ফেব্ৰুৱাৰীত শ্বুটিং! ‘ডায়েৰী অৱ মণিপুৰ’ৰ জৰিয়তে বলীউডত অভিষেক ঘটিব মহাকুম্ভৰ মনালিছাৰ
মহাকুম্ভ ২০২৫ য়ে সলাই পেলালে ভাগ্যৰ চকৰি। প্ৰয়াগৰাজত ভৰি দিয়াৰ পিছত নিশাৰ ভিতৰতে চাঞ্চল্যৰ সৃষ্টি কৰিছে পাথৰৰ হাৰ বিক্ৰেতা মনালিছা ভোছলেই। যাক লৈ বৰ্তমান সমগ্ৰ দেশতে উৎসুকতা বিয়পি পৰিছে।
পেটৰ দায়ত কুম্ভ মেলালৈ মালা বিক্ৰী কৰিবলৈ অহাৰ পিছত মেকুৰী চকুঁৱা এইগৰাকী যুৱতীয়ে গ্লেমাৰ জগতৰ পৰা আমন্ত্ৰণ পালে। ইয়াৰ পূৰ্বেও চৰ্চা হৈছিল যে তেওঁ আল্লু অৰ্জুনৰ নায়িকা হ’ব। সেই জল্পনা-কল্পনাৰ মাজতে মনালিছাৰ বলীউডত অভিষেক ঘটাৰ খবৰ আহিল।
যদিও দক্ষিণ ভাৰতীয় চলচ্চিত্ৰ জগতৰ খবৰ এতিয়াও চূড়ান্ত হোৱা নাই, তথাপিও হিন্দী মনোৰঞ্জন জগতত ভৰি দিয়াটো নিশ্চিত মনালিছা ভোছলে।
মহাকুম্ভৰ এই ভাইৰেল তাৰকাগৰাকীয়ে সনোজ মিশ্ৰৰ পৰিচালনাত নিৰ্মিত হ’ব লগা ‘মণিপুৰৰ ডায়েৰী’ ছবিত অভিনয় কৰিবলৈ ওলাইছে। যিয়ে ইয়াৰ পূৰ্বে ‘দ্য ডায়েৰী অৱ ৱেষ্ট বেংগল’ ছবিখন পৰিচালনা কৰিছিল। অৱশ্যে সেই চিনেমাখনে কেতিয়াও দিনৰ পোহৰ দেখা নাপালে!
শেহতীয়াকৈ পৰিচালকগৰাকীয়ে নিজেই মনালিছাৰ মহেশ্বৰৰ ঘৰলৈ গৈছিল। তাৰ পৰাই সনোজ মিশ্ৰই এখন ছবি পোষ্ট কৰি মনালিছাৰ বলীউডত অভিষেক ঘটোৱাৰ কথা ঘোষণা কৰে।
জানিব পৰা মতে অহা ফেব্ৰুৱাৰী মাহত ছবিখনৰ শ্বুটিং আৰম্ভ হ’ব। তাত কুম্ভ মেলাৰ পৰা ভাইৰেল হোৱা মনালিছায়ো যোগ দিব। পৰিচালনাৰ উপৰিও সনোজ নিজেই ‘মণিপুৰৰ ডায়েৰী’ ছবিখনৰ কাহিনীকাৰো।
ইয়াৰ পূৰ্বে খবৰ ওলাইছিল যে দক্ষিণৰ মনোৰঞ্জন জগতৰ পৰা মনালিছালৈ হেনো ফোন আহিছে। আল্লু অৰ্জুনে হেনো তেওঁক ‘পুষ্পা ৩’ত নায়িকা হিচাপে অভিনয় কৰাব বিচাৰিছে। যদি সচাঁকৈয়ে এনেকুৱা হয়, তেন্তে ভাগ্যৰ চকৰিটো ঘূৰি গৈছে! স্কুলৰ দুৱাৰমুখ কেতিয়াও পাৰ নোহোৱা ছোৱালীজনী। ঘৰত পিতৃ-মাতৃ। একমাত্ৰ উপাৰ্জনকাৰী। পাথৰৰ মালা বিক্ৰী কৰাটোৱে পেছা।
ভাইৰেল হোৱাৰ পিছত বিৰক্ত যুৱতীগৰাকীয়ে কয়, “মই বনোৱা মালাতকৈও মানুহে মোৰ প্ৰতি বেছি আগ্ৰহী। বিক্ৰী নাই। য’তেই যাওঁ মোৰ পিছে পিছে মানুহ দৌৰিছে। এই বছৰৰ মেলাখনে মোৰ সৰ্বনাশ কৰি পেলালে।” এই কথাত তেওঁৰ পৰিয়ালৰ লোক ইমানেই বিৰক্ত যে মনালিছাক কুম্ভমেলাৰ পৰা আঁতৰাই নি খাৰগাঁও জিলাৰ মহেশ্বৰত থকা ঘৰলৈ পঠিয়াই দিছে।