কোভিড-১৯ৰ বিশেষকৈ নতুন ভেৰিয়েন্ট অ’মিক্ৰণৰ আতংকই পুনৰ এবাৰ বিশ্বক সন্ত্ৰস্ত কৰি তোলাৰ সময়ত প্ৰতিদিনেই সংক্ৰমণে অভিলেখ গঢ়িবলৈ আৰম্ভ কৰিছে। কৰ’নাৰ সংক্ৰমণৰ এই মাৰাত্মক প্ৰভাৱৰ পৰা সাৰি নগ’ল আৰ্জেন্টিনাৰ কিংবদন্তি ফুটবলাৰ লিঅ’নেল মেছিও।
মেছিৰ ক্লাব পেৰিছ ছা-জাঁ’ৰ (PSG)ৰ পৰা দেওবাৰে তেওঁ আক্ৰান্ত হোৱাৰ খৱৰ সদৰী কৰা হয়। কেবল মেছিয়েই নহয়, পিএছজিৰ আন তিনিগৰাকী সতীৰ্থৰ দেহতো ধৰা পৰিছে কৰ’না পজিটিভ।
পিএছজিৰ এক বিবৃতিত কোৱা হৈছে,’’যি চাৰিগৰাকী খেলুৱৈৰ কৰ’না পজিটিভ ধৰা পৰিছে তেওঁলোক হ’ল লিও মেছি, জুৱান বাৰ্ণাট, ছাৰ্জিঅ’ ৰিকো আৰু নাথন বিতুমাজালা। তেওঁলোক বৰ্তমান আইছ্যলেশ্যনত আছে আৰু সকলো কোভিড বিধি মানি চলিছে।‘’
সোমবাৰে ফ্ৰান্সৰ কুপ-ডে ফ্ৰান্সৰ প্ৰতিযোগিতাত ভেনাছৰ বিৰুদ্ধে হ’বলগীয়া পিএছজিৰ খেলখনত কৰ’না আক্ৰান্ত মেছি আৰু তেওঁৰ তিনি সতীৰ্থই খেলিব নোৱাৰিব।
