মতাদৰ্শ বেলেগ হোৱাৰ বাবে ইতিমধ্যে কৃষক মুক্তি সংগ্ৰাম সমিতিৰ সৈতে যে সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদে ঐক্যবদ্ধ হ’বলৈ মন মেলা নাই বুলি বেছ চৰ্চা চলিছে।
আনকি আছুৰ সভাপতিৰ লগতে এজেৱাইচিপিৰ সাধাৰণ সম্পাদক পলাশ চাংমাইৰ বক্তব্যত আওপকীয়াকৈ হ’লেও পৰিস্ফুট হৈছে যে কৃষক মুক্তিক তেওঁলোকৰ প্ৰস্তাৱিত ৰাজনৈতিক দলৰ সৈতে চামিল কৰিব খোজা নাই।
আছু আৰু এজেৱাইচিপিৰ নেতৃত্বই ইতিমধ্যে ৰাজনৈতিক দল গঠনৰ প্ৰথমটো খোজ পেলোৱা আৰম্ভ কৰিছে। পৰামৰ্শদাতা কমিটিৰ প্ৰতিবেদন ৰাজহুৱা কৰি “অসম প্ৰথম, সদায় আৰু চিৰদিন” এই মূলমন্ত্ৰৰে আৰম্ভ হ’ল ৰাজনৈতিক দল গঠনৰ কামকাজ।
তাৰ পাছতো আছুৰ সৈতে একত্ৰিত হৈ ঐক্যৱদ্ধ ৰাজনৈতিক বিকল্প প্ৰস্তুত কৰাৰ বাবে আশাবাদী কৃষক মুক্তি সংগ্ৰাম সমিতিৰ নেতৃত্ব।
আজি গান্ধীবস্তিস্থিত কৃষক মুক্তি সংগ্ৰাম সমিতিৰ কেন্দ্ৰীয় কাৰ্য্যালয়ত এক সংবাদমেল সম্বোধন কৰি সংগঠনটোৰ সভাপতি ভাস্ক’ ডি শইকীয়াই কয় ‘এতিয়াও আশাবাদী আমি একলগ হ’ম আৰু ঐক্যৱদ্ধ ,আপোচবিহীন শক্তি গঢ়ি তুলিম। যি শক্তিৰ ওচৰত বিজেপি, কংগ্ৰেছ, এআইয়ুডিএফ পৰাভুত হ’ব।‘
‘কৃষক মুক্তি সংগ্ৰাম সমিতিয়ে অসমত ঐক্যৱদ্ধ আপোচবিহীন আঞ্চলিক ৰাজনৈতিক শক্তি গঢ়িব বিচাৰিছিল আৰু ভৱিষ্যতেও বিচাৰি যাম।‘ ভাস্ক’ ডিয়ে লগতে কয়।
ইপিনে, জাতীয়তাবাদী সংগঠনসমূহে একেখন মঞ্চত থিয় হৈ কেতিয়াও কা বিৰোধিতা কৰা নাছিল বুলি স্বীকাৰ কৰি শইকীয়াই কয় ‘যাৰ বাবে ৫ গৰাকীকৈ শ্বহীদ হ’ল, অসমবাসীয়ে ত্যাগ স্বীকাৰ কৰিলে, অখিল গগৈ ন মাহ ধৰি কাৰাৰুদ্ধ হৈ আছে। তাৰ পাছতো কা বিৰোধী আন্দোলনত জিকিব নোৱাৰিলো।‘
শইকীয়াৰ মতে ‘২১ ৰ বিধান সভাৰ নিৰ্বাচনতো তেনেধৰণৰ ঘটনাই ঘটিব যদিহে সকলো জাতীয় সংগঠনে একেখন মঞ্চত থিয় হ’ব নোৱাৰো।‘
‘সেয়েহে বৰ্তমানো আহ্বান জনাই আছো যে অসমীয়াৰ স্বাৰ্থ সুৰক্ষিত কৰিবৰ বাবে ঐক্যৱদ্ধভাৱে ৰাজনৈতিক দল গঠন কৰিবই লাগিব। আগ্ৰাসী ৰাষ্ট্ৰীয়তাবাদক কেৱল ঐক্যৱদ্ধ জাতীয়তাবাদেহে পৰাভূত কৰিব পাৰিব।‘ আছু আৰু এজেৱাইচিপিৰ নেতৃত্বলৈ আহ্বান জনাই শইকীয়াই এইদৰে কয়।
ইপিনে, কালি পলাশ চাংমাইয়ে সংবাদ মাধ্যমত কৈছিল যে কৃষক মুক্তি সংগ্ৰাম সমিতিয়ে ইতিমধ্যে এটা দল ঘোষণা কৰিছে আৰু এই দলৰ মুখ্য মন্ত্ৰী হিচাপে অখিল গগৈক প্ৰক্ষেপ কৰি পৰিৱেশ বিনষ্ট কৰিছে।
এই সন্দৰ্ভত প্ৰতিক্ৰিয়া প্ৰকাশ কৰি শইকীয়াই কয় ‘পলাশ চাংমাইৰ বক্তব্যত ব্যৰ্থিত হৈছো। আমি কেতিয়াও অকলে দল গঠনৰে অসমৰ পৰিবেশ বিনষ্ট কৰিব বিচৰা নাই। যি কৰিব লাগে সকলোধৰণৰ প্ৰচেষ্টা সমূহীয়াকৈ কৰিবলৈ প্ৰস্তুত আছো।‘
শইকীয়াৰ দাবী ‘আলাপ আলোচনাৰে ঐক্যবদ্ধ দল গঠনৰ নেতৃত্ব কোনে কোনে দিব সেইটো থিৰাং কৰিব লাগে।‘
আনহাতে, কেইদিনমানৰ পূৰ্বে পলাশ চাংমাইক কৃষক মুক্তিয়ে এই কথা অতি স্পষ্টকৈ জনাই দিয়া বুলি দাবী কৰি শইকীয়াই কয় ‘অখিল গগৈক কোনোধৰণৰ মুখ্য মন্ত্ৰী পদৰ প্ৰাৰ্থীৰূপে প্ৰক্ষেপ কৰা নাই। আমাৰ দলৰ ফালৰ পৰা কোনোধৰণৰ চৰ্ত নাথাকে বুলি পলাশ চাংমাইক জনাই দিয়া হৈছিল।‘
ইপিনে, উক্ত সংবাদমেলতে কৃষক মুক্তি সংগ্ৰাম সমিতিৰ তৰফৰ পৰা এজনো প্ৰাৰ্থী প্ৰক্ষেপ নকৰিলেও তেওঁলোকে মানি ল’বলৈ প্ৰস্তুত বুলি উল্লেখ কৰি তেওঁ লগতে কয় ‘আনকি আমি এনেকৈয়ো কৈছিলো নিৰ্বাচনত ইমানখন আসন দিব লাগিব তেনে কোনো কথা নাই। আনকি এইটোও কৈছো নিৰ্বাচনত যদি কৃষক মুক্তিৰ এজনো প্ৰাৰ্থী নিদিয়ে তাতো আমাৰ আপত্তি নাই। আমি জাতীয় স্বাৰ্থত ঐক্যৱদ্ধ হ’ব বিচাৰিছো। ক্ষমতাৰ প্ৰতি আমি লালায়িত নহয়।‘
অৱশ্যে ভুলবশতঃ এজন সাংবাদিকে সোধাত শইকীয়াৰ মুখৰ পৰা মুখ্য মন্ত্ৰী পদৰ প্ৰাৰ্থী অখিল গগৈ হ’ব বুলি কিছুদিন পূৰ্বে ওলাই গৈছিল বুলি তেওঁ ভুল স্বীকাৰ কৰে।