ক’ৰ’ণাতংকই ৰাজ্যত সংহাৰৰ সৃষ্টি কৰি থকাৰ সময়তে অসম ৰাজ্যিক চিৰিয়াখানাৰ নতুন আলহী হ’ল তিনিটাকৈ প্ৰাণী।
সংকটৰ এই সময়তে অসম ৰাজ্যিক চিৰিয়াখানাৰ বিষয়া-কৰ্মচাৰী সকলৰ মুখত হাঁহি বিৰিঙাই চিৰিয়াখানাত জন্ম হ’ল এটা সিংহ আৰু দুটাকৈ বাঘৰ পোৱালিৰ।
জন্ম লাভ কৰা বাঘৰ পোৱালি দুটাৰ ভিতৰত এটা মতা পোৱালি আৰু আনটো মাইকী পোৱালি।
দৰাচলতে মে’ মাহৰ প্ৰথম সপ্তাহতে এই পোৱালি তিনিটাৰ জন্ম হৈছিল যদিও চিৰিয়াখানা কৰ্তৃপক্ষই পোৱালি কেইটাৰ স্বাস্থ্যৰ দিশটো লক্ষ্য কৰি থকাৰ পৰিপ্ৰেক্ষিততে কথাটো ৰাজহুৱা কৰা নাছিল।
সম্প্ৰতি তিনিওটা পোৱালি সুস্থ অৱস্থাত থকা বুলি অসম ৰাজ্যিক চিৰিয়াখানাৰ বন সংমণ্ডল বিষয়া তেজাছ মাৰিয়াস্বামীয়ে প্ৰকাশ কৰিছে।
বন বিষয়া গৰাকীয়ে প্ৰকাশ কৰা মতে মে’ মাহৰ প্ৰথম সপ্তাহত সিংহৰ পোৱালিটো জন্ম পোৱাৰ এসপ্তাহ পিছতেই বাঘৰ পোৱালি দুটাৰ জন্ম হয়।
চিৰিয়াখানাত থকা সিংহ আৰু সিংহিনী ক্ৰমে ভিকি আৰু ৰাণীৰ পোৱালিটোৰ নাম ৰখা হৈছে ছাম্বা।
একেদৰে বাঘৰ মতা পোৱালিটোৰ নাম ৰখা হৈছে চুলতান।
চুলতান বাঘ আৰু বাঘিনী ক্ৰমে ধনুছ আৰু কাজীৰ পোৱালি। বাঘৰ মাইকী পোৱালিটোৰ নাম এতিয়ালৈকে ৰখা হোৱা নাই।