লাডাখত এতিয়াৰে পৰা এবাৰ ব্যৱহাৰ কৰা প্লাষ্টিক সম্পূৰ্ণৰূপে নিষিদ্ধ কৰা হৈছে। এই নিয়ম কঠোৰভাৱে বলৱৎ কৰিবলৈ লাডাখ প্ৰশাসনে লেহ বিমানবন্দৰ আৰু লাডাখৰ সীমাত থকা প্ৰৱেশদ্বাৰসমূহত হঠাতে তালাচী চলোৱাৰ সিদ্ধান্ত লৈছে। যদি কোনো লোকৰ হাতত এনে নিষিদ্ধ প্লাষ্টিক পোৱা যায়, তেন্তে তেওঁলোকে দহ হাজাৰ টকা পৰ্যন্ত জৰিমনা ভৰিব লাগিব। লাডাখৰ লেফটেনেণ্ট গভৰ্ণৰ বিনয় কুমাৰ ছাক্সেনাই ছচিয়েল মিডিয়াৰ জৰিয়তে এই কথা জানিবলৈ দিছে। তেওঁ কয় যে লাডাখৰ ধুনীয়া প্ৰাকৃতিক সৌন্দৰ্য আৰু স্পৰ্শকাতৰ পৰিৱেশ ৰক্ষা কৰাৰ বাবেই এই কঠোৰ সিদ্ধান্ত লোৱা হৈছে।
এই নতুন নিয়ম অনুসৰি, সাধাৰণ মানুহৰ লগতে হোটেল, ৰেষ্টুৰেণ্ট বা আন ব্যৱসায়িক প্ৰতিষ্ঠানসমূহে যদি এনে প্লাষ্টিক ব্যৱহাৰ, বিক্ৰী বা জমা কৰি ৰাখে, তেন্তে তেওঁলোকক দহ হাজাৰ টকাৰ জৰিমনা বিহা হ’ব।
ইয়াৰ উপৰিও, ৰাজহুৱা স্থানত আৱৰ্জনা পেলালে পাঁচ হাজাৰ টকাৰ জৰিমনা ভৰিব লাগিব। এই নিয়মসমূহ গাঁৱে-ভূঁয়ে আৰু পৰ্যটনস্থলীসমূহত কঠোৰভাৱে বলবৎ কৰিবলৈ খণ্ড উন্নয়ন বিষয়া, তহচিলদাৰ, পৌৰ বিষয়া আৰু বন বিভাগৰ বিষয়াসকলক বিশেষ ক্ষমতা প্ৰদান কৰা হৈছে। তেওঁলোকে এতিয়াৰে পৰা নিয়ম ভংগকাৰীক ধৰিব পাৰিব আৰু জৰিমনাৰ ৰচিদ দিব পাৰিব।
লেফটেনেণ্ট গভৰ্ণৰ গৰাকীয়ে লগতে উল্লেখ কৰে যে লাডাখৰ পৰিৱেশেই ইয়াৰ পৰ্যটন উদ্যোগৰ মূল ভেটি আৰু ইয়াক বিশ্বমানৰ পৰ্যটনস্থলী হিচাপে গঢ়ি তুলিবলৈ পৰিৱেশ ৰক্ষা কৰাটো অতি প্ৰয়োজনীয়। লাডাখৰ দৰে ঠাণ্ডা অঞ্চলত প্লাষ্টিক সহজে গেলি-পঁচি নাযায়, যাৰ বাবে ই পৰিৱেশৰ বিস্তৰ ক্ষতি কৰে। প্ৰতি বছৰে লেহ, নুব্ৰা ভেলী আৰু পেংগং হ্ৰদৰ দৰে ঠাইবোৰলৈ লাখ লাখ পৰ্যটক আহে, যাৰ ফলত প্লাষ্টিকৰ আৱৰ্জনা যথেষ্ট বৃদ্ধি পায়। সেয়েহে, লাডাখলৈ যোৱা সকলো পৰ্যটককে নিজৰ লগত কোনো ধৰণৰ নিষিদ্ধ প্লাষ্টিক নিনিবলৈ অনুৰোধ জনোৱা হৈছে যাতে এই সুন্দৰ অঞ্চলটোৰ পৰিৱেশ পৰিষ্কাৰ আৰু সুৰক্ষিত হৈ থাকে।
