অসম আন্দোলনৰ সৈতে জড়িত নেতা তথা অগপৰ প্ৰাক্তন বিধায়ক কিৰন চন্দ্ৰ গগৈৰ শনিবাৰে পুৱতি নিশা পৰলোকপ্ৰাপ্তি ঘটে। জাতীয়তাবাদী নেতা জনৰ চিকিৎসাধীন অৱস্থাত অসম চিকিৎসা মহাবিদ্যালয়ত মৃত্যু হয়।
অসম আন্দোলনত জড়িত থকা গগৈয়ে অসম গণ পৰিষদ দল গঠন হোৱাৰ পাছতে ১৯৮৫ চনত মৰাণ সমষ্টিৰ পৰা দলটোৰ বিধায়ক হিচাপে নিৰ্বাচিত হৈছিল। অৱশ্যে, ইয়াৰ পাছত ৯১’ আৰু ৯৬’ৰ নিৰ্বাচনত তেওঁ পৰাজিত হৈছিল।
পৰৱৰ্তী সময়ত অসম সাহিত্য সভাৰ সতে বিশেষভাৱে জড়িত হোৱাৰ উপৰি ২০১০চনত ডিব্ৰুগড় জিলা সাহিত্য সভাৰ সভাপতি হৈছিল। তেওঁ অসম সাহিত্য সভাৰ কাৰ্যনিৰ্বাহক সদস্যও আছিল। তদুপৰি, তেওঁ লেজাই উচ্চতৰ মাধ্যমিক বিদ্যালয়ত শিক্ষকতা কৰিছিল।
দুয়োটা কিডনী বিকল হৈ পৰা গগৈ দীৰ্ঘদিন ধৰি অসুস্থ হৈ আছিল। বিশিষ্ট লেখক, শিক্ষাবিদ, জাতীয়তাবাদী নেতা তথা প্ৰাক্তন বিধায়ক গৰাকীৰ মৃত্যুত ডিব্ৰুগড়ত শোকৰ ছাঁ পৰিছে।
ইপিনে, অসম সাহিত্য সভাৰ প্ৰাক্তন কাৰ্যনিৰ্বাহক সদস্য, ডিব্ৰুগড় জিলা সাহিত্য সভাৰ প্ৰাক্তন সভাপতি, অসম আন্দোলনৰ নেতা, প্ৰাক্তন বিধায়ক কিৰণ চন্দ্ৰ গগৈৰ বিয়োগত অসম সাহিত্য সভাৰ গভীৰ শোক প্ৰকাশ।
প্ৰয়াত কিৰণ চন্দ্ৰ গগৈৰ কৰ্মময় জীৱন আৰু জাতীয় জীৱনৰ প্ৰতি দায়ৱদ্ধতা নতুন প্ৰজন্মৰ বাবে প্ৰেৰণাৰ আদৰ্শ হৈ জিলিকি ৰ’ব বুলি অসম সাহিত্য সভাৰ সভাপতি ড০পৰমানন্দ ৰাজবংশীয়ে এক শোকবাৰ্তা যোগে মন্তব্য কৰে।
কিৰণ চন্দ্ৰ গগৈৰ বিয়োগ অসমৰ সমাজ জীৱনৰ এক অপূৰণীয় ক্ষতি বুলি অভিহিত কৰি অসম সাহিত্য সভাৰ সভাপতি তথা প্ৰধান সম্পাদকগৰাকীয়ে শোকসন্তপ্ত পৰিয়ালক সমবেদনা জ্ঞাপন কৰাৰ লগতে বিদেহী আত্মাৰ সদগতি কামনা কৰিছে।
