মহানগৰীৰ উজান বজাৰৰ ইছলাম পট্টিত শনিবাৰে নিশা এক চাঞ্চল্যকৰ ঘটনা সংঘটিত হয়। ড্ৰাগছ বিক্ৰী কৰি থকাৰ খৱৰ পাই লতাশিল আৰক্ষী থানাৰ চাৰিজনীয়া পুলিচৰ দল এটা নিশা প্ৰায় ১১ মান বজাত উজান বজাৰৰ ইছলাম পট্টিত উপস্থিত হোৱাৰ পিছতেই সংঘটিত হয় এক অপ্ৰীতিকৰ ঘটনা।
লতাশিল থানাৰ আৰক্ষী পৰিদৰ্শক সুনীল কলিতাই নৰ্থ ইষ্ট নাওক জানিবলৈ দিয়া অনুসৰি আৰক্ষীৰ উপস্থিতিৰ উমান পোৱাৰ লগে লগেই তাত থকা যুৱকসকল পলাই পত্ৰং দিয়ে।
ইছলাম পট্টিৰে এজন ড্ৰাগছ ব্যৱসায়ী মোজামিল হক ওৰফে আপাৰ নেতৃত্বতে অঞ্চলটোত ড্ৰাগছৰ ৰমৰমীয়া ব্যৱসায় চলি থকা বুলি লতাশিল আৰক্ষীয়ে আমাক জানিবলৈ দিয়ে।
উল্লেখ্য যে পূৰ্বেও লতাশিল আৰক্ষীয়ে মোজ্জামিলক দুবাৰকৈ বৃহৎ পৰিমাণৰ ড্ৰাগছ সহ আটক কৰিছিল।
ইপিনে আৰক্ষীয়ে জানিবলৈ দিয়া মতে কৰ্তব্যৰত অৱস্থাত থকা আৰক্ষী দলটোকহে উক্ত অঞ্চলৰ ৰাইজে ওলোটাই আগচি ধৰে আৰু শিলগুটি দলিয়াবলৈ আৰম্ভ কৰে। ঘটনাস্থলীৰ পৰাই আৰক্ষীকেইগৰাকীয়ে লতাশিল থানাত ফোন কৰাৰ পিছত আৰক্ষীৰ আন এটা দল গৈ ঘটনাস্থলীত উপস্থিত হয়।
আৰক্ষীৰ অভিযোগ অনুসৰি উক্ত অঞ্চলৰ লোকসকলে ড্ৰাগছ ব্যৱসায়ীকহে বহুদিন ধৰি সুৰক্ষা দি আহিছে আৰু এইসকল লোক আৰক্ষীৰ ঘোৰ বিৰোধী তথা ড্ৰাগছ ব্যৱসায়ীৰ পূৰ্ণ সমৰ্থক।
উল্লেখ্য যে, শিলগুটি দলিওৱাৰ লগতে উক্ত অঞ্চলৰ লোকসকলে আৰক্ষীৰ বাহনৰো ক্ষতিসাধন কৰে। ইপিনে, আৰক্ষীৰ লোকসকল কথমপি ঘটনাস্থলীৰ পৰা পলায়ন কৰাত কোনো লোক আহত নহ’ল বুলি জানিব দিছে। দুয়োপক্ষৰ মাজত হোৱা সংঘাতৰ পৰিণতিত আৰক্ষীৰ তিনিখন বাহনৰ ক্ষতিসাধন হোৱা বুলি জানিব পৰা গৈছে।
আনহাতে, স্থানীয় লোকে অভিযোগ কৰে যে আৰক্ষীয়ে নীতি বহিৰ্ভুতভাৱে তেওঁলোকৰ ঘৰ দুৱাৰ ভাঙি দিয়ে আৰু একাংশ লোকক নিৰ্বিচাৰে প্ৰহাৰ কৰে যাৰ ফলত কিছু উত্তেজনামূলক পৰিস্থিতিৰ সৃষ্টি হয়। ইয়াৰ বিপৰীতে আৰক্ষীয়ে এই অভিযোগ অস্বীকাৰ কৰি একাংশ লোকে নিজেই ঘৰ দুৱাৰ ভাঙি লোৱা বুলিহে কয়। অৱশ্যে, এইক্ষেত্ৰত কোন সঁচা, কোন মিছা সেয়া পৰৱৰ্তী সময়ত পোহৰলৈ আহিব।
ইপিনে ঘটনা সংক্ৰান্তত লতাশিল আৰক্ষীয়ে নিজাববীয়াকৈ ১৮৯/১৮ নং আৰু ১৪৭/১৪৮/১৪৯/৩৫৩/৪২৭ ধাৰাত এক গোচৰ ৰুজু কৰি বৰ্তমান দুস্কৃতিকাৰীসকলৰ বিৰুদ্ধে অভিযান চলাই আছে।
বৰ্তমান আৰক্ষীয়ে মোজ্জামিল আৰু আৰক্ষীৰ বাহন ক্ষতিগ্ৰস্ত কৰাসকলৰ বিৰুদ্ধে অভিযান চলাই আছে যদিও কোনো লোকক আটক কৰিব পৰা নাই।