ল’কডাউন চলি থকাৰ মাজতেই আজি বিয়লি গোলাঘাটত এদল দুস্কৃতিকাৰীয়ে এটা নাহৰফুটুকী বাঘৰ পোৱালী হত্যা কৰে। এক বিশেষ সূত্ৰৰ আধাৰত গোলাঘাটৰ আৰক্ষীয়ে অভিযান চলায় নগৰৰ বেঙেনাখোৱাৰ সমীপৰ টাৰফট আহোম গাঁৱত আজি বিয়লি নাহৰফুটুকী বাঘটোৰ মৃতদেহ উদ্ধাৰ কৰে।
এদল মানুহে নাহৰফুটুকী বাঘৰ পোৱালীটোক হত্যা কৰি মাংস কাটি ভক্ষণ কৰাৰ পৰিকল্পনা কৰিছিল। কিন্তু ঘটনাৰ বিষয়ে আৰক্ষীয়ে গম পোৱাত তেওঁলোকে নাহৰফুটুকীৰ মৃতদেহটো গাতত পুতি থয়।
গোলাঘাট থানাৰ আৰক্ষী উপ-পৰিদৰ্শক মিৰেল আহমেদৰ নেতৃত্বত যোৱা আৰক্ষীৰ এটা দলে অভিযান চলাই গাতত পুতি থোৱা নাহৰফুটুকী পোৱালীটোৰ মৃতদেহ উদ্ধাৰ কৰে যদেও ঘটনাস্থলীৰ পৰা দুস্কৃতিকাৰী দলটো আৰক্ষী অহাৰ আগতেই পলায়ন কৰে ৷
পিছত উদ্ধাৰ খৰা নাহৰফুটুকী পোৱালীটোৰ মৃতদেহ আৰক্ষীয়ে গোলাঘাটৰ বনবিভাগৰ হাতত অৰ্পণ কৰে। ঘটনা সন্দৰ্ভত অধিক তথ্যৰ বাবে আৰক্ষী আৰু বন বিভাগে অনুসন্ধান আৰম্ভ কৰিছে। মৃত নাহৰফুটুকী বাঘৰ মৃতদেহৰ মৰণোত্তৰ পৰীক্ষাৰ ব্যৱস্থা কৰিছে বন বিভাগে।
