সমকামী আৰু যৌনকৰ্মীৰ ৰক্তদান নিষিদ্ধ কৰাৰ বিৰুদ্ধে উচ্চতম ন্যায়ালয়ত গোচৰ ৰুজু হৈছিল। সেই গোচৰত উচ্চতম ন্যায়ালয়ে এইবাৰ কেন্দ্ৰীয় চৰকাৰক জাননী জাৰি কৰিছিল। কিয় এনে গাইডলাইন দিয়া হ’ল সেই সন্দৰ্ভত চৰকাৰৰ পৰা স্পষ্টীকৰণ বিচাৰিছিল ন্যায়ালয়ে।
২০১৭ চনৰ চৰকাৰী গাইডলাইনৰ পৰা আৰম্ভ হৈছিল এই বিতৰ্ক। সেই সময়ত কেন্দ্ৰই ৰক্তদান সন্দৰ্ভত গাইডলাইন জাৰি কৰিছিল। ইয়াত কোৱা হৈছে যে সমকামী, যৌনকৰ্মীয়ে ৰক্তদান কৰিব নোৱাৰে। ৰক্তদানৰ যোগ্য লোকৰ তালিকাৰ পৰা বাদ পৰিল। কাৰণ হিচাপে তেজৰ সংক্ৰমণৰ সম্ভাৱনা উল্লেখ কৰা হৈছিল। চৰকাৰী গাইডলাইনত কোৱা হৈছে যে যৌন সংক্ৰামক ৰোগৰ সম্ভাৱনা সমকামী আৰু যৌনকৰ্মীৰ তেজৰ পৰাই আছে। পুৰুষৰ সৈতে যৌন সম্পৰ্ক স্থাপন কৰা (MSM) অৰ্থত সমকামী পুৰুষৰ কথা গাইডলাইনত উল্লেখ কৰা হৈছিল। কেন্দ্ৰৰ গাইডলাইন অনুসৰি এই তিনিটা গোটৰ লোকে কেতিয়াও ৰক্তদান কৰিব নোৱাৰে।
সামাজিক কৰ্মী তথা সাংবাদিক শ্বৰীফ ডি ৰঙানেকাৰে এই নিৰ্দেশক প্ৰত্যাহ্বান জনাই উচ্চতম ন্যায়ালয়ত গোচৰ তৰে। শুকুৰবাৰে মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত উচ্চতম ন্যায়ালয়ৰ বিচাৰপীঠৰ সন্মুখত শুনানিৰ বাবে এই গোচৰটো আহিছিল। বাদীসকলে দাবী কৰে যে এনে নিৰ্দেশনাসমূহ সমকামীৰ বিষয়ে প্ৰাচীন আৰু অবাস্তৱ ধাৰণাসমূহৰ ওপৰত ভিত্তি কৰি গঢ় লৈ উঠিছে। এই ধাৰণাটো ১৯৮০ চনত আমেৰিকাত প্ৰচলিত ধাৰণাবোৰৰ দ্বাৰাও প্ৰভাৱিত বুলি কোৱা হয়। এই সন্দৰ্ভত স্পষ্টীকৰণ বিচাৰি ন্যায়াধীশগৰাকীয়ে কেন্দ্ৰীয় চৰকাৰক জাননী জাৰি কৰে। ৰাষ্ট্ৰীয় এইডছ নিয়ন্ত্ৰণ সংস্থা আৰু ৰাষ্ট্ৰীয় ৰক্ত সঞ্চালন পৰিষদকো অৱগত কৰা হৈছে। এই সন্দৰ্ভত তেওঁলোকৰ বক্তব্য নিৰ্দিষ্ট সময়ৰ ভিতৰত উচ্চতম ন্যায়ালয়ত অৱগত কৰিব লাগে।
