ভাৰতীয় শাস্ত্ৰীয় সংগীতৰ কিংবদন্তি শিল্পী ওস্তাদ গুলাম মুস্তাফা খান আৰু নাই।
দেওবাৰে বিয়লি মুম্বাইৰ বান্দ্ৰাত থকা নিজা বাসভৱনত শিল্পীগৰাকীয়ে শেষ নিশ্বাস ত্যাগ কৰে।
মৃত্যুৰ সময়ত তেওঁৰ বয়স হৈছিল ৮৯ বছৰ।
খানৰ বোৱাৰীয়েক নম্ৰতা গুপ্তা খানে প্ৰকাশ কৰা মতে আজি পুৱালৈকে শিল্পীগৰাকী সুস্থ অৱস্থাতে আছিল যদিও দুপৰীয়া তেওঁ বমি কৰে আৰু অজ্ঞান হৈ পৰে।
ইয়াৰ কিছু সময় পিছতে তেওঁ শেষ নিশ্বাস ত্যাগ কৰে।
পদ্ম বিভূষণ সন্মানেৰে সন্মানিত শিল্পী খানে ভাৰতীয় শাস্ত্ৰীয় সংগীতৰ জগত খনলৈ অতুলনীয় অৱদান আগবঢ়াই গৈছে।
২০১৯ চনত ষ্ট্ৰোক হোৱাৰ পিছৰে পৰা শিল্পী গৰাকীৰ দেহৰ বাওঁ ফালটো পক্ষাঘাতত আক্ৰান্ত হৈছিল।
১৯৩১ চনৰ ৩ মাৰ্চত উত্তৰ প্ৰদেশৰ বাদাউনত জন্মগ্ৰহণ কৰা খানে পৰৱৰ্তী সময়ত শাস্ত্ৰীয় সংগীতৰ নতুন ধাৰা সৃষ্টিত সফল হৈছিল।
১৯৯১ চনত তেওঁক ভাৰত চৰকাৰে পদ্মশ্ৰী, ২০০৬ চনত পদ্মভূষণ আৰু ২০১৮ চনত পদ্মবিভূষণ সন্মানেৰে সন্মানিত কৰিছিল।
২০০৩ চনত তেওঁক প্ৰদান কৰা হৈছিল সংগীত নাটক অকাডেমী বঁটা। শিল্পীগৰাকীৰ মৃত্যুত বিভিন্ন জনে গভীৰ শোক ব্যক্ত কৰিছে।