‘নাজানা মই কোন!’ এমবাপেক বৰ্ণবিদ্বেষী আক্ৰমণ কৰি ওলোটাই আইনী ভাবুকি পেৰাগুৱেৰ চিনেটৰৰ

বিশ্বকাপৰ সময়তে খেলপথাৰৰ বাহিৰৰ এক অত্যন্ত কুৎসিত বিতৰ্কই ফুটবল জগতত আলোড়নৰ সৃষ্টি কৰিছে। পেৰাগুৱেৰ চিনেটৰ চেলেষ্টে আমাৰিলাই ফ্ৰান্সৰ অধিনায়ক কাইলিয়ান এমবাপেক বৰ্ণবিদ্বেষী আৰু অকথ্য ভাষাৰে আক্ৰমণ কৰে।

চিনেটৰগৰাকীয়ে ফৰাচী তাৰকাগৰাকীক ‘উপনিবেশৰ বলি এগৰাকী কেমেৰুনিয়ান’ বুলিও ঠাট্টা কৰে। ইয়াতেই শেষ নহয়৷ তেওঁ লগত কয়, ‘তেওঁ ফৰাচীসকলক শাস্তি দিবলৈ যৎপৰোনাস্তি চেষ্টা কৰি আছে, আচলতে তেওঁ এজন হতাশ, নীচ, অহংকাৰী আৰু কুৎসিত মানুহ!’

পেৰাগুৱেৰ বিৰুদ্ধে ফ্ৰান্সৰ জয়ৰ পিছত আমাৰিলাই দাবী কৰিছিল যে ফ্ৰান্সে ভাগ্যৰ বলত জয়ী হৈছে আৰু গোটেই মেচখনতে ভয়ত বিতত হৈ আছিল। এনে ঘৃণনীয় মন্তব্যৰ কঠোৰ প্ৰত্যুত্তৰ দিবলৈ এমবাপেও কুণ্ঠাবোধ কৰা নাই। তেওঁ চিনেটৰগৰাকীক ‘ঘৃণনীয় মহিলা’ ​​বুলি অভিহিত কৰি কয় যে তেওঁ সেই পদৰ বাবে সম্পূৰ্ণ অযোগ্য। ইয়াৰ পিছত পৰিস্থিতি আৰু অধিক উত্তপ্ত হৈ পৰে। এমবাপেৰ এই মন্তব্যৰ পিছতে আমাৰিলাই ছ’চিয়েল মিডিয়াত এটা দীঘলীয়া পোষ্ট দি আক্ৰমণ তীব্ৰ কৰি তোলে।

নিজৰ পক্ষত যুক্তি দিবলৈ গৈ আমাৰিলাই ফৰাচী-প্ৰেমৰ কথা উল্লেখ কৰে। তেওঁ দাবী কৰে যে ফ্ৰান্সৰ প্ৰতি তেওঁৰ কোনো ক্ষোভ নাই। তেওঁ সৰুৰে পৰা ফৰাচী স্কুলত পঢ়িছিল আৰু ফ্ৰান্সত ছুটী কটাবলৈ ভাল পাইছিল। তেওঁৰ সকলো খং কেৱল এমবাপেক কেন্দ্ৰ কৰি।

ফ্ৰান্সৰ অধিনায়কগৰাকীয়ে খেলপথাৰত চৰম অহংকাৰ দেখুৱাইছিল বুলি অভিযোগ কৰি আমাৰিলাই লিখিছে, “মেচৰ আগৰে পৰাই তোমাৰ অহংকাৰ আৰু অৱজ্ঞাই মোৰ স্নায়ুচাপ বৃদ্ধি কৰিছিল। তুমি কৈছিলা, যদি আমি হাত লেতেৰা কৰিব লাগে তেন্তে আমি লেতেৰা কৰিম। আমি মূৰ্খ নহয়। মই জানো যে তুমি পেৰাগুৱেৰ দলটোক লেতেৰা বুলি কৈছা!”

ইয়াৰ পাছতে আমৰিলাই এমবাপেৰ বিৰুদ্ধে খেলপথাৰত লেটিন আমেৰিকাৰ এটা অতি কুৎসিত গালি-গালাজ ব্যৱহাৰ কৰাৰ আৰু মেচৰ শেষত পেৰাগুৱেৰ গ’লৰক্ষকজনক সন্মান নকৰাৰ অভিযোগ উত্থাপন কৰে। তেওঁ কয় যে এমবাপেক ওলোটাই আক্ৰমণ কৰিবলৈ গৈ খঙৰ ভমকতে তেওঁ বৰ্ণবিদ্বেষী মন্তব্য কৰিছিল, যিটো তেওঁ পিছত ডিলিটো কৰিছে।

তেওঁ বৰ্ণবিদ্বেষী মন্তব্যৰ বাবে অনুশোচনা প্ৰকাশ কৰে যদিও চিনেটৰগৰাকীয়ে এমবাপেৰ ‘ঘৃণনীয় মহিলা’ ​​মন্তব্যৰ বাবে ফৰাচী তাৰকাগৰাকীয়ে তেওঁৰ ওচৰত ক্ষমা বিচাৰিব লাগিব বুলি দাবী কৰে। তেওঁ অতি অহংকাৰী সুৰত লিখিছে, ‘তোমাৰ হিংসাত্মক আচৰণ মইও সহ্য নকৰো। তুমি মোক চিনি নোপোৱা, মই কোন সেই সম্পৰ্কে তোমাৰ কোনো ধাৰণাই নাই। মোৰ পদৰ বাবে মোক অযোগ্য বুলি কোৱাৰ অধিকাৰ তোমাক কোনেও দিয়া নাই!’

পেৰাগুৱেৰ জনসাধাৰণৰ নিৰ্বাচিত প্ৰতিনিধি বুলি দাবী কৰি আমাৰিলাই এমবাপেক সকীয়াই দিয়ে। তেওঁৰ সতৰ্কবাণী হৈছে, ‘তুমি মোক চিনি নোপোৱাৰ বাবেই এনে ঘৃণনীয় কথা কৈছা। এইটো স্পষ্টভাৱে লিংগ আৰু ৰাজনীতিপ্ৰসূত  হিংসা। তুমি এজন ফৰাচী নাগৰিক হিচাপে তোমাৰ মন্তব্যৰ বাবে ক্ষমা বিচাৰা, নহ’লে মই তোমাৰ বিৰুদ্ধে লিংগভিত্তিক হিংসাৰ অভিযোগত আইনী ব্যৱস্থা ল’বলৈ বাধ্য হ’ম।’

এই বোকা ছটিওৱা পৰিস্থিতিৰ মাজতে ফ্ৰান্সৰ ৰাষ্ট্ৰপতি ইমানুৱেল মেক্ৰনে নিজেই এমবাপেৰ কাষত ঢাল হিচাপে থিয় দিছে। তেওঁ চিনেটৰগৰাকীৰ এই মন্তব্যক তীব্ৰ গৰিহণা দি ছ’চিয়েল মিডিয়াত লিখিছে, ‘কাইলিয়ান এমবাপেৰ আন এটা গ’ল। অৱশ্যে এইবাৰ এইটো বৰ্ণবাদৰ বিৰুদ্ধে। মোৰ সম্পূৰ্ণ সমৰ্থন আছে। যেতিয়া শব্দই আমাক কলুষিত কৰে, তেতিয়া মূল্যবোধে উত্তৰ দিয়ে: মৰ্যাদা, সন্মান আৰু ভ্ৰাতৃত্ববোধেৰে!’

ফ্ৰান্সৰ ফুটবল ফেডাৰেচনেও এই ঘটনাক তীব্ৰ সমালোচনা কৰিছে। ইতিমধ্যে তেওঁলোকে এই মন্তব্যক ‘অপৰাধমূলক আৰু নিন্দনীয়’ বুলি অভিহিত কৰি আইনী ব্যৱস্থা গ্ৰহণৰ বাবে প্ৰচিকিউটৰৰ কাৰ্যালয়ত অভিযোগ দাখিল কৰিছে।

তাৎপৰ্যপূৰ্ণভাৱে পেৰাগুৱে চৰকাৰে আমাৰিলাৰ মন্তব্যৰ দায়িত্ব অস্বীকাৰ কৰি এক বিবৃতি প্ৰকাশ কৰি কয় যে এই বক্তব্য সম্পূৰ্ণৰূপে চিনেটৰজনৰ ব্যক্তিগত মতামত আৰু ই কোনো কাৰণতে পেৰাগুৱে চৰকাৰ বা দেশখনৰ জনসাধাৰণৰ মূল্যবোধক প্ৰতিনিধিত্ব নকৰে।