চলিত আই পি এলত কিংছ ইলেভেন পঞ্জাৱৰ অধিনায়ক কে এল ৰাহুল, মায়ংক আগৰৱাল, ক্ৰিছ গেইল আৰু নিকোলাছ পুৰাণৰ বেটিঙে ক্ৰিকেটপ্ৰেমীক আকৰ্ষিত কৰিছে যদিও সেই দলটোৰে আটাইতকৈ দামী বেটছমেনজনৰ হতাশাজনক প্ৰদৰ্শন এতিয়া চৰ্চাৰ মূল বিষয় হৈ পৰিছে।
২০২০ বৰ্ষৰ বাবে পঞ্জাৱত চুক্তিবদ্ধ হৈছিল বিশ্বৰ অন্যতম বিস্ফোৰক বেটছমেন গ্লেন মেক্সৱেল। তেওঁৰ অন্তৰ্ভুক্তিয়ে দলক অধিক মাত্ৰা প্ৰদান কৰিব বুলি মেনেজমেণ্ট আৰু অনুৰাগীয়ে আশা কৰিছিল যদিও বাস্তৱত সেয়া সম্ভৱ হৈ নুঠিল।
সম্পূৰ্ণ ছিজনটোত ১১টা ইনিংছত ১০৭টা বলৰ সন্মুখীন হোৱা এইগৰাকী বিস্ফোৰক বেটছমেনৰ বেটৰ পৰা নাহিল এটাও ছিক্স। যাৰ বাবে এতিয়া সৰ্বত্ৰে সমালোচনাৰ সন্মুখীন হৈছে মেক্সৱেল।
কিংছ ইলেভেন পঞ্জাৱে অষ্ট্ৰেলিয়াৰ এই গৰাকী ক্ৰিকেটাৰক ১০.৭৫ কোটি টকাৰ বিনিময়ত দলত চামিল কৰিছিল।
ইয়াৰ উপৰি মেক্সেৱেলে এইবাৰৰ ছিজনত খেলা ১১টা ইনিংছত এটাও অৰ্ধশতক অৰ্জন কৰিব নোৱাৰিলে। চলিত আই পি এলত তেওঁ মাত্ৰ এবাৰহে ৩০ৰ অধিক ৰান সংগ্ৰহ কৰিছে।
তেওঁ ২০১৬ৰ পিছত প্ৰথমবাৰৰ বাবে এটাও অৰ্ধশতক অৰ্জন নকাৰকৈয়ে আই পি এলৰ অভিযান সামৰিবলগীয়া হয় মেক্সৱেল।
উল্লেখ্য যে ইয়াৰ পূৰ্বে মেক্সৱেলে ২০১৪ চনত পঞ্জাৱৰ হৈ খেলিছিল আৰু সেইটো ছিজনত দুৰ্দান্ত প্ৰদৰ্শন আগবঢ়াইছিল।
২০১৪ৰ প্ৰদৰ্শনৰ ভিত্তিতে দলত মেক্সৱেলক পুনৰ এবাৰ চুক্তিবদ্ধ কৰা হয় যদিও এইবাৰ তেওঁ সকলোকে হতাশ কৰি তোলা পৰিলক্ষিত হৈছে।
ইফালে আই পি এল ২০২০ত সৰ্বোচ্চ ১৫.৫০ কোটি টকাৰে কলকাতা নাইট ৰাইডাৰ্ছে ক্ৰয় কৰা অষ্ট্ৰেলিয়াৰ বেগী বলাৰ পেট কামিনছনৰ প্ৰদৰ্শনেও হতাশ কৰিছে দল আৰু অনুৰাগীক।
কামিনছে চলিত ছিজনৰ ১৪ খন মেচত মাত্ৰ ১২ টাহে উইকেট দখল কৰিবলৈ সক্ষম হৈছে।