‘চিবিআইৰ ওপৰত এতিয়া ৰাইজৰ ভৰসা নাই। চিবিআই এতিয়া বিজেপিৰ হাতৰ পুতলা।’ শনিবাৰে প্ৰদেশ কংগ্ৰেছৰ সভাপকি ৰিপুণ বৰাই ৰাজীৱ ভৱনত অনুষ্ঠিত ‘শক্তি’ নামৰ অনুষ্ঠানৰ পিছতে সংবাদ মাধ্যমৰ আগত এইদৰে মন্তব্য কৰে।
উল্লেখযোগ্য যে চিবিআইৰ শীৰ্ষ নেতৃত্বই লুই বাৰ্জাৰ কেলেংকাৰি তদন্তৰ সন্দৰ্ভত চলাই থকা অভিযানৰ আজি চতুৰ্থ দিনা জি এম ডি এৰ প্ৰাক্তন কাৰ্যবাহী বিষয়া প্ৰীতম শইকীয়াক জেৰা কৰাৰ লগতে জি এম ডি এৰ মুখ্য গাণনিক চেৰাফুদ্দিন আহমেদক সোধ-পোছ কৰে।
ইয়াৰোপৰি চি বি আইৰ দলটোৱে ৰাজগড়স্থিত এনফৰ্চমেণ্ট সঞ্চালকালয়ৰ কাৰ্য্যালয় আৰু খ্ৰীষ্টানবস্তিৰ জাইকাতো অভিযান চলায়।
কিন্তু মন কৰিবলগীয়া যে পূৰ্বতে চিবিআইৰ ৰোষত পৰি তিহাৰ জে’ললৈ যোৱা প্ৰদেশ কংগ্ৰেছৰ সভাপতি ৰিপুণ বৰাই এই লুই বাৰ্জাৰ কেলেংকাৰিৰ সন্দৰ্ভত চিবিআয়ে চলোৱা তদন্তক সন্দেহত লৈ এনেদৰে মন্তব্য কৰাটোৱে বিশেষ তাৎপৰ্য বহন কৰিছে।
সভাপতি গৰাকীয়ে ‘চিবিআই এতিয়া ৰাজনৈতিভাৱে ব্যৱহৃত হৈছে’ বুলি এক গুৰুতৰপূৰ্ণ দাবী তুলি কয় যে, ‘এতিয়া আমি চিবিআইৰ ফালৰ পৰা কিমান শুদ্ধ তদন্ত হ’ব, আমাৰ সন্দেহ আছে।‘
ইফালে চিবিআইৰ জেৰা চলি থকাৰ সময়তে দিচপুৰ সচিবালয়ৰ তৰফৰ পৰা জি ডি ডিৰ প্ৰাক্তন অ’এছ ডি আৰু বৰ্তমানৰ পৰিবেশ আৰু বন বিভাগৰ উপ-সচিব পমী বৰুৱাক বিধানসভাৰ শীতকালীন অধিৱেশনৰ বিশেষ দায়িত্ব দিয়া হৈছে। লগতে ধীমান কুমাৰ চৌধুৰীৰ স্থানত স্থলাভিষিক্ত কৰা হৈছে পমী বৰুৱাক। যিটো কথা সচেতন মহলৰ মাজত চৰ্চাৰ বিষয় হৈ পৰিছে।
ইফালে চিবিআইৰ তদন্তত বিধি পথালি দিবৰ বাবে ৰিপুণ বৰাই এনেধৰণৰ মন্তব্য কৰিছে নে সঁচাকৈয়ে ৰিপুণ বৰাই কোৱাৰ দৰে লুই বাৰ্জাৰ কেলেংকাৰীৰ ক্ষেত্ৰত কেন্দ্ৰীয় তদন্তকাৰী সংস্থা চমুকৈ চিবিআইৰ ভূমিকা সন্দেহজনক নেকি? নে চিবিআইয়ে নিজাববীয়াকৈ তদন্ত কৰি লুই বাৰ্জাৰৰ দৰে হাজাৰ কোটি টকীয়া কেলেংকাৰীৰ সৈতে জড়িত ৰথী-মহাৰথীসকলক জেৰা কৰি এক উচিত তদন্ত কৰিব, সেয়া এক চিন্তনীয় বিষয়।