গোৱালপাৰা জিলাৰ কৃষ্ণাইৰ ভেল্টাৰ ঘাট প্ৰাথমিক বিদ্যালয়ে শেহতীয়া গুণোৎসৱত ’এ’ গ্ৰেড লাভ কৰিবলৈ সক্ষম হৈছে। বিদ্যালয়খনৰ এই কৃতিত্বত বিদ্যালয় পৰিচালনা সমিতিৰ সভাপতি কাজিমুদ্দিন আহমেদে সমূহ ভেল্টাৰঘাটবাসীৰ হৈ বিদ্যালয় কৰ্তৃপক্ষৰ লগতে ছাত্ৰ-ছাত্ৰীসকলক ধন্যবাদ জ্ঞাপন কৰে।
উল্লেখ্য যে, ৫৯৫ গৰাকী ছাত্ৰ-ছাত্ৰী থকা বিদ্যালয়খনে আজি পৰ্যন্ত শ্ৰেণীকোঠাৰ অভাৱ অনুভৱ কৰি আহিছে। ইয়াৰ উপৰি বিদ্যালয়খনে পৰ্যাপ্ত শিক্ষকৰ অভাৱৰ দৰে এক জ্বলন্ত সমস্যাৰেও ভাৰাক্ৰান্ত হৈ আছে।
ইমানবোৰ অসুবিধাৰ বাবেই ভেল্টাৰঘাট প্ৰাথমিক বিদ্যালয়ত সুস্থিৰ পাঠদানত প্ৰায়েই ব্যাঘাত জন্মে বুলি স্থানীয় লোকে উল্লেখ কৰে। বিদ্যালয় কৰ্তৃপক্ষই বিভাগীয় কৰ্তৃপক্ষক বাৰম্বাৰ অনুৰোধ জনোৱাৰ পাছতো শিক্ষা বিভাগে বিষয়টো সন্দৰ্ভত আজিও গুৰুত্ব আৰোপ কৰা নাই বুলি গুৰুতৰ অভিযোগ উত্থাপন কৰে।
বিদ্যালয়খনৰ অসুবিধা সমূহ দূৰ কৰিবলৈ বিভাগীয় কৰ্তৃপক্ষক অতি শীঘ্ৰে ফলপ্ৰসু ব্যৱস্থা গ্ৰহণ কৰিবলৈ ৰাইজ তথা বিদ্যালয় পৰিচালনা সমিতিয়ে আহ্বান জনায়।
