ক্ষমতাত অধিষ্ঠিত হোৱাৰ মাত্ৰ ৪৫ দিনৰ ভিতৰতে ব্ৰিটেইনৰ প্ৰধানমন্ত্ৰী পদৰ পৰা পদত্যাগ কৰিছে লিজ ট্ৰাছে। শেহতীয়াকৈ গ্ৰহণ কৰা মিনি বাজেট তথা ‘টেক্স- শ্লেজিং পলিচি’ৰ ফলশ্ৰুতিত সৃষ্টি হোৱা বিতৰ্কৰ ফলস্বৰূপে প্ৰধানমন্ত্ৰী পদ ত্যাগ কৰিছে ট্ৰাছে।
পূৰ্ব প্ৰধানমন্ত্ৰী বৰিছ জনচনৰ পদত্যাগৰ পিছত শাসনলৈ অহা ট্ৰাছে এইদৰে মাত্ৰ ৪৪ দিনতে পদত্যাগ কৰাৰ পিছত ব্ৰিটিছ ইতিহাসৰ আটাইতকৈ কম সময়ৰ বাবে কাৰ্যনিৰ্বাহ কৰা প্ৰধানমন্ত্ৰী হিচাপে পৰিগণিত হৈছে।
ট্ৰাছৰ পদত্যাগৰ পিছতে এতিয়া ব্ৰিটেইনৰ নতুন প্ৰধানমন্ত্ৰী হিচাপে কোনে নিযুক্তি পাব, সেই লৈ ব্যাপক চৰ্চা আৰম্ভ হৈছে। প্ৰধানমন্ত্ৰী পদৰ বাবে এইবাৰ পুনৰ চৰ্চালৈ আহিছে প্ৰাক্তন চেঞ্চেলৰ ঋষি চুনাকৰ নাম।
বৰিছ জনচনৰ পদত্যাগৰ পিছতে প্ৰধানমন্ত্ৰী পদৰ বাবে প্ৰবল দাবীদাৰ ৰূপে ঋষি চুনাকৰ নাম শীৰ্ষত আছিল যদিও নিৰ্বাচনত ট্ৰাছৰ বিৰুদ্ধে পৰাজিত হ’বলগীয়া হৈছিল চুনাক।
এতিয়া ট্ৰাছৰ পদত্যাগৰ পিছত প্ৰধানমন্ত্ৰী পদৰ বাবে পুনৰবাৰ অন্যতম দাবীদাৰ হিচাপে চুনাকৰ নাম চৰ্চিত হৈছে। অৱশ্যে চুনাকৰ বাদেও প্ৰধানমন্ত্ৰী পদৰ প্ৰাৰ্থী হিচাপে ৰাজকোষৰ চেন্সেলৰ জেৰেমি হান্টৰ নাম উচ্চাৰিত হৈছে।
উল্লেখ্য যে পদত্যাগৰ কথা ঘোষণা কৰাৰ সময়তে ট্ৰাছে আজি এসপ্তাহৰ ভিতৰত তেওঁৰ উত্তৰাধিকাৰীৰ নাম দলে ঘোষণা কৰিব বুলি জানিবলৈ দিয়। তেতিয়ালৈকে অৱশ্যে প্ৰধানমন্ত্ৰী হিচাপে কাৰ্যভাৰ চলাই নিব বুলিও ট্ৰাছে লগতে কয়।
