অইল ইণ্ডিয়া লিমিটেড দুলীয়াজানৰ অন্তৰ্গত বাঘজান আৰু মধুবন সংযোগী তেল আৰু গেছ পৰিবাহী পাইপ লাইনৰ যোৱা ১৪ ছেপ্টেম্বৰত চট’ হাপজানৰ ১৯ নং বাগানত তেল নিৰ্গত হৈ হাপজান নদীৰ উপকণ্ঠ অঞ্চলত ব্যাপক প্ৰদূষণৰ সৃষ্টি কৰিছে।
উল্লেখ যোগ্য যে এই নিৰ্গত হোৱা তেলৰ পৰা বৰ্তমান পক্ষীৰ বাবে পৃথিৱী বিখ্যাত মাগুৰী মতাপুং বিলত ব্যাপক প্ৰদূষণ হৈছে। লগতে স্থানীয় মাছমৰীয়া সকলো শংকিত হৈ পৰিছে তাৰোপৰি পক্ষীকুলৰ বাবেও এই প্ৰদূষণে অশনি সংকেত কঢ়িয়াই আনিছে।
ইয়াৰ ফলত বিলৰ জৈৱ্য- বৈচিত্ৰ্যৰ ওপৰতো বিৰূপ প্ৰভাৱ নিশ্চিতভাৱে পৰিব। সেয়েহে এই বিষয়ত অতি সোনকালে উপযুক্ত কাৰ্যব্যৱস্থা গ্ৰহণ কৰিবৰ কাৰণে জিলা প্ৰশাসন আৰু অইল ইণ্ডিয়া লিমিটেডক দাবী উত্থাপন কৰিছে বন্যপ্ৰাণী আৰু পৰিৱেশ সংৰক্ষণ সংস্থাটোৱে।
‘WECO’ নামৰ পৰিৱেশ সংগঠনটোৰ সম্পাদক মানৱ চুতীয়াই ন’ৰ্থ ইষ্ট নাওক জানিবলৈ দিয়া মতে আজি পৰা প্ৰায় দুবছৰ পূৰ্বে অনুৰূপ ধৰণৰ অইল পাইপৰ পৰা কিছু পৰিমাণৰ তেল নিৰ্গম হৈছিল যদিও সেই সময়ত অইল ইণ্ডিয়াই স্থানীয় ৰাইজক ক্ষতিপূৰণ দিয়া হ’ব বুলি আশ্বাস দিছিল।
কিন্তু সেই আশ্বাস কেৱল আশ্বাসতে থাকিল আজি পৰ্য্যন্ত কোনোধৰণৰ ক্ষতিপূৰণৰ ব্যৱস্থা গ্ৰহণ নকৰিলে অইল ইণ্ডিয়াই।
আনহাতে এইবাৰ বিশ্ব বিখ্যাত পক্ষীকুলৰ আৱাস এলেকা মাগুৰী মতাপুং বিললৈ কঢ়িয়াই অনা ভাবুকি নিৰ্মূল কৰিবলৈ দাবী জানাইছে । অন্যথা মাগুৰী মতাপুং বিল ৰক্ষাৰ স্বাৰ্থত ৰাইজৰ সহযোগত তীব্ৰ আনন্দোলনৰ হুংকাৰ দিছে।