ঐতিহাসিক জয়সাগৰ পুখুৰীত চৰিবলৈ অহা শতাধিক পক্ষীয়ে মানুহৰ নিৰ্মমতাৰ বলি হৈ কৰুণ মৃত্যুক সাৱটি ল’ব লগীয়া এটা ঘটনাই অঞ্চলটোৰ সচেতন নাগৰিক, প্ৰকৃতিপ্ৰেমীক মৰ্মাহত কৰি তুলিছে।
পুখুৰীটোলৈ দৈনিক হাজাৰ হাজাৰ জলচৰ পক্ষী, বিশেষকৈ বনৰীয়া হাঁহ আহে যদিও আজি প্ৰায় শতাধিক পক্ষীয়ে মৃত্যুক আঁকোৱালি লোৱাৰ কৰুণ দৃশ্য দেখা পায় দাঁতিকাষৰ মানুহে।
আজি ৰাতিপুৱা ঐতিহাসিক পুখুৰীটোত এইদৰে জাকে জাকে পৰিভ্ৰমী চৰাইবোৰৰ মৃত্যু হোৱা দেখি হতবাক হয় স্থানীয় ৰাইজ।
স্থানীয় ৰাইজে অনুমান কৰামতে, একাংশ দুষ্টলোকে মাংসৰ লোভত চৰাইবোৰ চৰি থকা ঠাইত ধান আদিৰ লগত ফুৰাদন নামৰ এবিধ বিষাক্ত ঔষধ মিহলাই আলহী পক্ষীসমূহ নিধন কৰে। এইদৰে পক্ষীসমূহ ধৰি মাংস হিচাপে বিক্ৰী কৰি বহুতে এক ৰমৰমীয়া ব্যৱসায় কৰি আহাৰ অভিযোগো আনে স্থানীয় ৰাইজে।
এই বিষয়ে বহুবাৰ বনবিভাগক জনোৱাৰ পিছতো কোনো কাৰ্য্য ব্যৱস্থা হাতত লোৱা পৰিলক্ষিত নহ’ল বুলি স্থানীয় ৰাইজে অভিযোগ আনে। “বনবিভাগৰ অৱহেলাৰ বাবেই জয়সাগৰ পুখুৰীত আজি এই দৰে জাক জাক পৰিভ্ৰমী পক্ষীৰ মৃত্যু হয়।” এজন স্থানীয় লোকে কয়।
ইফালে ঘটনা সন্দৰ্ভত শিৱসাগৰ জিলা প্ৰশাসনক সাংবাদিকে অৱগত কৰাৰ তিনি ঘণ্টাৰ পাছতো জয়সাগৰ পুখুৰীত উপস্থিত হবলৈ সময় নোলাল এজনো প্ৰশাসনিক বিষয়াৰ। যাৰ বাবে সাংবাদিকৰ দল এটাই স্থানীয় ৰাইজৰ সহায়ত পক্ষীসমূহ উদ্ধাৰ কৰে।
বহু পলমকৈহে পিছত বন বিভাগৰ দুজনমান কৰ্মচাৰী আৰু চিকিৎসকৰ দল এটা উপস্থিত হৈ বহুকেইটা পক্ষী জীৱিত অৱস্থাত উদ্ধাৰ কৰা পক্ষী সমুহ চিকিৎসাৰ ব্যৱস্থা কৰে যদিও ভালে সংখ্যক আলহী পক্ষীৰ ইতিমধ্যে মৃত্যু হয়।
উল্লেখযোগ্য যে এছিয়াৰ ভিতৰতে বিখ্যাত জয়সাগৰ পুখুৰীটোৰ পানীত প্ৰতি বছৰে শীতকালত হাজাৰ হাজাৰ বনৰীয়া পৰিভ্ৰমী চৰাইবোৰ সাঁতুৰি-নাদুৰি বিয়লি ঘৰমুৱা হয়। সুদূৰ অষ্ট্ৰেলিয়া, চাইবেৰিয়া, নিউজিলেণ্ড আদিৰ পৰা অহা এই আলহী পক্ষীসমূহ শিৱসাগৰৰ শিৱসাগৰ পুখুৰী, জয়সাগৰ পুখুৰী, পহুগড়, দিচাংমুখ, ডিমৌমুখ, পানীদিহিং পক্ষী অভয়াৰণ্য আদিত শীতকালত আহি বাহৰ পাতেহি। কিন্তু দুষ্ট লোকসকলে ইয়াৰ সুযোগ লৈ পক্ষীবোৰ ব্যাপক হাৰত নিধন কৰে। বন বিভাগে ইয়াৰ বিৰুদ্ধে আজিলৈকে দৃঢ় পদক্ষেপ নোলোৱাত পক্ষীকূললৈ সংকট নামি আহিছে।
শীতৰ লগে লগে অসমলৈ হাজাৰ হাজাৰ পৰিভ্ৰমী পক্ষীৰ আগমন ঘটে যদিও এতিয়াও অসমৰ মানুহ বন্ধুসুলভ হৈ উঠা নাই চৰাইবোৰৰ প্ৰতি। বৰং চৰাইবোৰক এতিয়াও সহজলভ্য মাংস হিচাপে জ্ঞান কৰিবলৈ এৰা নাই।
