ক’ভিডৰ দ্বিতীয় ঢৌৱে ভাৰতবাসীক জ্বলা-কলা দেখুৱাৰ সময়তে মোদী চৰকাৰক তীব্ৰ সমালোচনা কৰিছে বিশ্বৰ এখন আগশাৰীৰ স্বাস্থ্য সম্পৰ্কীয় পত্ৰিকায়ে।
দা লেনচেট (The Lancet) নামৰ সাপ্তাহিক পত্ৰিকাখনৰ শেহতীয়া শনিবাৰৰ সংস্কৰণটোৰ দাবী, ভাৰতৰ বৰ্তমান ক’ভিড পৰিস্থিতি মোদী চৰকাৰে নিজেই সৃষ্টি কৰা আৰু চৰকাৰে নিজৰ ভুল স্বীকাৰ নকৰাৰ ফলত সংকট অধিক বৃদ্ধি পাইছে।
পত্ৰিকাখনে কয় যে যদি মোদী চৰকাৰে বিচাৰে, তেনেহ’লে ক’ভিডক ভাৰতৰ পৰা বিদায়ো জনাব পাৰে।
পত্ৰিকাখনৰ সম্পাদকীয় বিভাগত লিখা হৈছে যে বাৰে বাৰে সতৰ্ক কৰি থকা স্বত্বেও চৰকাৰে ধৰ্মীয় উৎসৱ পালন আৰু ৰাজনৈতিক সভাৰ দৰে অতি সংক্ৰামক অনুষ্ঠান হ’বলৈ দিছে, যি দেশখনলৈ বিপদ মাতি আনিছে।
তদুপৰি চৰকাৰৰ সমালোচকসকলৰ মাত বন্ধ কৰা আৰু পৰামৰ্শ গ্ৰহণ নকৰাৰ চৰকাৰী মনোভাৱৰ ফলতো ভাৰতত সংকট বাঢ়িছে বুলি পত্ৰিকাখনে অভিযোগ কৰে।
পত্ৰিকাখনে কয় যে ইয়াৰ বাবে মোদী চৰকাৰক কোনোপধ্যেই ক্ষমা কৰিব পৰা নাযায়।
২০২০ বৰ্ষৰ কৰোণাৰ প্ৰথম ঢৌক প্ৰতিহত কৰাৰ ক্ষেত্ৰত মোদী চৰকাৰে যি সাফল্য লাভ কৰিছিল, দ্বিতীয় ঢৌৱে সেই সাফল্যক তছনছ কৰি দিয়া বুলি পত্ৰিকাখনে কয়।
উল্লেখযোগ্য যে পত্ৰিকাখন বিশ্বৰ ভিতৰতে অন্যতম পুৰণি স্বাস্থ্য সম্পৰ্কীয় পত্ৰিকা।
১৮২৩ চনতে প্ৰথম প্ৰকাশ পোৱা ইংৰাজী পত্ৰিকাখনে স্বাস্থ্য সম্পৰ্কীয় বিভিন্ন লেখা, আলোচনা, গৱেষণা ইত্যাদি প্ৰকাশ কৰি আহিছে।
