ৰাজ্যখনত সন্দেহযুক্ত বিদেশী চিনাক্তকৰণৰ প্ৰক্ৰিয়াকলৈ প্ৰতিক্ৰিয়া অব্যাহত থকাৰ মাজতেই নাম বিভ্ৰাটৰ বাবে এগৰাকী মহিলাই ডিটেনশ্যন কেম্পত বন্দীত্বৰ জীৱন কটাবলগীয়া হোৱা এক ঘটনা পোহৰলৈ আহিছে। চিৰাং জিলাৰ বিজনী মহকুমাৰ অন্তৰ্গত ১নং বিষ্ণুপুৰ গাঁৱৰ এগৰাকী মহিলাই নাম বিভ্ৰাটৰ বাবেই তিনিবছৰ ধৰি কোকৰাঝাৰৰ ডিটেনশ্যন কেম্পত বন্দী হৈ থাকিবলগীয়া হোৱাৰ অভিযোগ উঠিছে।
উপযুক্ত নথি থকাৰ পাছতো বিজনীৰ ১নং বিষ্ণুপুৰ গাঁৱৰ বাসিন্দা ৫৯ বছৰীয়া মধুবালা মণ্ডল নামৰ ভাৰতীয় মহিলাগৰাকীক বিদেশী ন্যায়াধীকৰণে ২০১৬ চনত ডিটেনশ্যন কেম্পলৈ প্ৰেৰণ কৰাৰ অভিযোগ উত্থাপিত হৈছে।
ঘটনা অনুসৰি, ২০১৬ চনত ১নং বিষ্ণুপুৰ গাঁৱৰ বাসিন্দা মাখন নমঃ দাসৰ পত্নী মধুবালা দাসৰ নামত বিদেশী ন্যায়াধীকৰণৰ আদালতে বিদেশীৰ জাননী জাৰি কৰে। কিন্তু মাখন নমঃ দাস আৰু পত্নী মধুবালা দাসৰ বহু বছৰ আগতে মৃত্যু ঘটে।
আশ্চৰ্যজনকভাৱে, ইয়াৰ পাছতে বিদেশী ন্যায়াধীকৰণ আদালতে মধুবালা দাসৰ নামত জাৰি কৰা বিদেশী জাননীৰ ভিত্তিতেই গাঁওখনৰেই বাসিন্দা নেপাল মণ্ডলৰ কন্যা তথা ৰমাকান্ত মণ্ডলৰ পত্নী মধুবালা মণ্ডলক ডিটেনশ্যন কেম্পলৈ প্ৰেৰণ কৰাৰ অভিযোগ কৰিছে স্থানীয় ৰাইজে।
বিগত তিনিবছৰ ধৰি এগৰাকী ভাৰতীয় মহিলাই বিদেশী হিচাপে কোকৰাঝাৰৰ ডিটেনশ্যন কেম্পত কটাবলগীয়া হোৱা ঘটনাই বিভিন্ন মহলত তীব্ৰ প্ৰতিক্ৰিয়াৰ সৃষ্টি কৰিছে।
আনহাতে, মধুবালা মণ্ডলৰ পিতৃ নেপাল মণ্ডলৰ ১৯৭১ চনৰ ভোটাৰ তালিকাত নাম থকাৰ উপৰি অন্যান্য নথি পত্ৰ থকাৰ পাছতো ডিটেনশ্যন কেম্পলৈ প্ৰেৰণ কৰি হাৰাশাস্তি কৰাৰ অভিযোগ উঠিছে।
ইপিনে, স্থানীয় ৰাইজে এই ঘটনা সন্দৰ্ভত বিজনী মহকুমাধিপতি আৰু চিৰাং জিলাৰ আৰক্ষী অধীক্ষকক অভিযোগ দিয়ে যদিও তেওঁলোকে আইনগতভাৱে কোনো সহায় নকৰা বুলি অভিযোগ কৰে।
অতি দৰিদ্ৰ পৰিয়ালৰ মধুবালা মণ্ডল ডিটেনশ্যন কেম্পত বন্দী হৈ থকাৰ বাবে একমাত্ৰ মুকবধিৰ কন্যা ফুলমালা মণ্ডল বৰ্তমান মধুবালাৰ পিতৃগৃহত আশ্ৰয় লৈ আছে। নাম বিভ্ৰাটৰ বাবেই এনেদৰে বন্দীত্বৰ দশা কটাবলগীয়া হোবা মধুবালাক শীঘ্ৰেই মুকলি কৰি দিবলৈ স্থানীয় ৰাইজে চৰকাৰৰ প্ৰতি আহ্বান জনাইছে।
