্দাম হুছেইনৰ উপৰি ইয়াৰ লগত জড়িত আন পাঁচ জন অপহৰণকাৰীকো আৰক্ষীয়ে গ্ৰেপ্তাৰ কৰিছে ।
গ্ৰেপ্তাৰ হোৱা অপৰাধী কেইজন হৈছে আনোৱাৰ হুছেইন (২৬ , ভেল্টাৰঘাট কৃষ্ণাই) , ছমেশ আলী (৪১ পেটকাটা ) , ৰমেশ আলী (৩৩ খলচামাৰি মানকাচৰ):আলী হুছেইন (৩২ কাবাইটাৰী যোগীঘোপা) ছাদ্দাম হুছেইন মাৰাক (২৫ ) আৰু ব্ৰন্সন পি মমিন (২১;গাপিলবিচা ৰংজেন মেঘালয়) ৷
উল্লেখযোগ্য যে জিলাখনৰ উপ আৰক্ষী অধীক্ষক অনুৰাগ শৰ্মা আৰু অতিৰিক্ত আৰক্ষী অধীক্ষক মৃণাল ডেকাৰ নেতৃত্বত অপহৃত লোকজনৰ উদ্ধাৰৰ বাবে অভিযান চলাইছিল আৰক্ষীয়ে । জিলা আৰক্ষীৰ সফলতাত সন্তোষ প্ৰকাশ কৰিছে ৰাজ্যৰ আৰক্ষী বিভাগৰ উৰ্দ্ধতন কৰ্তৃপক্ষই ৷
