উত্তৰ কোৰিয়াৰ শাসক কিম জং উনৰ কন্যা কিম জু এৰ শেহতীয়াকৈ এনে বহুতো ছবি পোহৰলৈ আহিছে য’ত তেওঁক পশ্চিমীয়া বিলাসী সাজ-পাৰ পৰিধান কৰা দেখা গৈছে। এনে কাপোৰক সাধাৰণতে বিদ্ৰোহৰ প্ৰতীক আৰু সমাজবাদ বিৰোধী বুলি গণ্য কৰি উত্তৰ কোৰিয়াত নিষিদ্ধ কৰা হৈছে। কিন্তু ইয়াক কৈশোৰৰ বিদ্ৰোহ বুলি ভবাৰ পৰিৱৰ্তে, জু এৰ কাপোৰৰ নিৰ্বাচন, যেনে লেডাৰ জেকেট বা হেয়াৰষ্টাইল আদিয়ে এই কথাৰেই ইংগিত দিয়ে যে তেওঁক ভৱিষ্যতৰ সৰ্বোচ্চ নেতা হিচাপে প্ৰস্তুত কৰা হৈছে।
২০১৩ চনত জন্মগ্ৰহণ কৰা জু এয়ে ২০২২ চনৰ নৱেম্বৰ মাহত মাত্ৰ ন বছৰ বয়সতে আনুষ্ঠানিকভাৱে প্ৰথমবাৰৰ বাবে ৰাজহুৱা স্থানত আত্মপ্ৰকাশ কৰিছিল। সেই সময়ত তেওঁক পিতৃৰ সৈতে এটা বিশাল ইণ্টাৰকণ্টিনেণ্টেল বেলিষ্টিক মিছাইলৰ সন্মুখত খোজকাঢ়ি থকা অৱস্থাত দেখা গৈছিল। দীঘল চুলি, ক’লা পেণ্ট আৰু বগা পেডেড জেকেট পৰিধান কৰি তেওঁক যথেষ্ট আকৰ্ষণীয় ৰূপত দেখা গৈছিল। তেতিয়াৰ পৰাই তেওঁৰ কেশসজ্জা আৰু সাজ-পাৰ ক্ৰমান্বয়ে পশ্চিমীয়া শৈলীৰ হৈ পৰিছে।
২০২০ চনত উত্তৰ কোৰিয়াই এক বিশেষ আইন প্ৰণয়ন কৰি বাহিৰা সংস্কৃতিৰ ওপৰত নিষেধাজ্ঞা আৰোপ কৰিছিল। কিন্তু ২০২৩ চনত ৰাজ্যিক নিয়ন্ত্ৰিত সংবাদ সংস্থাই প্ৰকাশ কৰা এটা ভিডিঅ’ত কিম জু এক পুনৰ পিতৃৰ সৈতে মিছাইলৰ সন্মুখত দেখা গৈছিল আৰু সেইবাৰ তেওঁ ক্ৰিষ্টিয়ান ডিঅ’ৰ ব্ৰেণ্ডৰ প্ৰায় এক লাখ আশী হাজাৰ টকা মূল্যৰ এটা ক’লা পেডেড জেকেট পিন্ধিছিল। ইয়াৰ পৰৱৰ্তী সময়তো ৰাজধানী পিয়ংইয়াঙৰ এক আৱাসিক এলেকাৰ উদ্বোধনী অনুষ্ঠানত তেওঁ পৰিধান কৰা সাজ-পাৰক লৈ যথেষ্ট চৰ্চা হৈছিল। যদিও চৰকাৰীভাৱে এনে সাজ-পাৰক সমাজবাদ বিৰোধী বুলি কোৱা হয়, তথাপিও এতিয়া একাংশ লোকে কিম জু এৰ এই ষ্টাইল অনুকৰণ কৰিবলৈ বিচাৰে। বিশেষজ্ঞসকলৰ মতে, সময় সলনি হৈছে আৰু প্ৰজন্মৰ পৰিৱৰ্তন যথেষ্ট ডাঙৰ হৈছে, বিশেষকৈ বিদেশত কাম কৰি ঘূৰি অহা শ্ৰমিকসকলে নিজৰ লগত বাহিৰা সংস্কৃতিও লৈ আহিছে।
অৱশ্যে জু এয়েই তেওঁৰ পৰিয়ালৰ প্ৰথম ফেশ্বন আইকন নহয়। তেওঁক তেওঁৰ মাতৃ ৰি ছোল জুৰ দৰেই ষ্টাইলিছ কাপোৰ পিন্ধোৱা হৈছে যাতে তেওঁৰ বয়স লুকুৱাই ৰাখিব পৰা যায়। ৰাজপৰিয়ালৰ বাহিৰে এগৰাকী সাধাৰণ যুৱতীয়ে পশ্চিমীয়া শৈলীৰ কাপোৰৰ সৈতে ফেশ্বনক আগুৱাই নিয়াটো উত্তৰ কোৰিয়াত প্ৰায় অসম্ভৱ। এনে কাপোৰ পিন্ধি কিম জু এ আৰু ৰি ছোল জুৱে এইটোৱেই প্ৰমাণ কৰিছে যে তেওঁলোকৰ সামাজিক মৰ্যাদা সাধাৰণ মানুহতকৈ সম্পূৰ্ণ বেলেগ। কেৱল মাতৃৰ পৰাই নহয়, জু এয়ে নিজৰ পিতৃৰ ফেশ্বন ছেন্সকো অনুসৰণ কৰিছে। পিতৃ-কন্যা দুয়োকে একেধৰণৰ লেডাৰ জেকেট আৰু ফাৰ কোট পিন্ধা দেখা গৈছে। উন্নত মানৰ লেডাৰৰ কাপোৰ পিন্ধাটো এক বিশেষ মৰ্যাদাৰ প্ৰতীক, যিটো উত্তৰ কোৰিয়াৰ সাধাৰণ মানুহৰ বাবে এক সপোন মাথোঁ।
পূৰ্বৰ প্ৰজন্মৰ ফেশ্বন অনুকৰণ কৰা কাৰ্য্যক ইমেজ ৰিপ্লিকেচন বুলি কোৱা হয় আৰু ক্ষমতাত বৰ্তি থাকিবলৈ ইয়াক ব্যৱহাৰ কৰি অহা হৈছে। কিম জং উনে নিজেও শাসনৰ প্ৰথম অৱস্থাত নিজৰ ককাক কিম ইল চুঙৰ দৰে টুপী আৰু কোট পিন্ধি নিজৰ ভাবমূৰ্তি শক্তিশালী কৰিবলৈ চেষ্টা কৰিছিল। ককাকৰ সৈতে থকা তেওঁৰ শাৰীৰিক সাদৃশ্যই ৰাইজৰ সৈতে সংযোগ স্থাপন কৰাত সহায় কৰিছিল। অৱস্থা এনেকুৱা হৈছিল যে উত্তৰ কোৰিয়াৰ মানুহৰ মাজত কিম ইল চুঙৰ পুনৰ্জন্ম হোৱা বুলিও উৰাবাতৰি বিয়পি পৰিছিল। উত্তৰ কোৰিয়াত কিম ইল চুংক ভগৱানৰ দৰে গণ্য কৰা হয় আৰু সেইবাবেই তেওঁৰ পৰিয়ালৰ প্ৰতিও মানুহৰ মনত এক সুকীয়া স্থান আছে। বৰ্তমান জু এক উত্তৰ কোৰিয়াত প্ৰিন্সেছ বা ৰাজকুমাৰী হিচাপে জনা যায়, যিটো নামাকৰণে তেওঁলোকৰ পূৰ্বপুৰুষৰ বংশ পৰম্পৰাৰ পিনেই আঙুলিয়াই দিয়ে।
