এগৰাকী স্নাতক চূড়ান্ত বৰ্ষৰ ছাত্ৰীক প্ৰশ্নকাকত ফাদিলৰ প্ৰলোভন আৰু অশালীন বাৰ্তালাপেৰে মানসিক তথা যৌন নিৰ্যাতন চলোৱাৰ অভিযোগত লক্ষ্ণৌ বিশ্ববিদ্যালয়ে মঙলবাৰে কঠোৰ পদক্ষেপ গ্ৰহণ কৰিছে। প্ৰাণীবিজ্ঞান বিভাগৰ অভিযুক্ত সহকাৰী অধ্যাপক পৰমীত সিঙৰ (৪০) বিৰুদ্ধে তদন্তকাৰী সমিতিয়ে প্ৰাথমিক প্ৰমাণ লাভ কৰাৰ পিছতে উপাচাৰ্য জে পি সাইনীৰ নেতৃত্বত বহা জৰুৰী কাৰ্যবাহী বৈঠকত তেওঁক তাৎক্ষণিকভাৱে কাৰ্যকৰী হোৱাকৈ চাকৰিৰ পৰা নিলম্বন কৰা হয়।
এই সন্দৰ্ভত বিশ্ববিদ্যালয়ৰ পৰীক্ষা নিয়ন্ত্ৰকৰ এজাহাৰৰ ভিত্তিত হাচানগঞ্জ আৰক্ষীয়ে যোৱা ১৬ মে’ত অধ্যাপক পৰমীত সিঙক গ্ৰেপ্তাৰ কৰিছে। ছাত্ৰীগৰাকীৰ সৈতে হোৱা বাৰ্তালাপৰ কেইবাটাও অডিঅ’ ক্লিপ ছচিয়েল মিডিয়াত ভাইৰেল হোৱাৰ পিছতে এই সমগ্ৰ ঘটনা পোহৰলৈ আহে। ভাইৰেল হোৱা এটা অডিঅ’ ক্লিপত অভিযুক্ত শিক্ষকে ছাত্ৰীগৰাকীক ‘ডাৰ্লিং’ বুলি সম্বোধন কৰি পৰীক্ষাৰ পূৰ্বেই তেওঁৰ বাসগৃহলৈ আহিলে ফাদিল হোৱা প্ৰশ্নকাকত যোগান ধৰাৰ প্ৰলোভন দিয়া শুনা গৈছিল। এই ঘটনাই ৰাজ্যখনৰ শিক্ষা মহলত তীব্ৰ চাঞ্চল্যৰ সৃষ্টি কৰিছে।
বিশ্ববিদ্যালয় কৰ্তৃপক্ষই গঠন কৰি দিয়া তিনিজনীয়া উচ্চস্তৰীয় অনুশাসনমূলক সমিতিয়ে দাখিল কৰা অন্তৱৰ্তীকালীন প্ৰতিবেদনত উল্লেখ কৰিছে যে অভিযুক্ত শিক্ষকজনে নিজৰ পদৰ অপব্যৱহাৰ কৰি ছাত্ৰীগৰাকীক যৌন শোষণৰ চেষ্টা চলাইছিল। সমিতিয়ে তেওঁক শিক্ষকৰ আচৰণ বিধি উলংঘা কৰা, কৰ্মক্ষেত্ৰত গুৰুতৰ মানসিক আৰু যৌন নিৰ্যাতন চলোৱা আৰু বিশ্ববিদ্যালয়ৰ শৈক্ষিক মৰ্যাদা তথা ভাবমূৰ্তি ক্ষুণ্ণ কৰাৰ বাবে সম্পূৰ্ণ জগৰীয়া কৰিছে। কাৰ্যবাহী পৰিষদৰ বৈঠকত এই ভাইৰেল অডিঅ’ ক্লিপসমূহ পৰীক্ষা কৰাৰ পিছত সদস্যসকলে মত প্ৰকাশ কৰে যে এনে আচৰণ শিক্ষক-ছাত্ৰীৰ পবিত্ৰ সম্পৰ্কৰ মৰ্যাদাৰ পৰিপন্থী।
আনহাতে, গ্ৰেপ্তাৰ হোৱাৰ পূৰ্বে সহকাৰী অধ্যাপক পৰমীত সিঙে সংবাদ সংস্থা ‘পিটিআই’ৰ সৈতে দূৰভাষযোগে হোৱা বাৰ্তালাপত নিজক নিৰ্দোষী বুলি দাবী কৰিছিল। বিশ্ববিদ্যালয়ৰ আভ্যন্তৰীণ ৰাজনীতিৰ ষড়যন্ত্ৰৰ বলি হৈ তেওঁ এনে মিছা অভিযোগৰ সন্মুখীন হ’বলগীয়া হৈছে বুলি তেওঁ দাবী কৰে। অৱশ্যে, কাৰ্যবাহী পৰিষদৰ বৈঠকৰ এক সূত্ৰই প্ৰকাশ কৰা অনুসৰি, সোমবাৰে অনুষ্ঠিত বৈঠকত অভিযুক্তই ভাইৰেল হোৱা কণ্ঠস্বৰ তেওঁৰেই বুলি স্বীকাৰ কৰিছিল যদিও কথা প্ৰসংগত তেওঁৰ মুখ পিছলিহে তেনে শব্দ ওলাইছিল বুলি যুক্তি দৰ্শায়। ইফালে, ভুক্তভোগী ছাত্ৰীগৰাকীয়েও তদন্তকাৰী সমিতিৰ সন্মুখত হাজিৰ হৈ তেওঁৰ ওপৰত চলোৱা মানসিক নিৰ্যাতন আৰু হেঁচা প্ৰয়োগৰ সমগ্ৰ ধাৰাবাহিক ঘটনাৰ সবিস্তাৰ বিৱৰণ লিপিবদ্ধ কৰাইছে।
বিশ্ববিদ্যালয় প্ৰশাসনে নিলম্বিত অধ্যাপকগৰাকীৰ বিৰুদ্ধে ইতিমধ্যে এখন চাৰ্জশ্বীট জাৰি কৰিছে। অহা ১৫ দিনৰ ভিতৰত তেওঁক সকলো প্ৰমাণসহ লিখিত উত্তৰ দাখিল কৰিবলৈ নিৰ্দেশ দিয়া হৈছে। নিৰ্ধাৰিত সময়ৰ ভিতৰত সন্তোষজনক উত্তৰ লাভ নকৰিলে তেওঁৰ বিৰুদ্ধে চাকৰিৰ পৰা বৰ্খাস্তকৰণৰ প্ৰক্ৰিয়া আৰম্ভ কৰা হ’ব বুলি কৰ্তৃপক্ষই স্পষ্ট কৰি দিছে।
