‘’মধ্য গুৱাহাটী সমষ্টিৰ অসম জাতীয় পৰিষদৰ প্ৰাৰ্থী কুংকি চৌধুৰীক আৰক্ষীয়ে চমন দিয়াৰ ঘটনাটো আশ্চৰ্যজনক আৰু দুৰ্ভাগ্যজনক। এয়া কেৱল এগৰাকী প্ৰাৰ্থীৰ ওপৰত প্ৰশাসনিক চাপেই নহয়, এয়া সাম্প্ৰতিক অসমত গণতন্ত্ৰৰ ওপৰত চলি থকা বিজেপিৰ দমননীতিৰ জ্বলন্ত উদাহৰণ।‘’ এইদৰেই আজি সামাজিক মাধ্যত তীব্ৰ প্ৰতিক্ৰিয়া প্ৰকাশ কৰিছে অসম জাতীয়পৰিষদৰ সভাপতি লুৰিণজ্যোতি গগৈয়ে।
উল্লেখ্য যে চলিত অসম বিধানসভা নিৰ্বাচনৰ মাজতে নিৰ্বাচনী আচৰণ বিধি উলংঘন কৰাৰ অভিযোগত গুৱাহাটী আৰক্ষীয়ে বিৰোধী ঐক্যৰ প্ৰাৰ্থী কুংকি চৌধুৰীক চমন জাৰি কৰিছে। অসম জাতীয় পৰিষদৰ প্ৰাৰ্থীগৰাকীক দেওবাৰে পুৱা ১১ বজাত পানবজাৰ আৰক্ষী থানাত হাজিৰ হ’বলৈ নিৰ্দেশ দিয়া হৈছে। মধ্য গুৱাহাটী সমষ্টিৰ পৰা প্ৰতিদ্বন্দ্বিতা আগবঢ়োৱা ২৭ বছৰীয়া চৌধুৰী চলিত নিৰ্বাচনৰ কনিষ্ঠতম প্ৰাৰ্থীসকলৰ ভিতৰত অন্যতম। প্ৰাৰ্থীগৰাকীয়ে ইতিমধ্যে তেওঁৰ বিৰুদ্ধে উত্থাপিত সকলো অভিযোগ অস্বীকাৰ কৰিছে।
নিজৰ প্ৰতিক্ৰিয়াত অজাপৰ নেতাগৰাকীয়ে কয়, ‘’যেতিয়া শাসনক্ষমতাত থকা দলটোৱে ক্ষমতা হেৰুৱাব বুলি শংকিত হৈ উঠে, যেতিয়া জনগণৰ মতদান তেওঁলোকৰ বিপক্ষে গৈছে বুলি নিশ্চিত হৈ পৰে, তেতিয়াই বক্ৰপথেৰে ক্ষমতাক কুক্ষিগত কৰি ৰাখিবলৈ বিজেপিৰ দৰে ফেচিষ্ট দলে অগণতান্ত্ৰিক পন্থাসমূহ অৱলম্বন কৰে।‘’
লুৰিণজ্যোতিৰ অভিযোগ ‘’হিমন্ত বিশ্ব শৰ্মা আৰু বিজেপিয়ে নিজৰ ৰাজনৈতিক সুবিধাৰ বাবে প্ৰশাসন আৰু আৰক্ষীক ব্যৱহাৰ কৰিবলৈ আৰম্ভ কৰিছে, এয়া গণতান্ত্ৰিক ব্যৱস্থাৰ বাবে বিপজ্জনক সংকেত। অসমত বিজেপিয়ে ভয়-ভাবুকি, দমন-উৎপীড়ন আৰু গুণ্ডাৰাজৰ জৰিয়তে বিৰোধীৰ কণ্ঠক প্ৰতিহত কৰিবলৈ বিচাৰে।‘’
অজাপ নেতাগৰাকীৰ প্ৰশ্ন— ‘’কুংকি চৌধুৰীয়ে এজাহাৰ দাখিল কৰাৰ পাছতো ডীপফেক ভিডিঅ’ প্ৰকাশ কৰা বিজেপিৰ পালিনেতাসকলক এতিয়ালৈ গ্ৰেপ্তাৰ কৰা হোৱা নাই কিয়? পক্ষপাতমূলক আচৰণ কিয় কৰিছে অসম আৰক্ষীয়ে?’’
অসম জাতীয়পৰিষদৰ নেতাগৰাকীয়ে কয়, ‘’মধ্য গুৱাহাটী সমষ্টিত অজাপৰ প্ৰাৰ্থীগৰাকীৰ উত্থান আৰু জয়ৰ সম্ভাৱনা দেখি আতংকিত হৈ পৰা বিজেপিয়ে এতিয়া ভয়-ভাবুকিৰ ৰাজনীতিৰ আশ্ৰয় লৈছে। কিন্তু এইটোও সমানেই সত্য যে ভয় দেখুৱাই সত্যক চিৰদিনৰ বাবে ঢাকি ৰাখিব নোৱাৰি। কুংকি চৌধুৰীৰ দৰে সাহসী তৰুণীক আমি এই সময়ত স্পষ্ট বাৰ্তা দিব বিচাৰোঁ যে তুমি অকলশৰীয়া নহয়। অসমৰ গণতান্ত্ৰিক চিন্তা-চেতনা থকা হাজাৰ হাজাৰ মানুহ কুংকি চৌধুৰী লগত আছে। এই ভয়-ভাবুকিয়ে অসম জাতীয় পৰিষদৰ জাতীয় সেৱকৰ সংগ্ৰামক আৰু শক্তিশালীহে কৰিব।‘’
তেওঁ লগতে স্পষ্ট কৰি দিয়ে যে ‘’এয়া ভয় খোৱাৰ নহয়, এই সময় সত্যৰ পক্ষত দৃঢ়ভাৱে থিয় দিয়াৰ। যিসকলে গণতন্ত্ৰত বিশ্বাস কৰে, তেওঁলোকে আজি একেলগে মাত মাতিব লাগিব। প্ৰশাসনে ৰাজনৈতিক অপব্যৱহাৰ বন্ধ কৰক, ৰাজনৈতিক প্ৰতিহিংসা বন্ধ কৰক। অসমে কেতিয়াও বিজেপিৰ গুণ্ডাৰাজ স্বীকাৰ নকৰে। আমাৰ মাটিত সদায়েই গণতন্ত্ৰ, ন্যায় আৰু অধিকাৰৰ জয় হ’বই। এই সংগ্ৰাম চলি থাকিব— সাহসেৰে, একতাৰ সৈতে, আৰু সততাৰ শক্তিৰে।‘’
