যি সময়ত কেন্দ্ৰীয় চৰকাৰে ডাকসেৱাৰ আধুনিকীকৰণৰ বাবে কেতবোৰ অভিলাষী আঁচনি হাতত লৈছে সেই সময়তে ৰাজ্যৰ একাংশ ডাকঘৰৰ শোচনীয় অৱস্থাই সাধাৰণ ৰাইজক বাৰুকৈয়ে জলা-কলা খুৱাই আহিছে।
এনে এটা ডাকঘৰ হৈছে মৰিগাঁও জিলাৰ লাহৰীঘাট উপ-ডাকঘৰ। উল্লেখযোগ্য যে কেন্দ্ৰীয় চৰকাৰৰ নতুন নীতি-নিয়মানুসাৰে ডাকঘৰৰ কাম-কাজৰ পৰিসৰ যথেষ্ট বৃদ্ধি হৈছে। কিন্তু উক্ত ডাকঘৰটোৰ এশ এবুৰি সমস্যাই গ্ৰাহক ৰাইজক সেৱা দিয়াৰ বিপৰীতে যমৰ যাতনাহে ভোগাইছে। তাৰোপৰি ভুতৰ ওপৰত দানহৰ দৰে বৃহত্তৰ লাহৰীঘাট অঞ্চৰ অনিয়মীয়া বিদ্যুৎ যোগানেও বিভিন্ন কাম-কাজত যথেষ্ট অসুবিধা দি আহিছে।
উল্লেখযোগ্য যে শেহতীয়া নিৰ্দেশনা অনুসৰি অন্যান্য ডাকঘৰৰ লগতে লাহৰীঘাট উপ-ডাকঘৰটো বিত্তীয় লেনদেন, আধাৰ কাৰ্ডকে ধৰি বিভিন্ন কাম-কাজ সম্পাদন কৰিব লাগে। তাৰোপৰি আধাৰ কাৰ্ড প্ৰাপ্তিৰ কাৰণে ডাকঘৰত একাউণ্ট থকাটো বাধ্যতামূলক কৰা হৈছে, যাৰ পৰিপ্ৰেক্ষিতত লোকসকল ডাকঘৰৰ ওপৰত অধিক নিৰ্ভৰশীল হৈ পৰিছে।
কিন্তু সমস্যাৰে ভাৰাক্ৰান্ত তথা কোনোধৰণৰ ন্যূনতম সুবিধা নথকা ডাকঘৰটোৰ অৱস্থাই স্থানীয় গ্ৰাহকক ভীষণ হাৰাশাস্তিহে দিয়া বুলি একাংশ ভূক্তভোগী ৰাইজে অভিযোগ কৰিছে। উপ-ডাকঘৰটোত সাধাৰণ লোকৰ বাবে দূৰৰে কথা জ্যেষ্ঠ নাগৰিকৰ বাবেও বহাৰ কোনো সুব্যৱস্থা নাই। ফলত গ্ৰাহকসকলে ঘণ্টাই ঘণ্টাই থিয় দি থাকি কাম-কাজ সম্পাদন কৰিবলৈ বাধ্য হয়।
আনহাতে, প্ৰাপ্ত অভিযোগ অনুসৰি সম্প্ৰতি কাৰ্যালয়টোত বিত্তীয় লেনদেনৰ ক্ষেত্ৰতো বহু সমস্যাই দেখা দিছে। যাৰ বাবে নিজৰ কষ্টোপাৰ্জিত জমা ধনৰাশি মোকলাবলৈও গ্ৰাহকসকলে তিক্ত যন্ত্ৰণা ভোগ কৰিব লাগে। তাতে আকৌ কেতিয়াবা লিংক নাই, কেতিয়াবা ছাৰ্ভাৰ ডাউন। আনকি উপ-ডাকঘৰটোৰ অধীনস্থ ১১টা শাখা ডাকঘৰৰ কোনো এজন কৰ্মচাৰীয়ে অন্তিম মাহৰ দৰমহা লাভ কৰা নাই।
এই সকলো বিলাকৰ উপৰি চোৱাচিতাৰ অভাৱত ডাকঘৰটোৰ এটাৰ লোহাৰ চন্দুক বিগত ছমাহ ধৰি মাটিত পৰিত্যক্ত অৱস্থাত পৰি থাকি মামৰে ধৰি সম্প্ৰতি নিঃশ্চিহ্ন হ’বলৈ ধৰিছে।
ভূক্তভোগী লাহৰীঘাটবাসীয়ে শীঘ্ৰে উক্ত সকলো সমস্যাৰ ক্ষেত্ৰত বিহিত ব্যৱস্থা গ্ৰহণ কৰিবলৈ বিভাগীয় কৰ্তৃপক্ষক দাবী জনাইছে।
