মহানগৰীৰ আমচাং বনাঞ্চলত অবৈধভাৱে দখল কৰি থকা লোকসকলক উচ্ছেদক লৈ বিতৰ্ক অব্যাহত থকাৰ সময়তে এইবাৰ ভূমি অৱণ্টনৰ দাবীত ওলাই আহিছে নুনমাটিৰ চূণচালিৰ বহু পৰিয়াল।
শনিবাৰে চূণচালি গ্ৰাণ্টৰ মাটিত বসবাস কৰি অহা প্ৰায় ২০ হাজাৰ থলুৱা পৰিয়ালৰ নামত ভূমি অৱণ্টনৰ দাবীত দীঘলী পুখুৰীত থকা লক্ষীধৰ বৰা ক্ষেত্ৰত অৱস্থান ধৰ্মঘট কাৰ্যসূচী হাতত লয় পূব গুৱাহাটী ভূমি সংস্কাৰ সমিতিয়ে।
পাঁচ শতাধিক লোকৰ উপস্থিতিত এই কাৰ্যসূচী ৰূপায়ণৰ অন্তত সংগঠনটোৱে গুৱাহাটীৰ চক্ৰ বিষয়াৰ জৰিয়তে মুখ্য মন্ত্ৰীলৈ এখন স্মাৰক পত্ৰ প্ৰেৰণ কৰে।
উল্লেখ্য যে, চূণচালি গ্ৰাণ্টত বসবাস কৰা এই লোকসকলক পূৰ্বৰ কংগ্ৰেছ চৰকাৰে ১ কঠা পাঁচ লেচাকৈ ভূমি আৱণ্টন দিয়াৰ প্ৰতিশ্ৰুতি দিয়া বুলি পূব গুৱাহাটী ভূমি সংস্কাৰ সমিতিৰ সভাপতি ডম্বৰুধৰ তালুকদাৰে জানিবলৈ দিয়ে।
তেওঁ কয়, “পূৰ্বতে চূণচালি গ্ৰাণ্টৰ ৩৯৯২ বিঘা ২ কঠা ১৯ লেচা মাটিক লৈ অসম চৰকাৰ আৰু ফ্ৰণ্টিয়াৰ এছ’চিয়েশ্যন নামৰ সংস্থাৰ মাজত গুৱাহাটী উচ্চ ন্যায়ালয়ত গোচৰ চলি আছিল। সেইবাবে তেতিয়াৰ কংগ্ৰেছ চৰকাৰে ভূমি আৱণ্টন কৰিব পৰা নাযাব বুলি জানিবলৈ দিছিল আৰু এই আইনী জটিলতা আঁতৰিলেই ভূমি আৱন্টন দিয়াৰ প্ৰতিশ্ৰুতি দিছিল। কিন্তু ২০১৪ চনৰ ২০ মে’ত উচ্চতম ন্যায়ালয়ৰ ৰায় অনুসৰি এই মাটি অসম চৰকাৰৰ অধীনলৈ যায়। গতিকে এই ভূমি আমাক আৱণ্টন দিয়াত এতিয়া কোনো অসুবিধা নাই।”
সমিতিখনে জানিবলৈ দিয়া মতে পূৰ্বৰ চৰকাৰৰেই এক হঠকাৰী সিদ্ধান্ত মৰ্মে উচ্চ ন্যায়ালয়ে এক নিৰ্দেশনা যোগে কয় যে চূণচালি গ্ৰাণ্টত থকা এই লোকসকলৰ অসমৰ আন কোনো ঠাইত নিজৰ বা, পিতৃ-মাতৃৰ নামত ভূমি নাথাকিলেহে চৰকাৰৰ পৰা আৱণ্টন লাভ কৰিবলৈ যোগ্য বিবেচিত হ’ব।
ন্যায়ালয়ৰ এই নিৰ্দেশনাই সমস্যাত পেলাইছে চূণচালি গ্ৰাণ্টৰ বাসিন্দাসকলক। পৰবৰ্তী সময়ত এই নিৰ্দেশনা পুনঃ বিবেচনা কৰিবলৈ সমিতিখনে ২০১৫ চনত ডিচেম্বৰ মাহত গুৱাহাটী উচ্চ ন্যায়ালয়ত ৰিট আৱেদন দাখিল কৰে।
ইপিনে, এই আৱেদনখন সন্দৰ্ভত অসম চৰকাৰক মতামত দিবলৈ গুৱাহাটী উচ্চ ন্যায়ালয়ে নিৰ্দেশ দিছে।
গতিকে ন্যায়ালয়ৰ এই নিৰ্দেশনাটো বাতিল কৰিবলৈ অসম চৰকাৰক শপতনামা দাখিল কৰিবলৈ পূব গুৱাহাটী ভূমি সংস্কাৰ সমিতিয়ে দাবী জনাইছে।
