সাধাৰণতে ওঁঠৰ ক’লা দাগ প্ৰসাধন সামগ্ৰীৰে ঢাকি ৰখা হয় যদিও ইয়াৰ আকস্মিক ৰং পৰিৱৰ্তনে শৰীৰত বাহ লৈ থকা কোনো গুৰুতৰ ৰোগৰ ইংগিত বহন কৰিব পাৰে। চিকিৎসা বিজ্ঞানৰ পৰ্যবেক্ষণ অনুসৰি, ওঁঠৰ স্বাভাৱিক গুলপীয়া আভা সলনি হৈ হালধীয়া, ক’লা বা নীলা হ’বলৈ ধৰিলে সেয়া আওকাণ কৰাটো বিপজ্জনক হ’ব পাৰে। ধুমপান নকৰা ব্যক্তি এগৰাকীৰ ক্ষেত্ৰতো যদি ওঁঠৰ ৰঙৰ এনে অস্বাভাৱিক পৰিৱৰ্তন দেখা যায়, তেন্তে ইয়াৰ দ্বাৰা শৰীৰৰ বিভিন্ন জটিল ৰোগৰ উপস্থিতি সহজতেই চিনাক্ত কৰিব পৰা যায়।
ওঁঠৰ স্বাভাৱিক গুলপীয়া ৰঙ হেৰুৱাই অতিৰিক্তভাৱে শেঁতা বা বগা পৰিলে ই শৰীৰত হিম’গ্ল’বিনৰ মাৰাত্মক ঘাটি হোৱাটো সূচায়। শৰীৰত আইৰণৰ অভাৱ হ’লে বা ৰক্ত সঞ্চালন সঠিকভাৱে নহ’লে ওঁঠৰ সূক্ষ্ম ৰক্তনলীবোৰত পৰ্যাপ্ত তেজ নাপায়, যাৰ ফলত ওঁঠ শেঁতা পৰে। ইয়াৰ উপৰি ৰক্তচাপ হ্ৰাস পালে বা ভিটামিন বি-১২ৰ অভাৱ হ’লেও ওঁঠৰ ৰং শেঁতা পৰিব পাৰে। আনহাতে, ওঁঠৰ ৰং হঠাৎ নীলা বা বেঙুনীয়া হোৱাটো তেজত অক্সিজেনৰ ঘাটি হোৱাৰ লক্ষণ হ’ব পাৰে। দীৰ্ঘদিন ধৰি হাঁপানী, চিঅ’পিডি বা নিউম’নিয়াৰ দৰে শ্বাস-প্ৰশ্বাসজনিত ৰোগত ভুগি থকা লোকৰ ক্ষেত্ৰতো এনে সমস্যা দেখা যায়। তদুপৰি জন্মগতভাৱে হৃদযন্ত্ৰৰ ৰোগ থাকিলেও ওঁঠৰ ৰং নীলা হ’ব পাৰে।
লিপষ্টিক ব্যৱহাৰ নকৰাকৈয়ে ওঁঠ অস্বাভাৱিকভাৱে গাঢ় ৰঙা দেখা গ’লে সেয়া যকৃতৰ ৰোগৰ লক্ষণ হ’ব পাৰে। বহু সময়ত প্ৰসাধন সামগ্ৰীৰ পৰা হোৱা এলাৰ্জিৰ ফলতো ওঁঠৰ কোষত প্ৰদাহৰ সৃষ্টি হয়, যাৰ বাবে ওঁঠ ফুলি ৰঙা পৰাৰ লগতে জ্বলা-পোৰা কৰিব পাৰে। আনহাতে, ওঁঠ বা ইয়াৰ আশে-পাশে থকা ছালত হালধীয়া ভাব ফুটি উঠিলে ই জণ্ডিচৰ লক্ষণ হ’ব পাৰে। পিত্তাশয়ত পাথৰ জমা হ’লে, যকৃতত কোনো সংক্ৰমণ ঘটিলে বা যকৃতত ক্ষত সৃষ্টি হ’লেও ওঁঠৰ ৰং হালধীয়া হ’ব পাৰে। একেদৰে অতিৰিক্ত ধুমপান, অত্যাধিক চাহ-কফি পান বা ম্যাদ উকলি যোৱা লিপষ্টিকৰ ব্যৱহাৰৰ ফলত ওঁঠত মেলানিন জমা হৈ ক’লা দাগ পৰাটো এক সাধাৰণ সমস্যা যদিও শৰীৰত হৰম’নৰ ভাৰসাম্যহীনতা হ’লেও ওঁঠত ক’লা ছাব পৰিব পাৰে।
ইয়াৰ লগতে ওঁঠৰ ৰং যদি বিবৰ্ণ বা ধূসৰ বৰণীয়া দেখা যায়, তেন্তে সেয়া বিপাকীয় ক্ৰিয়াজনিত ত্ৰুটিৰ কাৰণে হ’ব পাৰে। শৰীৰত কোষ্ঠকাঠিন্য বা দীৰ্ঘদিনীয়া এচিডিটিৰ সমস্যা থাকিলেও ওঁঠৰ ৰঙৰ এনে অস্বাভাৱিক পৰিৱৰ্তন ঘটিব পাৰে। সামগ্ৰিকভাৱে, ওঁঠৰ ৰঙৰ পৰিৱৰ্তনে শৰীৰৰ আভ্যন্তৰীণ স্বাস্থ্যৰ অৱস্থা প্ৰতিফলিত কৰে, সেয়েহে এনে পৰিৱৰ্তন দেখা দিলে ইয়াক আওকাণ নকৰি সঠিক সময়ত চিকিৎসকৰ পৰামৰ্শ গ্ৰহণ কৰাটো আৱশ্যক।
