“এ পি এছ চিৰ কেলেংকাৰি মোটামুটি গেলি গ’ল। এই তদন্তৰ পৰা অসমৰ ৰাইজে বৰ বেছি আশা কৰি লাভ নাই।”
অসম লোকসেৱা আয়োগৰ বক্ৰপথেৰে চাকৰি লোৱা ৯গৰাকী ৰাজপত্ৰিত বিষয়াই যোৱা ৪ অক্তোবৰৰ দিনা জামিন লাভ কৰাৰ পাছতেই সৰৱ হৈ পৰি গান্ধীবস্তিস্থিত কৃষক মুক্তি সংগ্ৰাম সমিতিৰ কেন্দ্ৰীয় কাৰ্য্যালয়ত সংবাদমেল অনুষ্ঠিত কৰি এই মন্তব্য কৰে অখিল গগৈয়ে।
তাৎপৰ্য্যপূৰ্ণভাৱে, এ পি এছ চিৰ কেলেংকাৰিৰ মূল খলনায়কসকল, তৰুণ গগৈ, হিমন্ত বিশ্ব শৰ্মা, সমুজ্জ্বল ভট্টাচাৰ্য্য আৰু গৌতম ৰয়ৰ দৰে ৰাজনৈতিক আৰু অৰাজনৈতিক দল-সংগঠনৰ নেতাই ৰাজনৈতিক পৃষ্ঠপোষকতাৰে যি কেলেংকাৰি কৰিছিল তাৰ তদন্ত এই পৰ্য্যন্ত নহ’ল বুলিও সংবাদমেলত অখিল গগৈয়ে অভিযোগ কৰে।
আনহাতে, বৰাকৰ প্ৰাক্তন মন্ত্ৰী গৌতম ৰয়ৰ বিৰুদ্ধেও সৰৱ হৈ পৰে কৃষক মুক্তি সংগ্ৰাম সমিতিৰ উপদেষ্টাগৰাকী।
তেওঁৰ মতে, “মই শুনিবলৈ পোৱা মতে বৰাকৰ প্ৰাক্তন মন্ত্ৰী গৌতম ৰয়ে কেইদিনমানৰ পাছতেই গংগাৰ পানীত গা ধুব। অৰ্থ্যাৎ কংগ্ৰেছৰ পৰা আহি বিজেপিত যোগদান কৰিব।”
আনহাতে, ৰাকেশ পালৰ দিনত হোৱাৰ দৰে একে পৰ্য্যায়ৰে কেলেংকাৰি বিজেপি চৰকাৰৰ দিনতো সংঘটিত হৈছে বুলি দাবী কৰে কৃষক নেতাগৰাকীয়ে। লগতে কিছুদিনৰ পাছতেই সেই কেলেংকাৰিৰ তথ্য ৰাজহুৱা কৰিব বুলি সংবাদমেলত অখিলে জনায়।
ইয়াৰোপৰি তেওঁ গুৱাহাটীৰ কোনো এটা এ পি এছ চি ক’চিং চেণ্টাৰৰ নাম উচ্চাৰণ নকৰাকৈ কয় যে গুৱাহাটীৰ এটা এপিএচছি ক’চিং চেণ্টাৰত প্ৰশিক্ষণ লোৱা গোটেই ছাত্ৰ-ছাত্ৰীয়ে এইবাৰ এ পি এছ চিৰ পৰীক্ষাত উত্তীৰ্ণ হৈ চাকৰি পাইছে।
তেওঁ লগতে উক্ত কেলেংকাৰিৰ তথ্যসমূহ সংগ্ৰহ কৰি থকা হৈছে জানিবলৈ দিয়াৰ লগতে কয় “অচিৰেই সংবাদমেল যোগে সমগ্ৰ তথ্য ৰাজহুৱা কৰাৰ লগতে তীব্ৰ আন্দোলনো গঢ়ি তোলা হ’ব।‘